Read Maru EZEKELA 27 Bible Online

EZEKELA 27 - Maru bible

EZEKELA 27

¹ASANG wa ngo re ta" ra".

²Shid ba: ra" yaug we"-

³Ai: panglai: athao mae jo, mung: panglai: tham: yae khao:ngo" mae na: ra" byumyu" qe we' aung: zo: aung: shaug' phaga: mau" kad' ra" Ture qhid' mae" sushid nghaui"caung: wa,- kho:kham ASANG ta" na: ru yao: re ta" kyo: wa,- Ture we"- nao wa ni" nho: jab byang" ra" qu" yaung" lamyhung re phug: ra".

⁴Ni" yham wa panglai: ngad: ra". Nao re te" to: mo, wa nao re yaung" ra" sang pho dalam: we' dakhyo: zhaug' to" ako".

⁵Yao: bam wa Hermon bam mae" shaug' gae jham re sag' pye: qhag' ako". Lebanon bam mae" shaug' gae re ni" lha gau: pin: lung: taui: zang kad' ako".

⁶Yao: bam wa lha gau: nyhe' cae: kad' nae" qhid' mae" Bashan mae" shikhai gae jham re yu: ako". Yao: bam wa Kupru mae qhoje; re lha myid myhung: kad' ako". Aimung: ai re xao zaui: yang agyo: mae ke' ako".

⁷Ni" lha pin: cug' jham wa jid: mo" pin: phyu: yang kad' ru ngad: ra". Ai wa Egutu mae" thug' nag: shaung: to" ra" jid: mo" pin: ngad: ra". Aire va: mae" laui laui za: qo" ba: qu" xam" ra". Ni" nho: bao: zo: kham: anghoe' wa gai: thao" ra" pin" yang kad' to" ra". Kupru gagyo: kao" mae" khalhae: bu" nyhug pin: ngad: ra".

⁸Ni" nho: lha gau: mo, wa Sidon we' Arvad mae" mo, ngad: ako". Ni" nho: lha gau: byu qe wa jhao mo, ngad: ako".

⁹Qid sang pho zhaug' ra" lagsama qe wa- Bublo mae" nyang" za: mho" zhao: ci mo, ngad: ako". Pang:lai: khyo du" qin" ra" sang pho khao:ngo" mae" sang pho gau: mo, wa- ni" nho: sin: yham jham mae aung: zo: aung: shaug' phaga: mau" kad' ako".

¹⁰Persia- Ludia we' Libya mae" gyezo: qe wa ni" nho: gyetab mae mau" zaui" ako". Yao: bam wa yao: bam: go jham we' jo,to' maug jham re ni" gyetab zaung jham mae lhao" to" ako". Yao: bam wa- ni" qhid' mae" phungbao re aung: yu byid: mo, ngad: ako".

¹¹Arvad mae" gyezo: qe wa- ni" nho: vang khyae jham re lhaug' zaung" byid' ako". Gamad mae" byu qe wa ni" gyebyu zaung jham re lhaug' zaung" byid' ako". Yao: bam wa yao: bam: go jham re ni" nho: vang khyae jham mae lhao" to" ako". Yao: bam wa nao re yaung" sho' kad' byid: mo, ngad: ako".

¹²Nao wa Spain mung" mae phaga: mau" zaui: mung:- ngaui- jo,to- to' phyu we' xa wa ni" nho: magan: mago" aung: xan: jham: nho: aphug' ngad: ra".

¹³Nao wa Grece, Tuba we' Mesheg mae phaga: mau" kad' mung:- ni" aung: xan: jham: yang jeim qe we' gyid: bo" zai jham jho" tha" yu: ra".

¹⁴Nao wa Bed Togarma mae lhin" she myao:- gyekhe' myao: we' loze jham re vai: yu nae" qhid' mae" ni" xan: jham: re ye: aung" ra".

¹⁵Rhode mae" byu qe wa nao we' phaga: zai jho" tha" ako". Pang:lai:: tham: yae khaung: mae" byumyu" qe wa ni" nho: aung: xan: qhid' mae" nao re xao zaui we' sag' no, byid' ako".

¹⁶Suri mae" byu qe wa ni" nho: aung: xan: phaga: zai myo: sho' we' nao kad' thug' ra" zai jham re vai: yu: ako". Yao: bam wa- ni" aung: xan: ug' khug' qhid' mae" phug' de; laug nyug- khalhae: bu" nyug pin: gai- thug' nag: shaung: to" ra" zai- jhad' ra" jid: mo" pin:- panglai: laqhoe: we' phug' de; ra" laug sin" nae byid' ako".

¹⁷Yuda we' Israel wa ni" nho: jung: gaug- byoyhid- zhanlun xau we' xeim: nae pyo: cid' qhid' mae" ngaui byid' ako".

