Read Maru EZEKELA 28 Bible Online

EZEKELA 28 - Maru bible

EZEKELA 28

¹ASANG wa ngo re jhau: ra".

²Shid ba: ra" yaug we"- Ture re eib: ra" zug: re- ngo kho:kham ASANG yao: re ta" na: ru ta" kyo: wa,- nao wa nga: qo" ru yang ngad beim: mung: naoyao" gaung re so ngad: ga: hau" ra". Nao wa so daso we' dakhyo: panglai: jham: yang lhang" kham" to" ra" kho:kham zaung tao" mae zaung: ga: nao ta" ra". Nao wa so daso ngad nhohab geim qo" kad' re qo" kad' nae"- ngadqere:- mangad: nao wa shid ba: ra"- Mao"So mangad:-

³Nao wa Daniela tho' pha,jhi" je: bo mung: pe" daja: re: nao mae" maqo" nghoe' nyham" to: ga: myid: ra".

⁴Ni" nho: pha,jhi" we' laba lajhao wa nao re qhang we' ngaui phug' de; zai jo,nho" qo" nhao: ra".

⁵Nao wa pha,jhi" nyan: bo: ra" phaga: mau" kad' mung: amyad jham xo' qho: na: ra". Nao wa ni" nho: jo,nho" zai jham: dao mae khoqhi" ngad beim" na: i?

⁶Aimung: ana" ceru wa kho:kham ASANG ta" na: ru ngad: ra". Nao wa so we' dakhyo: pha,jhi" bo: ga: myid: yu: ra" mathao mae-

⁷Ngo wa nao re khe' zin: genae" ra" abe, akhyad' gyevo jham re jhui" lo nae". Yao: bam wa- nao wa so qhi" pha,jhi" bo: ga: myid: jho: na: ruyang ni" nho: pha,jhi" we' laba lajhao: yang nao qo" yu: to" ra" qu" yaung" zai jham alhab' re phyo' qheim" pye' byid' li" genae".

⁸Yao: bam wa nao re se' pye' mung: qid jo, ra" lab khyo pye' khyo" ke' li" genae".

⁹Yao: bam nao re se' pye' nae" ga: li" ko" ra" au: re- nao wa so daso ngad: ein: ata" na shinae" i? Nao re se' nae" mo, we' qhug' ra" au:- nao wa shid ba: ru ngad mung: dajhid' re: Mao"So mangad: nae".

¹⁰Nao wa Mao"So maba: ra" taung bug byumyu" qenho: lo, khug mae lakha: dadau: we' dakhyo: shid: lo" li" nae". Ngo kho:kham ASANG amyin" byid' to: va".

¹¹ASANG wa ngo re dam: ta" ra".

¹²Shid ba: ra" yaug we"- Ture kho:kham re lao" na: ru ga" ra" au: pa qhid' mae" kaug' wa,- yao: re- kho:kham ngo ASANG ta" na: ru ta" kyo: wa,- nao wa ganhae" dalhang jab byang" ra" aso: gai dalam: ngad: lai: lo va". Nao wa khoqhi" pha,jhi" bo mung: khoqhi" sho' yaung" va" i?

¹³Nao wa Mao"So: khyae Edin mae na mung:- phug' de; laug aja: ja:- phug' de; laug sin" ne we' laug sin" phyu jham- Utaphya- Myedyoe- Jhaung- Nagatoe- Nila- Mya- Patamya laug ne jham re ve; ci: ra". Nao mae shaung: ve, nae" qhang zai jham qo" ra". Aijham wa nao re phan" phaug' lo" ra" ba na mae ni" qhid' mae" kad' to: byid' ru ngad: ra".

¹⁴Nao re lhaug' zaung" byid: nae" qhid' mae" qu" gyaug qu" lhaung sho' ra" mug: lagyo: dayaug re ngo nha: to: va". Nao wa nga" nho: gyang" lho" ra" bam mae na mung:- qhi qhi mung: ra" phug' de; laug jham: dao mae su" qin" co' ava".

¹⁵Nao wa nao re phan" phaug' to" ra" ba na mae"- makhyang: mashab: rure kad' qhid: lo sho' ni" nho: lo,mau" jham wa jab byang" lai: lo va".

