Read Maru EZEKELA 31 Bible Online

EZEKELA 31 - Maru bible

EZEKELA 31

¹Ngonhaung" re pyaung" nha: to: qhug' ru daxe: dazin ein: zin lho" sam khye' ein: khye' lho" xin: sao qhid' daba: ba mae- ASANG wa ngo re dao: jhau: ra".

²Shid ba: ra" yaug we"- Egutu kho:kham we' yao" nho: byu alhab' re ta" wa,- Nao wa khoqhi" kheim: so' qi" i? Nao re ngo pe" we' qo" tau" nae" laug i?

³Nao wa Lebanon mae" shaug' gae we' dau: ra". Ai: shaug' gae wa yaung" ra" sag' kaung jham mae" aqab qo" mung: jham thaui: jham re lhao" joe" myhi sho' myhao: ra".

⁴Airu re yaug: qi" li" nhao: ra" qid jo; ra". Aimung: airu re khau nae" qhid' mae" myid gaung khug mae qid gyaung: jham jo; ra". Aigu: wa sag' gae yaug: qi" li" na: ra" jo, qo mae qid byid' ako". Aimung: sag' mo" yo mae sag' gae jham alhab' khyo qid zo: gyaung: jham yug: lo" nhao: ke' ako".

⁵Airu wa qid nyang" za: qo" rumung: ai wa gatau: sag' gae jham tho' je: yaug: myhao: li" ra". Yao" nho: sag' kaung jham wa qi: mung: qhang: ako".

⁶Ngho' ja: khao:ngo" wa- yao" nho: akaung jham mae ngho' sad' jham sad' ako". Seyo: gug'nyhug' kyao jham wa ai: sag' qab qao: mae yao: bam: anau" jham re xao" ako". Mug: myid mae" byumyu" qe wa ai: nho: sag' qab mae thang: no" ako".

⁷Ai: sag' gae wa khoqhi" za: yaung" i? Airu" ra" sag' kaung jham we' khonho" myhao: i? Yao" nho: sag' gyi: jham wa myid gaung khug mae" qid gyaung: zo: jham khyo cin" vao lo" ako".

⁸Mao"So: khyae mae" pe" nam: shaug' gae re: ai we' maqo" tau" ngad: ra". Pe" qhoje; phyu dagae re: airu" ra" sag' kaung made; qu" ngad: ra". Pe" sag' yaung" gae re: airu" sag' kyao made, ngad: ra". Mao"So: khyae mae" pe" daja" sag' gae re: aiqhi" mayaung" ngad: ra".

⁹Ngo wa ai: rure sag' kaung jham ko' byo: lo" nhao mung: yaung" sho' kad' va". Ai: ru wa Mao"So: khyae Edin khug mae" sag' gae khao:ngo" wa myo, qu" nyad taung" boe" jo, va".

¹⁰Aimung: ana" ngo- kho:kham ASANG wa- ai: jham thaui: khyo joe" myhi: do, lo" sho' myhao: ra" sag' mo" zang mae pe" boe" lo nae" ru nao re ta" kyo: nae". Ai: ru wa je: yaug: myhao: li" re je: ngad beim" lo: ra".

¹¹Aimung: ngo wa ai re ngag: lhaui" pye' mung: taung bug: mang: mae" zug: dayaug re sang: pye' nhao va". Yao: wa ai: sag' gae re yao: yao" makhyang: mashab: ru we' man: qi" ru byid' li" nae".

¹²Abe, akhyad' mung: ra" taung bug: byu qe wa ai re thau: lhang" to: co' li" genae". Ai: nho: sag' kaung jham we' gyug' gyo" ra" sag' kyao jham wa bam khao:ngo" dao mae we' mung"dan: mae" lao: khaung: khao:ngo" mae gyo" li" genae". Ai: sag' gae aqab khug mae na: lai: lo: ra" byumyu" alhab' wa phao: lo" li" genae".

¹³Ngho' jham li" mung: gyang: gyo" jo; ra" sag' gae mae li" thoe: zo: genae". Aimung: seyo: gug'nyhug' kyao jham wa ai: nho: sag' kaung jham: adao khyo" su" lai: lo" li" genae".

¹⁴Aimung: ana" mae" thao phyao:- pe" sag' gae ngadqere:- khonho" qid nyang" za: qo" ngadqere:- ai: gae qhi" dam: mayaug: qi: lo: nae"- ai: nho: sag' shao" re: jham thaui: khyo yaug: kyao" lo" sho' mamyhao: do, lo" lo: genae". Aijham alhab' wa shid ba: ra" yaug qe we' dakhyo: shid: lo" nae" byuxa: voqoe, qhug' mung: movo: mug: khyo gyo" lo" mo, we' daga" na: qhan" lo" li" genae"- ga: ta" ra".

¹⁵Ceru wa- kho:kham ASANG ta" ru ngad: ra". Ai: sag' gae movo: mug: khyo gyo" lo" ra" ba na mae- ngo wa kaug' qhui: ra" aso: khyo" ai re myid gaung khug mae" qid: yang nhai" nghoe' pye' nhao nae". Ngo wa qid gyaung: jham re tam" to: mung: qid zo: gyaung: myo: sho' mayug nhao nae". Ai: sag' gae wa shid: byaug va" ruyang ngo wa Lebanon bam jham: nho: adao mae mug: cad' ru yu: lo byid: mung:- sag' mo" yo mae" sag' gae jham alhab' re kyaug' shid: byaug nhao nae".

¹⁶Ngo wa ai re movo: mug: khyo khyo" ke' ra" au:- airu: gyang: gyo" lo" ra" thoe wa byumyu" qe re laui" nan" nhao: li" nae". Edin mae" sag' gae alhab' we' Lebanon mae" movo: mug: khyo gyo" lo" byaug: ra" gai: thao" ru we' qid nyang" za: qo" ra" sag' gae alhab' wa- ai: ru gyang: gyo" lo" rure qu" ngaui: li" genae".

¹⁷Yao: bam wa no' mae" gyang: gyo" lo" bam va" mo, we' lo" boqhan: nae" qhid' mae" yao: we' daga" movo: mug: khyo cao: gyo" lo" li" genae". Aimung: yao" nho: sag' qab khug mae na: ra" mo, alhab' we' byumyu" qe: phaung gaung: khyo khe' sin" pye' ru qhug' li" genae".

¹⁸Ai: sag' gae wa Egutu kho:kham we' yao" nho: mung" byu alhab' mo, ngad: ra" Edin mae" sag' gae jham lhao" re: aiqhi" mamyhao- mamaung" ngad: ako". Ngadqere: ana" kam" wa- Edin mae" sag' gae jham we' dakhyo: airu wa movo: mug: khyo gyo" lo" mung:- Mao"So maba mo, we' gye poe mae shid: lo" mo, jhao" lo" bobo: li" nae". Ngo wa ta" to: va" ga:- kho:kham ASANG ta" ra".