Read Maru EZEKELA 32 Bible Online

EZEKELA 32 - Maru bible

EZEKELA 32

¹Ngonhaung" re pyaung" nha: to" ru daxe: shid' zin ein: zin lho" daxe" shid' khye' lho" xin: daba: ba mae- ASANG ngo re dao: jhau: ra".

²Yao: wa ngo re- shid ba: ra" yaug we"- Egutu kho:kham re jhaug' za: ta" peim: wa,- yao: re ngo mae" ce: lau dao: re ta" kyo: wa,- nao wa byumyu" qenho: phaung gaung: mae khang khyi dadau: we' dakhyo: na: qhu" ra". Ngadqere: nao wa- qid gyaung: mae khao" pag' qin" ra" khang" se" dadau: we' yaug: aje: dau: ra". Nao wa ni" nho: khyid jham: yang qid re tham: bab: lhau: nhan mung: qid gyaung: jham re daug daug moe nhao: ra".

³Byumyu" myo: sho' zang" ham: lo: au: ngo wa nao re nga" nho: geim mae taung" yu mung:- yao: bam: yang geim re gyagao: yo khyo she: khyad' nhao nae".

⁴Ngo wa nao re taung gaung mae she: thug' to: mung:- mug: myid mae" ngho' jham alhab' we' gug'nyhug' jham alhab' yang nao re ceim" phyo' zo" pye' nhao nae".

⁵Ngo wa bam jham we' lao: khaung: jham re ni" nho: shid bab maogaung: yang nghoe' pye' nae".

⁶Ngo wa ni" sa: re vhe' yhug' ke' mung: ai wa bam jham re nhai" byaug mung: qid zo: gyaung: jham mae byang" sho'- vhe' yhug' ke' nae".

⁷Nao re ngo phyo' qheim" pye' au:- ngo wa mug:gaung re nghoe' to: mung: kyi jham re jhad' sad' paui" pye' nae". Ba wa jham thaui: jham: nho: nhaung thao" shad' mae vho' jo, mung: lho" wa bo" bao re mabyid: lo: nae".

⁸Ngo wa mug: kin mae" bo" bao alhab' re se' pye' mung: ni" nho: mug: myid re mug: cad' yo khyo pye' khyo" ke' nae". Ngo kho:kham ASANG ta" to: va".

⁹Ngo wa ni" nho: byo; qeim: ra" lau dao: re nao khonhae" magyo" qu" ra" mung"dan: jham khyo hau" pyo: ke' ra" au:- byumyu" myo: sho' wa sang: gyo" kho" li" genae".

¹⁰Ngo: yang nao re kad' ke' ra" mau" zo" wa byumyu" myo: sho' re din: mo, byaug nhao: li" nae". Ngo wa nga" nho: shae pyang: re vhag' ke' au:- kho:kham jham wa ko,ko, gyaug: nin" li" genae". Nao gyang: gyo" lo" ra" ba na mae yao: bam alhab' mo, wa yao: bam yao" kao so' qhid' mae" gyaug: nin" li" genae".

¹¹Kho:kham ASANG wa Egutu kho:kham re ta" ra". Nao wa Babelon kho:kham nho: shae pyang: qhug' leim zo" li" nae".

¹²Ngo wa- abe, akhyad byumyu" qemae" gyezo: qere yao: bam: shae pyang: jham phoe' nhao mung: ni" byu qe alhab' re se' pye' nhao nae". Ni" nho: byu alhab' mo, we' nao ngad beim: mung: phug' ra" zai gatau alhab' re phyo' qheim" pye' nae".

¹³Ngo wa qid yae khao:ngo" mae na: ra" ni" nho: nung: jham alhab' re se' pye' byid: nae". Qid re tham: bab: lhau: nhan nae" nung: re:- gug'nyhug' re: mana lo nae".

¹⁴Ngo wa ni" nho: qid re dang: jo, nhao mung: gyang: gyang: za: boe" nhao nae"- ni" nho: qid gyaung: jham re yo yo yug nhao nae". Ngo kho:kham ASANG ta" to: va".

¹⁵Ngo wa Egutu re cae: jhug tag jo, qo kad' pye' mung: aimae na: ra" byu alhab' re phyo' qheim" pye' au:- ngo ASANG ngad: rure yao: bam ba: li" genae".

¹⁶Ce: jhaug' zaug: ra" ta" peim: dao: wa sushid nghaui" caung: boe" lo: li" nae". Byumyu" qemae" myiqe: qe wa ai re Egutu we' ai: nho: byu alhab' qhid' mae" caung" li" genae". Ngo kho:kham ASANG ta" to: va".

¹⁷Ngonhaung" re pyaung" nha: to" ru daxe: shid' zin ein: zin sao qhid' mae" lho" khye' daxe: ngo" ba: ba mae- ASANG wa ngo re dao: jhau: ra".

¹⁸Shid ba: ra" yaug we"- Egutu mae" byu myo: sho' qhid' mae" kaug' ngug wa,- yao: bam re kheim: so' qo" ra" gatau: byumyu" qe we' daga" movo: mug: khyo khyo" ke' wa,-

¹⁹Yao: bam re ceru: ta" wa,- nao wa nao yao" gaung re gaje yaug khao:ngo" tho' je: yaung" ein: myid: jho i? nao wa movo: mug: khyo gyo" lo" mung: ai: jo, qo mae Mao"So maba mo, we' daga" lang" jo; li" nae".

