Read Maru EZEKELA 24 Bible Online

EZEKELA 24 - Maru bible

EZEKELA 24

¹Ngonhaung" pyaung" nha: to: qhug' ru gug zin ein: zin- lho" daxe khye' daxe ba: ba mae- ASANG wa ngo re jhau: ra".

²Shid ba: ra" yaug we"- ana" ba: ba na re tung" xam" to: wa,- pe"mung:ga"re- ce: ba na wa- Yerusalem re Babelon kho:kham: yang vang" qhid: ra" ba na ngad: ra".

³Nga" nho: tau: lhan" ra" byumyu" qere- yao: bam: qhid' mae" qam: so' bo: ra" kho:kham ASANG ngo yao: bam: qhid' mae" tau" to" ra" ce: dao: tau" ta" kyo: wa,- myi:khyeim" mae ug' lhung" to: mung: ai re qid ke' pyang" wa,-

⁴Gai: thao" ra" sho: re ke' wa,- lo,sin jham we' paung sin jham re ke' wa,- ai: mae khyin: yaung" to" ra" gai: thao" shoqug: jham re: ke' wa,-

⁵Gai: thao" ra" yao jham: nho: sho: re ci wa,- ug' qao: mae thao: zao: ngha" wa,- qid re zhau nhao wa,- shoqug: jham we' sho: re kyug' nae" qhid' mae" qid re zhau nhao wa,-

⁶Ceru wa- qam: so' bo: ra" kho:kham ASANG ta" na: ru ngad: ra". Byu se' mo, nho: vomo" wa byuxa: voqoe, qhug' ava". Ai: ru wa- khonhae" re: macid' san: pye' ra" shokyug' ug' thaung: we' dau: ra". Sho: daje, bin daje, phoe' yu: pye' mung: daje, re: madang lo:-

⁷Vomo" khug mae byu se' mau" boe" jo, ngadqere:- sa: wa phalhug: yang qo" nghoe' nyham" pye' nae" ru" ra" myid gaung mae magyo" sheim ngad: ra". Ai wa laug thin dao: mae sheim: gyo" ra".

⁸Ngo wa sa: re maqo" nghoe' nyham: nae" jo, qo mae- nhag' yo" ra" lage, phaug' nae" mho' ra" jo, qo mae to: co' va".

⁹Ceru wa- kho:kham ASANG ta" na: ru ngad: ra". Byu se' mo, nho: vomo" wa byuxa: voqoe, qhug' ava". Ngoyao: thao: zao: bam: to: nae".

¹⁰Thao: tai: laung" lo: shige, myishae re vhag' te' ke' ge,- sho: re jho' ge,- shoqang: re xaug' kin" pye' ge,- shoqug: jham re xaug' khag' pye' ge,.

¹¹Ana"- gyid: bo" ug' keim re myi:gyoe: jham: dao mae- ai: rure phad' nhe" pye' nhao wa,-

¹²Ailao"- ug' khag' jham alhab' wa myishae mae mabyaug: lo" sho' ngadqere: ai: ug' kyaug' jham phad' khag' pye' thao re ai: ug' wa caung:pa" thung" khyo" dam: gyang" san: lo: li" nae".

¹³Yerusalem we"- ni" gintho' lo,mau" jham wa- nao re masan masin" boe" nhao: ava". Ngo wa nao re gyang" san nhao nae" qam: ke' ngadqere:- nao wa masan masin" za: boe" jo; ra". Nao wa- nga" nho: nhag' yo: so' re byang" sho' maqhug' leim zo: zo: wa nao dam: qo" gyang" san nae" mangad:-

¹⁴Kho:kham ASANG ngo ta" to: va". Ngo lo,mau" kad' nae" ayo, joe" li" ava". Ngo wa ni" nho: qobo jham re maqu" lhaui" pye' nae"- nhag' khyag' myid re: maqhu" byid: nae"- nhag' re: makhyag' yu nae". Nao kad' lai: lo: ru qhid' mae" nao re qobo dae byid: nae". Kho:kham ASANG ta" to: va".

