Read Maru EZEKELA 23 Bible Online

EZEKELA 23 - Maru bible

EZEKELA 23

²Shid ba: ra" yaug we"- ganhae" yao: bai: we' yao: nhaung: tao na: ako".

³Yao: nhae tao ngai shi" au: Egutu mae na ko" re- yao: nae tao zomyi: gyang" ayam" gyad: byaug mung: shava myhi" boe" lo" ako".

⁴Yao: bai: yaug: mang wa Ohola (yao: wa Samari gaung tha" ngad: ra".) Yao: nhaung: yaug: nho: mang wa Oholiba (yao: wa Yerusalem gaung tha" ngad: ra") ngad: ako". Ngo wa yao: shid' nhae shid' zo" geim" re lo,xo' yu mung: yao: shid' yaug ngo re zoshao khau byid' ako".

⁵Ohola wa- nga" mae" bin: ngad thao re:- shava myhi" xo' boe" na mung: Asuri mung" mae" yao" zoqae: pho" qenho: jhid'de; myid re shab' mhin: ra".

⁶Yao: bam wa khalhae: nyug khin mai bau: shaung: ve, ci: ra" gyezo: qe ngad mung:- byu zang jham we' aya: myhao: ra" zug: ade, qe ngad: ako". Yao: bam alhab' mo, wa- yaung" ra" myao: jui: gyezug: qe ngad: ako".

⁷Yao: wa Asuri zug: qe alhab' nho: shava myhi" boe" mung: yao" nho: shab' mhin: ru wa Asuri solho jham re caung:pa" ra" khyo" yao: yao" gaung re masan masin" boe" nhao: pye' ra".

⁸Yao: wa yao" nho: zomyi: gyang" ayam" gyad: byaug: ra" Egutu mae shava myhi" kad' qhid: lo: rure xo' kad' ra". Yao: wa zomyi: nau" ngad shi" yo, mae" yauggai qe wa yao: we' yab mung: yao: re shava myhi" we' dakhyo: zam" ako".

⁹Aimung: ngo wa yao: re- yao: gyai lhaung" taung" jhid'de; ra" Asuri zoqae: pho" qejhao" ab: pye' va".

¹⁰Yao: bam wa- yao: re gaungcin: khyad' shao: pye' byid: mung:- yao" nho: yauggai zo: qe we' myiqe: zo: qere taung" yu: pye' byid' ako". Ai: thao yao: re shae pyang" yang se' pye' ako". Khyi" khao:ngo" mae" myiqe: qe wa yao: leim zo" ra" au: pa re gaui ceim" mho: ako".

¹¹Yao: nhaung: Oholiba wa ceru re myao ngadqere:- yao: wa je: qan mung: Ohola kad' lai: lo: ra" shava myhi" mau" zo" tho' je: xo: ra".

¹²Yao: re: Asuri byu zang qe we' zug: ade, qe- khin shaung: ve, ci: ra" gyezo: qere shab' mhin mung: myao: jui: sulhe: zug: qe lamyhung bo: ra" zolau: qere qu" shab' mhin: na: ra".

¹³Ngo wa yao: dae xo sho' ave, qeim: rure the' myao mung:- yao: nhaung: re sao qhid' yao: bai: yaug we' dakhyo: magai: rure myao byid: va".

¹⁴Yao: wa yao" nho: gintho' mau" mae je: je: gyo" nab vao lo" ra". Yao: wa khinqae jham mae byao byao ne sho' kyaung" tung" te' to" ra" Babelon gyezug: mo" qe: khyao dau sulho we' yao: bam: phyid' dam: gam: sho' mae shoqid phyid' cui: cui" ci mung: yao: bam: au: jham mae qu" yaung" sho' shaung: to" ra" au: thab' jham: yang yao" nho: myid re lao" yu: ako".

¹⁵

¹⁶Yao: wa- yao: bam re the' myao: ke' we' qu" shab' mhin: li" mung: Babelon mae" yao: bam jhao" lagyo: nhao: ke' ra".

¹⁷Babelon byu qe wa yao: we' gaung sho: zam" nae" qhid' mae" li" ako". Yao: bam wa yao: re ci mung: masan masin" saung" kad' pye' ko" ruyang yao: wa yao: bam re ca' li" ra".

¹⁸Yao: wa yao" gaung re mo,phaung qhid' kheim: mae khyad' qhu" mung: yao: yao: shava myhi" ngad: rure yaug khao:ngo" yang myao sho' kad' ra". Ngo wa yao: bai: re ca' pye' ru we' dakhyo: yao: re ca' pye' va".

¹⁹Yao: wa- Egutu mae" myiqe: nau" ngad shi" au: shava myhi" boe" lai: lo: ru we' dakhyo: lo, mau" qhu" mung:- shava myhi" dayaug tho' je: xo: byaug: ra".