²⁰Egutu byu qe wa gye poe mae se' pye' qhug' ra" mo, we' daga" gyang: lang" lo" li" genae". Shae pyang: dakhyae: wa- yao: bam alhab' re se' pye' nae" jin" jin" ngad: jo,ava".

²¹Boe" thao" ra" sulhe: jham we' Egutu byu qe: shad' gye bokhe' mo, wa Egutu byu qere movo: mug: khyo tug: pang" vhao" yu: ako". Yao: bam wa- gye poe mae se' pye' qhug' ra" Mao"So maba mo, ce: khyo gyo" lo: ako". Aimung: yao: bam cemae lang" jo; ako"- ga: hug' ako".

²²Asuri wa ai: mae yao" gyezo: qenho: lab khung: jham lhang" kham" to: mung: jo; jo; ra". Yao: bam alhab' wa gye poe mae se' pye' ru qhug' ako".

²³Aimung: yao: bam: lab khung: jham wa movo: mug: mae" no; thao" ra" jo, qo mae jo; jo; ako". Yao" nho: gyezo: qe alhab' mo, wa gye poe mae gyo" mung: yao: bam: lab khung: jham wa yao" nho: lab re lhang" kham" to" ako". Ngadqere:- yao: bam wa daui na mo; mug: re qhid' phyao: dalhang kyaug' tin" lai: lo: avako".

²⁴Elam wa ai: jo, qo mae yao" nho: gyezo: qenho: lab khung: jham lhang" kham" to: mung: jo; jo; ra". Yao: bam alhab' wa gye poe mae se' pye' ru qhug' gemung:- yao: bam wa au: qid lhai: khyo makham: yu: ru movo: mug: khyo gyo" vao lo" ako". Daui: na: au: re yao: wa khyi" khao:ngo" kyaug' tin" lai: lo: ako". Ngadqere: ana" wa yao: bam shid lang" jo, mung: nga: yeim: ako".

²⁵Elam wa gyepoe mae se' pye' qhug' mo, we' daga" lang" jo; ra". Aimung: yao" gyezo: qenho: lab khung: jham wa yao" nho: avai: ayae mae lhang" kham" jo; ako". Yao: bam alhab' mo, wa au: qid lhai: khyo makham: yu mung: gye poe mae alhab' se' pye' qhug' ako". Daui: na: au: re yao: bam wa khyi" khao:ngo" cao" kyaug' tin" ako". Ngadqere: ana" kam" wa- gyepoe mae se' pye' qhug' mo, we' daga" yao: bam shid: lang" jo; mung: nga: yeim: avako".

²⁶Mesheg we' Tuba wa- yao: shid' zo" gyezo: qenho: lap lhang" kham" yang ai: mae jo; jo; ako". Yao: bam alhab' mo, wa au: qid lhai: khyo makham: yu mung:- gye poe mae alhab' mo, se' pye' qhug' ako". Ngadqere:- qhid' phyao: dalhang yao: bam wa daui: na mo, re kyaug' tin" lai: lo: ako".

²⁷Yao: bam wa- ganhae" gaco' pyad mae" sulhe: qere gyezai jab jab we' daga" yao: bam: shae pyang: jham re yao: bam: au: lam: agyid' mae to:- yao: bam: go jham re yao: bam: gaung dao mae kai: mung: movo: mug: khyo nyab' pye' ru we' dakhyo: nga: qo" ra" khyo" nyab' ru mathe' kham: yu ngad: ako". Ce: sulhe: qe wa- qhid' phyao: dalhang daui: na mo, re qo" kyaug' tin" nae" qhi" kheim: so' qi: mo, ngad: ako".

²⁸Airu wa- gye poe mae se' pye' qhug' ra" au: qid lhai: khyo makham: yu mo; phaung gaung: mae Egutu qe khoru: gyoe; lang" jo; bam nae" khyo ngad: ra".

²⁹Edom wa ai: jo, qo mae yao" nho: kho:kham jham we' zug: ade, qe we' daga" jo; jo; ra". Yao: bam wa kheim: so' qi" ra" gyezo: qe ngad: lai: lo: avako". Ngadqere:- ana" yao: bam wa- gye poe mae shid: lo" ra" au: qid lhai: khyo makham: mo, we' daga" movo: mug: mae lang" jo; ako".

³⁰Mug: am: shad' mae" kho:kham nau" qe alhab' wa ai: mae jo, bam mung:- ai: mung: Sidon byu qere: airu: jo; jo; ako". Ganhae" dalhang- yao: bam: kheim: so' wa khyi" khao:ngo" cao" kyaug' tin" qin" ako". Ngadqere: ana" yao: bam wa- gye poe mae se' pye' qhug' mo, we' daga" nga yeim: taung" movo: mug: khyo gyo" lo" mung:- au: qid lhai: khyo makham: yu: ru thang: na: nae" lao" to: qhug' ako". Yao: bam wa movo: mug: khyo gyo" lo" mo, we' dakhyo: za: nga: boyeim: ako".

³¹Gye poe mae se' pye' ru qhug' ra" cebam re the' myao: ru yang- Egutu kho:kham we' yao" nho: gyetab wa nhag' tang" ru qo" yu: li" genae"- ga: ASANG kho:kham ta" ra".

³²Ngo wa Egutu kho:kham: yang daui: na mo, re kyaug' tin" nhao va". Ngadqere:- yao: we' yao" nho: gyetab alhab' wa- gye poe mae shid: lo" ra" au: qid lhai: khyo makham: mo, we' daga" mhao" to: qhug' li" genae". ASANG kho:kham ta" to: va"- ga: ta" ra".