Read Maru EZEKELA 3 Bible Online

EZEKELA 3 - Maru bible

EZEKELA 3

¹Mao"So wa- shid ba: ra" yaug we"- ce: mug sug' dang: re zo: wa, ai mung: Israel qejhao" ye: mung: yejhau wa,-

²Aimung: ngo wa nga" nhad' re ho" ke' va". Aimung: yao: wa ngo re zo: nae" qhid' mae" mug sug' dang: re byid' ra".

³Yao: wa- shid ba: ra" yaug we"- nao re ngo byid' ra" ce:- mug sug' dang: re zo: wa,- ni" nho: vae: dug: re ai: yang ke' pyang" ci wa,- ga: ta" ra". Ngo wa ai re zo: mung: ai wa byoyhid we' dakhyo: cug: ra".

⁴Ailao" Mao"So wa- shid ba: ra" yaug we"- Israel byumyu" qejhao" ye: mung: nao re ngo ta" ru pe" ngadqere: yao: bam re ta" kyo: wa,-

⁵Ngo wa nao re qug' ra" gaja" myan" jhau: ra" byumyu" damyu" jhao" ye: nhao: ru mangad:- Israel byumyu" jhao" nhao: ke' ru angad:-

⁶Ngo qe nao re nao maba: gyo" ru qug' ra" gaja" myan" jhau: ra" byumyu" qejhao" nhao: ke' ngad: re yao: bam wa nao re tae" gyo" li" genaeva".

⁷Ngadqere: Israel byumyu" qemae" dayaug re: nao re manug: tae" gyo: genae". Yao: bam wa ngo re lhao" re: matae" gyo: byid: genae". Yao: bam alhab' mo, wa- sang: dang mung: gye phaug' kad' mo, ngad: ako".

⁸Ana" ngo nao re yao: bam we' dakhyo: sang: qao" sang: dang mung: qao nhao nae".

⁹Ngo wa nao re laug zang we' dakhyo: gang" tang nhao mung: phug' de; laug sin" we' dakhyo: qao nhao nae"- ai: tau: lhan: mo, re dagyaug-

¹⁰Mao"So wa xo' yang:- shid ba: ra" yaug we"- nao re ngo ta" ru ja: khao:ngo" re jhaug' za: gyo: mung: xam" ci wa,-

¹¹Ai: thao pyaung" nha: to: qhug' ra" ni" mung" byumyu" yao: cao: jhao" lo" mung:- yao: bam re kho:kham ASANG ngo ta" na: rure yao: bam gyo" re gyo: magyo" re magyo: ta" kyo: wa,- ga: ta" ra".

¹²Ailao" Mao"So: byo wa ngo re to' yu mung: nga" nhaung thao" shad' khyo mug:gaung tho' mae" ASANG: nho: phungbao re caung:khin" byid: ge,- ga: ta" ra" thoe qi: dathoe re the' gyo" ke'.

¹³Ngo wa- ai: gug'nyhug' jham: nho: daung jham mug: le; mae daung phab' myhang" ra" thoe we' lhin" ce' jham myang thoe re myid lab: lab' ra" qhi" myang thoe the' gyo"-

¹⁴ASANG: nho: kheim: so' wa nga" dao mae qam: mo" we' joe" li" mung: byo: yang ngore jhui" phao: lo" au: re ngo wa nhag' gyid' gyid' ru we' nhag' yo" ra".

¹⁵Aimung: ngo wa- pyaung" nha: to: qhug' mo, na: ra" Kheba qid gyaung: yae mae" Tel Abib khyo joe" li" va". Ai mung:- ngo the' myao: ru we' the' gyo" rure mug' yang: ai: jo, qo mae nhad' ba yena: jo, va".

¹⁶Nhad' ba lai lao"- ASANG wa ngo re-

¹⁷Shid ba: ra" yaug we"- ngo wa nao re Israel byumyu" nho: lhaug' yaug boe" nhao nae". Nao wa ngo: yang yao: bam re ta" peim" ra" dao: jham re yao: bam jhao" lhai: byid: ca" nae".

¹⁸Ngo qe nao re- makhyang: mashab: ru dayaug yaug shid nae" ru ta" hau: nhao ngadqere:- yao" khyo jham re tha" pye' mung: yao" kao so' re qo" khyad' yu nae" qhid' mae" nao mata" peim" ra" mathao mae qobo byu khyo" yao: shid: lo" ngad: re- yao" xao qug: nao re ngo vin nhao nae".

¹⁹Nao wa makhyang: mashab yaug re ta" peim: mung: yao: qe qobo shad' ru mathang: pye' ngad: re yao: qobo byu ngad shi" au: khyo" shid: lo" nae". Ngadqere: ni" kao so' wa loe, nae".

²⁰Gaigai: yao: gai yaug makhyang: mashab; mau" re kad' qhid mung: yao: re ngo gyaug ci" ca" ru mae nha: to" au: yao: re nao mata" peim: yang: ngad re yao: shid: lo" li" nae". Yao: wa yao" nho: qobo: ra" mathao mae shid: li" nae"- yao: kad' co' ra" gai: rure ngo maxam" to: byid: nae"- aimung: yao: shid: lo" ru qhid' mae" nao re xao au: vhin nae".

²¹Qobo makad' nae" qhid' mae" byugai dayaug re nao ta" peim: mung: yao: wa nao re tae" gyo: yang: qobo makad' ngad: re yao: qo" daui: na shinae". Aimung: ni" kao so' rere: tang" to: byid: nae"- ga: ta" ra".

²²Ngo wa kheim: so' qi" ra" ASANG: qhid' kheim: mae joe" na: ru the' gyo: mung: ngo re- to" mung: lao: khaung: khyo thug' ye: wa,. Nao re ngo ai: jo, qo mae dao: jhau nae"- ga: ta" rure the' gyo"-

²³Aimung: ngo wa lao: khaung: khyo thug' ye" lo" re Kheba qid yae mae ngo myao co' va" ru" ru ASANG: nho: phungbao re ai: jo, qo mae the' myao:- ngo wa myidgaung khyo lamhaung: lagoe, goe; lang" lo" va".

²⁴Ngadqere:- Mao"So: byo wa nga" khug khyo vao lo mung: ngo re tau: yhe' ke' ra". ASANG wa ngo re- yham khyo phao: lo" mung: nao yao" gaung re yham khug mae lo" pyid' laung" jo, wa,-

²⁵Shid ba: ra" yaug we"- nao yao" gaung re taui: jham: yang taui" to: mung:-nao wa su: phaung khyo maqo" thug' na: qin" nae" ngad: ra".

²⁶Ce: tau: lhan" ra" byumyu" qere nao maqo" ta" peim: nae" qhid' mae" ngo wa ni" nho: sho re shid: byaug nhao: pye' nae".

²⁷Ai: thao ngo wa nao re dao: dam: jhau: ke' mung: dao: jhau nae" kheim: so' dam: byid' ke' lao"- nao wa- kho:kham ASANG ngo ta" na: ru yao: bam re qo" ta" kyo: nae" ngad: ra". Yao: bam mae" daqhae: wa tae" gyo" li" genae". Ngadqere: damyo" gu: wa nao re pe" xan: masun" li" genae"- pe"mung:ga"re yao: bam wa tau: lhan ra" byumyu" ngad: ako"- ga: ta" ra".