Read Maru EZEKELA 30 Bible Online

EZEKELA 30 - Maru bible

EZEKELA 30

¹ASANG dam: jhau: ra".

²Shid ba" ra" byu we"- lapa pa mung: ngo kho:kham ASANG ta" na: rure hau" kyo: wa,- nao wa ce: dao: kheim: jham re hug' ta" ca" nae". Gyaug din: ra" ba na joe" li" na: ava".

³ASANG: lo, mau" zaui: nae" ba na wa jhao" li" ava". Ai ba na wa byumyu" qe qhid' mae" nhag' qhid' thaui: we' qug khai: qug: khai: ra" ba na ngad: ra".

⁴Egutu mae mang: zin" li" genae". Aimung: Ethiopia mae gyai qam: shan nhag' ngai: ru boe" nae". Egutu mae" myo: sho' mo, wa se' pye' ru qhug' genae". Ai: mung"dan: wa paui: pye' ru qhug' mung: byo; qeim jao: jham mae to: co' li" genae".

⁵Ai: gyekhe' poe wa Ethiopia- Ludia- Libya- Arabia we' Kub mae" we' ngoyao" byumyu" mae" lhao" re: bobo: mung: lhaung: to" ra" gyezo: jham re se' pye' li" nae".

⁶ASANG ta" ra". Mug: am: shad' Migdo mae" mug: thao shad' Asvan joe" sho' Egutu nho: gye vha byid mo, alhab' re phyo' qheim" pye' nae". Ngo ASANG ta" to: va".

⁷Ai: mug: myid wa mug: myid geim" mae cae: jhug tag thao" ra" jo, qo boe" lo: li" nae". Aimung:- ai: nho: vomo" jham wa bin sho' byo; qeim: jo; ru mae shapye' to: qhug' li" genae".

⁸Egutu re ngo myi: ngha" ke' ra" au: yao" nho: gye vha byid: mo, alhab' se' pye' qhug' lao"- yao: bam wa ngo ASANG ngad: rure ba: li" genae".

⁹Ai: ba na joe" lo mung: Egutu re phyo' qheim" pye' ra" au:- ngo wa- Ethiopia mae" myid: lao" na: ra" mo, re lhau: zhung: nae" lagyo: qere qid sang pho jham mae nhao: ke' nae". Ai: ba na wa joe" li" na: ava".

¹⁰Kho:kham ASANG ta" ra". Ngo wa- Egutu nho: jo,nho" re thao" byaug nhao nae" qhid' mae" Babelon kho:kham Nebugkhaneza re ci yhung: nae".

¹¹Yao: we' yao" nho: abe, akhyad' gyetab wa li" mung: ai: mug: re phyo' shao: pye' li" genae". Yao: bam wa shae pyang: jham: yang Egutu re khe' zin: mung: ai: mug: myid wa sushid mao jham byang" jo; li" genae".

¹²Ngo wa Nila qid gyaung: re kin" ho: lo" nhao mung: Egutu re makhyang: mashab mo, nho: kheim: so' qao: mae to" pye' nae". Taungbug byu qe wa ai: mung" geim" re phyo' sin" pye' li" genae". Ngo ASANG ta" to: va".

¹³Kho:kham ASANG ta" ra". Ngo wa Memphi mae" solho jham we' so apyag' jham re phyo' qheim" pye' nae". Egutu nho: dao mae eib zo: nae" khag' re: mana genae". Aimung: ngo wa byu alhab' re kyaug' tin" nae".

¹⁴Ngo wa- Egutu mug: thao shad' re cae: jhug tag kad' pye' mung:- mug: am: shad' mae" Zoan vomo" re myi" yang ngha" pye' nae". Ngo wa vomo" zang Thebe re qobo dae byid: nae".

¹⁵Ngo wa Egutu nho: qi" qhang: gang" tang: thao" ra" gyetab vang Pelusium vomo" re nga" nhag' jam: yo" ru the' leim: zo: nhao nae". Ngo wa Thebe nho: jo, nho" re phyo' qheim" pye' nae".

¹⁶Ngo wa Egutu re myi: ngha" ke' mung: Pelusium wa khyag' qhui: ru kham zo" li" nae". Thebe vang khyae bao jham wa byo; gyo" lo" genae". Aimung: ai: vomo" wa qid: yang je" nhai" pye' ru qhug' li" nae".

¹⁷Heliopoli we' Bubasti vomo" jham mae" zolau: qe wa gyekhe' jao: mae shid: shao" li" genae". Aimung: gaje: gu: re wa thaung: byu khyo" taung" jhui" lo" ru qhug' genae".

¹⁸Egutu nho: kheim: so' re ngo khyug' pye' mung: yao: bam phug: na: ra" qam: re thao" nhao: pye' au:- Taphanhe mae mug: cad' gyo" nghoe' byaug nae"- Egutu mae jham dathaui: nghoe' jo, mung: yao" nho: vomo" alhab' mae" byu qe wa thaung: byu khyo" taung" jhui" lo" ru qhug' li" genae".

¹⁹Egutu re ngo ceru: qobo dae byid' ra" au:- ngo ASANG ngad: rure yao: bam ba: li" genae"- ga: ta" ra".

²⁰Ngonhaung" re pyaung" nha: to" ru dexe: dazin ein: zin lho" sao qhid' khye' nhad' ba ein: ba mae- ASANG ngo re jhau: ra".

²¹Shid ba: ra" yaug we"- ngo wa Egutu kho:kham nho: lo, pau" re khyug' pye' byid: va". Airu re shae pyang: dam: qo" zaui: sho' no gai mung: qam: bo: lo nae" qhid' mae" pin: cug' khag' yang mathab' byid: lo,vin pyi" re: khag' mavhe' byid: ngad: ako".

²²Aimung: ana" ceru wa- kho:kham ASANG ngo ta" na: ru ngad: ra". Ngo wa Egutu kho:kham nho: gyevo ngad:- ngo wa yao" lo,pau" shid' shad' geim"- gai: ra" shad' we' bin: gyug' jo, va" lo, re khyug' pye' byid: nae". Aimung: yao" lo, mae" shae pyang: byid: gyo" lo" li" nae".

²³Ngo wa Egutu byumyu" qere mug: myid: jao: sho' khyo khe' sin" ke' nae".

²⁴Ailao" ngo wa Babelon kho:kham nho: lo,pau" re qam: bo nhao mung: nga" nho: shae pyang: re yao" nho: lo, mae ke' byid: nae". Ngadqere: ngo wa- Egutu kho:kham nho: lo,pau" re khyug' pye' byid: nae". Aimung: yao: wa yao" nho: gyevo: nho: qhid' kheim: mae no kyang: kyang" shid: lo" li" nae".

²⁵Ngad va"- ngo wa yao: re qam: nang: nhao mung: Babelon kho:kham re qam: bo nhao nae". Ngo wa yao: re nga" nho: shae pyang: byid: mung: yao: wa ai re Egutu shad' khyo qang: ke' au: ngo ASANG ngad: rure yaug khao:ngo" ba: li" genae".

²⁶Ngo wa Egutu byumyu" qere mug: myid jao: sho' khyo khe' sin" ke' nae". Ailao" ngo ASANG ngad: rure yao: bam ba: li" genae".