²⁰Yao: wa- loze jham we' myao: lo: jham: nho: shab' mhin: ru alhab' bo: ra" qhae ka ka: ra" yauggai qere shab' mhin: ru byang" jo; ra".

²¹(Oholiba we"- nao wa nao zomyi: nau" ngad: yo, Egutu mae" yauggai qe ni" nho: nug' cug am re soe' byid: mung:- ni" nho: zomyi: gyang" ayam" gyad: byaug: au: mae" gintho' mau" zo" qobo re dam: paug' kad' nug: ra".)

²²Oholiba we"- aimung: ana" kam" wa nao re qam: so' bo: ra" kho:kham ASANG ngo ta" na:- nao wa ni" zoqae: pho" jham re nghang" byaug: ava". Ngadqere: ngo wa- yao: bam: yang nao re nhag' yo: mung: nao re ceim" lhang" gam: nae" khyo kad' nhao nae".

²³Ngo wa Babelon byu qe alhab' we' Khalde byu qe alhab'- Pekod- Shoa we' Koa mae" mo, we' Asuri byu qe alhab' re jhui" lo nae". Ngo wa ai: lamyhung bo: ra" zolau: byu zang qe we' zug: qere ai: akhyag: ra" zug: qe we' myao: dab mae" zug: mo" jham re jhui" khai: zhang: to: nae".

²⁴Yao: bam wa- myao: lhin" jham we' gyetab aqi: jhui: mung: zao: kho we' nao re mug: am: shad' khyo li" khe' zin: genae". Yao: bam wa- go jham- jo,to' maug jham ve; ci mung: nao re li" lhang" kham" to: genae". Ngo wa nao re- yao: bam: lo, khyo ab: pye' mung: yao: bam wa nao re- yao: bam: tarha" jham ci yang: dao: kho' li" genae".

²⁵Ngo wa nao re nhag' yo" ra" mathao mae- ngo wa yao: bam: nhag' yo" ru khyo" yang nao re yhin" nhao nae". Yao: bam wa ni" nho: nho we' nokhye' jham re lhai" phyid' pye' byid: mung:- ni" zo: qe re se' pye' li" genae". Ngad va"- yao: bam wa ni" yauggai zo: qe we' myiqe: zo: qere nao mae" yu: pye' byid: mung:- yao: bam re adaui phe, phe, ngha" pye' li" genae".

²⁶Yao: bam wa ni" nho: mai bau: jham re lao" cad' pye' mung: ni" nho: phug' de; laug jham re yu: pye' byid' li" genae".

²⁷Ngo wa- ni" nho: shab' mhin: rure thang: pye' nhao mung:- nao Egutu mae na shi" au: mae" shab' lai: lo: ra" maca' majhad' mau" jham re tam" pye' byid: nae". Nao wa solho jham re maqu" lo nae" Egutu nho: khyo rere: mamyid lo: nae"- ga: ta" to: va".

²⁸Ceru wa kho:kham ASANG ta" ru ngad: ra". Ngo wa nao re- nao nghang: mung: ca' ra" byumyu" qe: lo, khyo ab: byid' pye' nae".

²⁹Aimung: yao: bam wa nao re nghang: ko" ra" mathao mae- yao: bam wa- nao kaung: qo" to" ru alhab' re yu: pye' byid: mung: nao re gaungcin khyad' shao: pye' yang: shava myhi" re we' dakhyo: khyad' qhu" to" li" genae". Ni" nho: shab' mhin: ru we' shava myhi" mau" zo" wa nao re ceru: boe" nhao: ava".

³⁰Nao wa byumyu" qe: nho: shava myhi" boe" lai: lo mung: yao: bam: solho jham khyo" yang nao yao" gaung re masan masin" boe" nhao: li" nae".

³¹Nao wa ni" bai" nho: khyid khu mae cao" yang:- ngo wa nao re daja: za: ngad: ra" qobo dae keim mae" shaug' nhao nae".

³²Qam: so' bo: ra" kho:kham ASANG ta" ra"- nao wa ni" bai" nho: keim mae" shaug' ca" li" nae". Ai wa qi: mung: athai: no; ra". Yaug khao:ngo" wa- nao re jung" mung: ceim" nyhe' li" genae" ai: keim wa byang" jo; ra".

³³Ni" bai: Samari shaug' ra" keim ngad: ra" gyaug: ci" ru we' byo; qeim: ra" keim wa- nao re nhag' lam: shug mung: yid nhao: li" nae".

³⁴Nao wa ai re shaug' mung: ho sho' zhin shaug' pye' li" nae". Aimung: ai: nho: aje, aman" jham: yang ni" nho: nug' cug am re lhai" cad' pye' byid' li" nae". Kho:kham ASANG ngo ta" to: va".