¹⁸Damasku mae" byu qe wa ni" aung: xan: jham we' nao kad' thug' ra" zai jham re vai: yu mung: ai: qhid' mae" Helbon mae" sabyi qang: we' Saha mae" sug' gug byid' ako". Yao: bam wa jo,to' jam: we' xeim: nae pyo: cid' re ni" aung: xan: jham we' jho" tha" ako".

²⁰Dedan mae" byu qe wa- myao: do: pin: cug' re- ni" nho: aung: xan: jham we' jho" tha" ako".

²¹Arabia byu qe we' Keda mug: mae" mung" zug: qe wa ni" nho: aung: xan: qhid' mae"- yao nau" jham- yao jham we' cad' be, jham byid: mung: jho" tha" ako".

²²Sheba we' Raama mae" phaga: byu qe wa ni" nho: aung: xan: jham: qhid' mae" phug' de; ra" laug jham- qhang we' gai: thao" ra" seim: nae pyo: cid' jham byid: mung: jho" tha" ako".

²³Haran- Kanne we' Edin vomo" jham Sheba mae" phaga: byu qe- Ashu vomo" we' Khilmad vomo" jham mae" phaga: byu qe alhab' mo, wa- nao we' phaga: ga" ako".

²⁴Yao: bam wa nao re- phug' de; ra" mai bau: jham- khalhae: bu" nyhug pin: we' bin: thug' tung" ru- anyhug gyai yaung" ra" mai myhung: jham we' nyang" za: sham" ra" taui: we' khyang sham" jham aung: byid' ako".

²⁵Ni" nho: aung: xan: jham re qi" thao" ra" zai tho sang pho jham mae tho: tai: ako". Nao wa panglai: mae" zai seim" zaui: to" ra" la" ra" zai tho qid sang pho we' dau: ra".

²⁶Ni" nho: lha kau: mo, wa nao re panglai: khyo jhui" thug' ye" lo" ra" au: ba thug' shad' mae" la hug' wa nao re va: mae" phyo' qheim" pye' ra".

²⁷Ni" nho: aung: xan: jo,nho" alhab' ni" nho: sang pho kau: mo, alhab' ni" nho: sang pho re zhaug' ra" lagsama jham alhab' we' ni" xan: aung: phaga: byu alhab'- sang pho khug mae" gyezo: alhab'- alhab' mo,- alhab' mo,- ni" sang pho byo; qeim: ra" au: panglai: mae byaug: lo" ako".

²⁸Qid mae nab: shid: lo" na: ra" sang pho kau: mo, hug' thoe jham wa panglai: qid yae mae lao thao tau" ra".

²⁹Sangpho khao:ngo" wa- ana" shapye' to: co' ru qhug' va"- Aimung: sang pho kau: mo, yaug khao:ngo" wa panglai: qid yae khyo lo" byaug va".

³⁰Yao: bam alhab' mo, wa- yao: bam: au: jham mae phalhug gag: sheim: mung: myimhab bam mae phaug' lhe' lang" jo; mung: ni" qhid' mae" kaug' ngug: ako".

³¹Yao: bam wa- ni" qhid' mae" ga: yao: bam: au: jham re myhaug' pye' ako". Aimung: yao: bam yao" gaung mae jid: mo" pin ve; ako". Yao: bam ngug: na: au: re yao: bam: aung khug nhag' lam: alokho" ako".

³²Yao: bam wa ni" qhid' mae" sushid nghaui" caung: re daga" dathoe za: caung" ako". Ture we' khag' re qo" tai" nae" i? Ana" panglai: mae tae" jo; ra" Ture we' khag' qo" tai" nae" i?

³³Ni" nho: aung: xan: jham panglai: kyo: ra" khyo ye" lo" au:- nao wa byumyu" khao:ngo" nho: qo ca" rure pyang" byid' ra".

³⁴Ana" nao wa panglai: mae byo; qeim: jo; ava". Nao wa panglai: tham: kao" khyo nab: vao lo" ava". Ni" nho: aung: xan: jham we' ni" qhid' mae" mau" zaui: byid: mo, alhab' wa- panglai: khug mae nao we' daga" byaug: lo" avako".

³⁵Pang:lai: tham: yae cao" yang: na: ra" yaug khao:ngo" wa- ni" au: pa re qhug' myao yang: din: mo; byaug: ako". Yao: bam: kho:kham qe lhao" re: gyaug: din: ako". Aimung: yao: bam: myo, khung: jham mae gyaug: ru de: de: myao: jo; ra".

³⁶Nao wa baui" byaug: ava"- apyad ato mae baui" byaug: ava". Aimung: mug: myid geim" mae" aung: zo: aung: shaug' phaga: byu qe wa gyaug: din: ako". Ni" nho: au: pa re boleim zo: nae" rure yao: bam gyaug: ako".