Read Maru EZEKELA 29 Bible Online

EZEKELA 29 - Maru bible

EZEKELA 29

¹Ngonhaung" re pyaung" nha: to" ru daxe zin ein: zin lho" daxe khye' daxe: shid' ba: ba mae- ASANG wa ngo re jhau: ra".

²Shid ba: ra" yaug we"- Egutu kho:kham re qobo zhaug' ta" phoe: pye' wa,- yao: re yao: we' Egutu damung" geim: re khoru: qobo dae byid: qhug' genae" rure ta" kyo: wa,-

³Ceru wa ASANG kho:kham ngo Egutu re ta" na: ru ngad: rure ta" kyo: wa,- qid gyaung: mae lang" jo; ra"- khang" se" qi: nao we"- ngo wa ni" nho: gyevo ngad: lhe"- Nila qid gyaung: wa ni" mae" ngad: ai re nao kad' to" ru ngad: ga: nao ta" ra".

⁴Ngo wa ni" nho: ae khao: mae ngomyhad' te' to: mung: ni" nho: qid gyaung: mae" ngo: jham re nao mae kyin" de; jo; nhao nae". Ailao" ngo wa nao re ngo: jham alhab' kyin" de; jo; ru Nila qid gyaung: mae" phoe' thug' yu nae".

⁵Ngo wa nao we' ngo: alhab' re din"pyad' yo khyo shapye' ke' nae". Ni" nho: gaung wa myid gaung khyo gyo" lo" mung:- airu: shapye' to: co' nae". Ngo wa ai re ngho' jham we' gug'nyhug' jham re zo:ve khyo" byid: zho" pye' nae".

⁶Ailao" Egutu mae" byu alhab' wa ngo ASANG ngad: rure ba: li" genae". ASANG wa- Israel byumyu" qe wa bao" thaug' yu nae" nao Egutu re khug ngha: na: ako". Ngadqere: nao wa pyan" ra" vose: dakhe' tho' maje: gai ngad: ra".

⁷Yao: bam nao mae nga gelao" pyan" mung: nao gyug' lo" mung: yao: bam: lo,ce' khyaung: re thug' kyao" pye' ra". Aimung: yao: bam: dao kao" nai: sham" lo" nhao: ra".

⁸Aimung: ana" wa- shae pyang: jham: yang nao re khe' zin: nae" byu qere ngo qho: jhui" yu mung: yao: bam wa ni" nho: byu qe we' ni" nho: gug'nyhug' jham re se' pye' li" genae" ein:- ngo kho:kham ASANG ta" na: va".

⁹Egutu wa cae: jhug tag jo, qo boe" lo" li" nae". Ailao" ngo ASANG ngad: rure nao ba: li" nae". Nila qid gyaung: wa ni" mae" ngad: ai re nao kad' to" ru ngad: ga:- nao ta" ra" mathao mae-

¹⁰Ngo wa ni" nho: gyevo ngad mung: ni" Nila gyaung" nho: gyevo ngad:- ngo wa mug: am: shad' Migdo mae" mug: thao shad' Asvan joe" sho' Sudan mug: kyo: cao" yang: Egutu damang: geim" re cae: jhug tag jo, qo kad' pye' nae".

¹¹Xao su byu khag' dayaug re:- gug'nyhug' pe" dadau: re:- ai: khyo" su" lai: lo" nae" mangad:- byid xe zin geim" ai: mae pe" mana nae".

¹²Ngo wa Egutu re mug: myid dao mae" cae: jhug tag mung: thao" ra" jo, qo kad' pye' nae". Byid xe zin geim" Egutu vomo" jham wa byo; qeim: jo; ru mae- vomo" gaje: gu: byo; qeim: jo, ra" tho' je: xo: ru mae jo; jo; li" nae". Ngo wa Egutu mung" byu qere phao: khug: qin" mo, boe" nhao: pye' nae". Yao: bam wa mung"dan: khao:ngo" khyo phao: lo" mung: su: byumyu" qe: phaung gaung: mae na ca" li" genae"- ga: ta" va".

¹³Kho:kham ASANG ta" ra". Byid xe zin lai thao- ngo wa Egutu byumyu" qere khe' sin" nha: to" ra" byumyu" qenho: phaung gaung: mae" dam: khai: tug' jhui" yu mung:-

¹⁴Yao: bam re yao: bam: mug: xug' Egutu mug: thao shad' mae na nhao nae". Ai: jo, qo mae yao: bam wa qam: nang" ra" kho:kham mung"dan: boe" genae".

¹⁵Qam: nang" thao" ra" kho:kham mung"dan: boe" mung: yao: bam wa gatau: byumyu" qe dao mae khonhae" re: maqo" eib zo: lo: genae". Ngo wa yao: bam re pe" akhyag mangad' ra" byumyu" kad' pye' mung: yao: bam wa gatau: byumyu" qere yao: myid: o: ra" khyo" maqo" nghoe" she: yu nae".

¹⁶Israel wa bao" thaug' yu nae" qhid' mae" yao: bam re khonhae" re: madam: khug ngha lo nae". Egutu nho: au: pa wa- Egutu re khug ngha: ru khoqhi" shad' ga" ru Israel re ta" peim: byid' li" nae". Ailao" Israel wa- ngo ASANG ngad: rure ba: li" nae".

¹⁷Ngonhaung" re pyaung" nha: to" ru shid' xe: nhad' zin ein: zin lho" sao qhid' khye' lho" xin: daba: ba mae ASANG wa ngo re jhau: ra".

¹⁸Yao: wa- shid ba: ra" yaug we"- Babelon kho:kham Nebugkhaneza wa Ture re khe' zin" ava". Yao: wa- yao" nho: gyezo: qere yao: bam: au: yam" gyad mung: lo, sin jad sho' qola: jham vin nhao ngadqere: kho:kham pho" yao: re:- yao" nho: gyetab re: yao: bam qug khai: qhug' ru alhab' mae" pe" mathe' yu ngad: ako".

¹⁹Aimung: ana" ceru wa kho:kham ASANG ngo ta" na: ru ngad:- ngo wa Egutu mung" re kho:kham Nebugkhaneza re byid' na:- yao: wa Egutu re lanyab sham" yu mung: lhad' phyo' yu yang:- Egutu mung" jo, nho" alhab' re yao" nho: gyezo: qera" lho" khye' jhaung qhu" khyo" tai: phao: lo" li" nae".

²⁰Ngo wa yao: re yao" nho: okaung phug' khyo" Egutu mung" byid' pye' nae". Pe"mung:ga"re- yao" nho: gyetab wa nga" qhid' mae" mau" zaui: byid' na: ra". Ngo kho:kham ASANG ta" to: va".

²¹Airu boe" lo: ra" au: re- ngo wa Israel byumyu" qere qam: bo nhao mung:- ngo ASANG ngad: rure yao: bam ba nae" khyo: yaug khao:ngo" yang nao re the' gyo: nae" jo, qo mae nao Ezekela re jhau: thug' ke' nhao nae".