³⁵Ana" ceru wa- kho:kham ASANG ta" na: ru ngad: ra". Naonhaung" wa ngo re to" myhid' pye' mung: ngo re nhaung thao" phaug' pye' ko" ru yang- naonhaung" wa naonhaung" nho: shab' mhin: ru we' shava myhi" mau" zo" qhid' mae" dayin dayo: leim zo" li" genae".

³⁶ASANG wa ngo re ta" ra". Shid ba: ra" yaug we"- nao wa Ohola we' Oholiba re dao: phyid' nae" jin" va" i? Yao: shid' tao re- yao: shid' tao kad' lai: lo: ra" maca' majhad' mau" yang qobo zhaug' wa,-

³⁷Yao: nhae wa- lao shad' mau" we' byu se' mau" kad' shad' ako". Solho jham we' lao shad' mung: yao: nhae tao: yang ngo re khau byid' ra" yauggai zo: qere se' ra" qobo zhaug' byid: wa,- yao: nhae wa- nga" nho: yauggai zo: qere- solho jham re xeim: ngaui" byid' ako".

³⁸Aimung: ai wa- yao: shid' nhae kad' ru alhab' mangad: shi:- yao: shid' nhae wa- nga" Caung:pa" Yham re maca' majhad' kad' mung: ngo jaung: to" ra" Dugno: Ba re lhoe" pye' ako".

³⁹Nga" zoshao qere solho jham: qhid' mae" yao: nhae tao ngaui" xeim: khyo" se' byid' ra" ba mae yao:- yao: shid' nhae wa nga" nho: Caung:pa" Yham khyo li" mung: ai re maca' majhad' kad' pye' ako".

⁴⁰Yao: shid' nhae wa- va: mae" yauggai qere khai: yu nae" qhid' mae" lagyo: qere dam: nhao: ke' ke' kad' mung: ai: yauggai qe joe" li" ako". Bai: nhaung: shid' nhae wa- gaung cid' pye'- myo, mug' xug' pye' mung: phug' de; ra" shaung zai ve; ako".

⁴¹Yao: shid' nhae wa- yaung" ra" yab jaung: dao mae zaung: jo, mung:- yao: nhae tao: qhid' kheim: mae yao: bam wa- ngoyang byid' to" ra" zhanlun xau we' sheim nae pyo: ja: xau bo mung:- xau gai jham saboe" mamyao losho'- byang" sho' lhaung" bam: to" ako".

⁴²Nug: khyo: hug' yhai: ra" byu daphung: phung: jhau thoe re the' gyo" ra". Aibam wa din"pyad' yo mae" jhui" lo: ra" yauggai qe ngad: ako". Yao: bam wa myiqe: tao nho: lo,pau" mae lo,thang: vhe' byid: mung: yao: nhae tao: au: mae yaung" ra" ba maug: zhaung: byid' ako".

⁴³Aimung: ngo wa ngo yao" gaung re- yao: bam wa- lao shad' yang pyao: byaug va" myiqe: dayaug re shava myhi" khyo" ci: na: ako" ein: ta" va".

⁴⁴Yao: bam wa ce: shava myhi" tao jhao" dam: ye: ye: kad' ako". Yao: bam wa- ai: ave, qeim: ra" myiqe: shid' zo: Ohola we' Oholiba jhao" dam: tug' ye" na: ako".

⁴⁵Tarha" din: man" ra" yauggai qe wa yao: shid' nhae re- lao shad' ru we' byu se' yug: khyo" qobo dao: kho' li" genae". Pe"mung:ga"re- yao" shid' nhae wa- lao shad' mau" kad' mung: yao: shid' nhae: lo, jham wa sa: de; ako".

⁴⁶Ceru wa- kho:kham ASANG ta" ru ngad: ra". Yao: shid' nhae re kyaug' nhin" nae" we' lhad' zo: nae" qhid' mae" mo, byu daphung: re jhui" lo ge,.

⁴⁷Mo,phaung wa yao: shid' nhae re laug baui: yang pye' vageshao:- yao: bam: shae pyang: jham: yang khe' zin: mung:- yao: shid' nhae: nho: zoshao qere se' pye' ru we'- yao: shid' nhae: nho: yham jham re ngha" khyo" pye' byid: vageshao:-

⁴⁸Damang: geim" mae- myiqe: yaug khao:ngo" wa yao: bam lhaung" kad' shad' lai: lo ko" ra" lao shad' mau" re madam: kad' nae" qhid' mae" ta" peim" ra" khyo" ngo wa gintho' mau" re tam" pye' nae".

⁴⁹Aimung: bai: nhaung: ni" shid' nhae we"- ngo wa ni" shid' nhae re- ni" shid' nhae: nho: ave, qeim: ru we' solho re caung:pa" ra" ni" shid' nhae: nho: qobo qhid' mae" qobo dae byid: nae". Ailao" ngo wa- qam: so' bo: ra" kho:kham ASANG ngad: rure ni" shid' nhae ba: li" genae".