Read Maru EZEKELA 25 Bible Online

EZEKELA 25 - Maru bible

EZEKELA 25

¹ASANG wa ngo re jhau: ra".

²Shid ba: ra" yaug we"- Amon mung"dan: re qobo zhaug' ta" phoe: pye' wa,-

³Kho:kham ASANG ngo ta" na: rure tae" gyo: genae" qhid' mae" yao: bam re ta" kyo: wa,- naonhaung" wa- nga" nho: Caung:pa" Yham re maca' majhad' kad' pye' rure- Israel mung" re lhau: phyo' sin" pye' rure- Yuda mung" byu qe pyaung" jhui" lo" qhug' rure qu" ngaui: ako".

⁴Naonhaung" ngaui bau: ko" ru yang ngo wa- ba thug' shad' mae"- din"pyad' yo mae" byumyu" qeyang naonhaung" re mang: zin" aung: pye' nhao nae". Yao: bam wa naonhaung" nho: mung" mae yao: bam: jamu jham te: mung: na: bam: li" genae". Yao: bam wa naonhaung" sang ang: ra" shi: jham re zo: mung: nung: nug' re shaug' pye' byid' li" genae".

⁵Ngo wa Raba vomo" re gola:u zam: jao: kad' pye' mung: Amon damung" geim" re yao zam: jo, qo boe" nhao: pye' nae". Airu: lao" naonhaung" wa- ngo ASANG ngad: rure ba: li" genae".

⁶Ceru wa- kho:kham ASANG ta" na: ru ngad: ra". Ai wa naonhaung" wa lo,pyo' pyo' mung: ngaui bau: ngaui lho" thug' byae: ako". Naonhaung" wa Israel mug: myid re nghang" ako".

⁷Naonhaung" kad' ra" ce: mau" zo" mathao mae nao re lhad' zo: mung: phyo' yu: pye' nae" byumyu" qejhao" ngo ab: pye' nae". Ngo wa nao re bin sho' phyo' qheim" pye' ruyang- nao wa byu damyu" maqo" boe" lo nae"- nao yao" mung"dan: ga" rure khonhae" re: maqo" lo: nae". Ailao" ngo ASANG ngad: rure nao ba: li" nae".

⁸Kho:kham ASANG ta" ra". Yuda wa gaja" byumyu" qe alhab' we' dakhyo: za: angad: ga: Moba ta" ra" mathao mae-

⁹Moba mug: kyo: re gye vha byid' ra" vomo" jham re khe' zin" ru qhug' nhao nae". Ai jham mae gai: thao" ra" vomo" jham Bed Yeshimod- Bala Meon we' Kiriathaim bobo: ako".

¹⁰Ngo wa ba thug' shad' din"pyad' yo mae" byumyu" qeyang Moba re Amon we' daga" khe' zin" aung: yu nae" akhang" byid' pye' nae". Aimung: Moba wa byu damyu" maqo" boe" lo nae".

¹¹Ngo wa- Moba re qobo dae byid: mung:- yao: bam wa- ngo ASANG ngad: rure ba: li" genae".

¹²Kho:kham ASANG ta" ra". Edom byu qe wa- Yuda re se' da: be, khyad' lage, phaug' mung: ai: lage, phaug' ru wa Edom dao mae khonhae" re: gang" tang: ra" qobo de; jo, nhao: ra".

¹³Ana" ngo wa- Edom re qobo dae byid: mung: aimae" byu yaug khao:ngo" we' gug'nyhug' dau: khao:ngo" re se' pye' nae" ein: ta" hau" ke' ra". Ngo wa ai re- Teman vomo" mae" Dedan vomo" joe" sho' cae: jhug tag kad' pye' mung:- vobyu qe wa gye poe mae se' pye' ru qhug' li" genae".

¹⁴Nga" byumyu" Israel qe wa nga" qhid' mae" Edom re lage, phaug' li" genae"- aimung: yao: bam wa Edom re nga" nho: nhag' yo" ru the' leim zo: nhao: li" genae". Edom wa nga" nho: lage, phaug' ru kham zo: yang khoru: mung: rure qo" ba: li" nae". Kho:kham ASANG ngo ta" to: va".

¹⁵Kho:kham ASANG ta" ra". Philisti qe wa yao: bam: ganhae" gaco' mae" gyevo xug' qere abe, akhyad' lage, phaug' mung: yao: bam: nghang: myid: yang yao: bam re phyo' qheim" pye' ako".

¹⁶Aimung: ngo wa- Philisti qere ngo khe' zin: mung: jhad' za: sham" pye' nae"- ngo ta" hau" na va". Ngo wa- ai: Philisti jao: gyu" mae na: dang: jo; ra" yaug khao:ngo" re phyo' qheim" pye' nae".

¹⁷Ngo wa yao: bam re dae xo sho' qobo dae byid: mung:- yao: bam re bin sho' lage, phaug' nae". Yao: bam wa nga" nho: nhag' yo" rure the' leim zo" li" genae". Ailao" yao: bam wa ngo ASANG ngad: rure ba: li" genae".