¹⁵ASANG wa ngo re jhau: ra".

¹⁶Shid ba: ra" yaug we"- ngo wa nao jhid'de; thao" ra" yaug re dadae: yang za: nao mae" jhui" yu: pye' nae". Nao wa nyhung re: magai: nyhung nae" ngug re: magai: ngug nae"- ngug byid re: magai: thug' nhao nae".

¹⁷Ni" ngug thoe re dathe' gyo: nhao- kaug' qhui: ra" aso: khyo" au: thab' khyad' yang: daye:- khyid zhaung: mazhaung: lo: daye:. Ni" nho: myo, khung: re danghoe' ci- kaug' qhui mo, zo" ra" zo:ve rere: dazo:-

¹⁸Ne,seim no' mae"- ngo wa su we' jho" jhau: na:- ai: ba: myi" thao nga" yham sang myhi" shid: lo" va". Aimung: thao: ba wa ngo wa ngo re ta" to" ru we' dakhyo: kad' va".

¹⁹Supe" wa ngo re- nao pe" mung: ceru: kad' qhu" na: i? ga: myid' ako".

²⁰Aimung: ngo wa yao: bam re- Israel naonhaung" re ce: lau dao: byid: nae" qhid' mae" ASANG wa ngo re ta" to: va".

²¹Naonhaung" wa Caung:pa" Yham gang" tang: rure phug: na: ako". Naonhaung" wa ai re qu" nug mung: yekam: nug: ako". Ngadqere: ASANG wa ai re maca' majhad' boe" nhao: pye' li" nae". Aimung: Yerusalem mae tang" to: co' ra" naonhaung" yham byu qemae" ngai mo, wa gye poe mae se' pye' ru qhug' li" genae".

²²Ailao" naonhaung" wa- ngo kad' lai: lo: rure kad' li" genae". Naonhaung" wa naonhaung" nho: myo, khung: jham re manghoe' ci lo:- kaug' qhui mo, zo" ra" zo:ve re mazo: genae".

²³Naonhaung" wa au: thab' khyad' ci mung: au: cin- khyid zhaung: mazhaung: lo: khyid cin:- madu" qin" genae". Kaug' re: makaug'- ngug re: mangug genae". Naonhaung" wa- naonhaung" nho: qobo jham: mathao mae na: jeim" lo" gemung:- naonhaung" yao: cao: yao: nokyang: jho" kyang" kyo" li" genae".

²⁴Ailao"- ngo wa naonhaung" re aso: boe" byid: nae". Naonhaung" wa ngo kad' lai: lo: ru ja: khao:ngo" re kad' li" genae" ASANG wa- ceru boe" lo: ra" au: re yao: wa kho:kham ASANG ngad: ru naonhaung" ba: li" genae"- ga: ta" ra".

²⁵ASANG wa- shid ba: ra" yaug we"- ana" ngo wa- yao: bam qu" keim" nug mung: yekam: nug: ra" yao: bam: phug: hau: nae" we' ngaui bau: nae" gang" tang: ra" Caung:pa" Yham re yao: bam mae" yu: pye' byid: nae". Aimung: ngo wa- yao: bam: yauggai zo: qe we' myiqe: zo: qere jhui" yu: pye' byid: nae".

²⁶Ceru re ngo kad' ke' ra" ba na mae ai: phyo' qheim" ru mae" qo" phao: loe; lo: ra" byu dayaug wa naonhaung" re ai: khyo lota" shid' li" nae".

²⁷Ai: ba yao: mae nao wa nao ci: phyaug' pye' va" ra" dao: jhau nae" kheim: so' re dam: qo" yu mung: nao wa yao: we' jho" jhau: li" nae". Ce: khyo" yang nao wa- ai: byu qe: qhid' mae" aso: boe" li" nae". Aimung: yao: bam wa ngo ASANG ngad: rure ba: li" genae"- ga: ta" ra".