¹⁶Nao wa zai aung: zai vai mau" myo" na mung:- ceru wa nao re aqan alan we' qobo khyo jhui" ye" lo" ra". Aimung: ngo wa nao re- nga" nho: gyang" lho" ra" bam mae" maqad maqui" khe' thug' ke' mung: nao re lhaug' zaung" lai: lo: ra" mug: lagyo: wa nao re qhi qhi mung: ra" phug' de; laug jham mae" va: khyo khe' ke' ava".

¹⁷Nao wa lamyhung yaung" ruyang ngad beim: mung:- ni" nho: lahau: qi" ru wa nao re kopyad' dayaug we' dakhyo: ave, kad' nhao: ra". Ceru: mathao mae- ngo wa nao re myid gaung khyo shapye' khyo" pye' mung: gatau: kho:kham qe: qhid' mae" nao re peim: byid' ra" aso: khyo" to: co' ra".

¹⁸Nao wa zai vai zai aung" ru mae airu: makhyang: mashab: ru kad' mung: ni" nho: Caung:pa" Yham wa ave, qeim: avako". Aimung: ngo wa ai: vomo" re myi: ngha" lhe' ke' mung:- aire myid gaung khyo nga" khyo" pye' va". Nao re qu" mo, alhab' wa- ana" nao myimhab boe" byaug: rure the' myao: ako".

¹⁹Nao wa baui" byaug va"- apyad ato mae baui" byaug va"- aimung: nao re loba: ko" ra" byumyu" alhab' wa- gyaug: din mung:- yao: bam wa ni" nho: au: pa re boleim zo: nae" ru myid: gyaug: ako"- ga: ta" ra".

²⁰ASANG wa ngo re ta" ava".

²¹Shid ba: ra" yaug we"- Sidon vomo" re qobo zhaug' ta" phoe: pye' wa,.

²²Aimae na: ra" byu qere yao: bam we' sin: yang:- ngo ASANG ta" na: ru ta" kyo: wa,- Sidon we"- ngo wa ni" nho: gyevo ngad: nao re ngo kad' ra" mau" mathao mae supe" wa ngo re caung" li" genae". Nao mae na: ra" mo, re ngo qobo dae byid' ra" khyo" yang ngo khoqhi" gyang" lho" ra" khyo re qhu" byid' ra" au:- ngo wa ASANG ngad: rure yao: bam ba: li" genae".

²³Ngo wa ni" dao mae no phyo: re nhao: ke' byid: mung: ni" nho: hau" mo" khyo jham mae sa: yug nhao nae". Nao re shad' khao:ngo" khyo" khe' zin" ru qhug' mung: ni" nho: byu qe wa se' pye' ru qhug' li" genae". Ailao" ngo ASANG ngad: rure naonhaung" ba: li" genae"- ga: ta" ra".

²⁴ASANG ta" ra". Israel re cejung" mung: qu" cae" ra" avai: ayae mae" byumyu" khoja: re: Israel re dae te' ra" zau: kyi we' zau: gae jham ru: khonhae" re: madam: boe" lo: genae". Aimung: ngo wa kho:kham ASANG ngad: rure yao: bam ba: li" genae".

²⁵Kho:kham ASANG ta" ra" ngo wa Israel byumyu" qere- byumyu" qe: phaung gaung: mae ngo khe' sin" to" ru mae" dam: jhui" tug' yu mung: byumyu" alhab' wa ngo gyang" lho" rure ba: li" genae". Israel byumyu" qe wa yao: bam yao" mug: myid: ga" ra" nga" daui daui yaug Yaku re ngo byid' to" ra" mug: myid: mae na: li" genae".

²⁶Yao: bam wa ai: jo, qo mae gug: gam taung" qo" na: li" genae". Yao: bam wa yham jham re zhaug' to: mung: sabyi khyae jham qo" kad' zo" na: li" genae". Ngo wa yao: bam re maphug' makhyad' jung" ko" ra" yao: bam: yham kyo: mung"dan: byumyu" qere ngo qobo dae byid: nae". Aimung: Israel wa gug: gam: li" nae". Ailao" ngo wa yao: bam: Mao"So ASANG ngad: rure yao: bam ba: li" genae".