Read Maru EZEKELA 33 Bible Online

EZEKELA 33 - Maru bible

EZEKELA 33

¹ASANG wa ngo re jhau: ra".

²Shid ba: ra" yaug we"- mung"dan: dalam: khyo ngo mang: zin: poe joe" nhao: ra" au: pe" mung: ru ni" byumyu" re ta" kyo: wa,. Ai: mung"dan: mae" byu qe wa vogaung: lhaug' yaug boe" nae" qhid' mae" dayaug re lhaung" khyin: ako".

³Yao: wa gyevo te' li" na: rure the' myao lao"- yaug khao:ngo" re peim: nae" qhid' mae" peim: thoe kyo" ke' ra".

⁴Dayaug yaug wa ai re the' gyo: ngadqere:- pe" shui manho lo: na mung: gyevo li" mung: yao: re li" se' pye' re- ai: yaug shid: ru wa yao: yao: re qobo zhaug' nae" ang: ra".

⁵Yao: shid: ru wa- yao: yao" qobo ngad:ra". Pe"mung:ga"re- yao: wa ta" peim" rure pe" xan: masun: gyo" lhaui" pye' ra". Yao: qe nyang" za: tae" gyo" ngad: re yao: wa qo" phao: loe, nae" za: ngad: ra".

⁶Ngadqere:- vogaung: lhaug' yaug wa gyevo li" na: rure the' myao mung: gye peim: thoe makyo" ke' ngad: re- gyevo wa li" mung: ai: qobo byu qere se' pye' li" genae". Ngadqere:- yao: bam shid: lo" ra" xao qug: re ai: vo lhaug' zaung" yaug re ngo vhin nae".

⁷Shid ba: ra" yaug we"- ana" ngo wa nao re Israel byumyu" dao mae lhaug' zaung" yaug khyo" san: to: nae". Nao wa ngo nao re byid' ra" ta" peim" rure yao: bam jhao" ta" lhai: ke' byid: ca" ra".

⁸Ngo qe nao re- makhyang: mashab yaug dayaug shid nae" ru ta" hau: nhao ngadqere: yao" khyo jham re tha" pye' mung: yao" kao so' re qo" khyad' yu nae" qhid' mae" nao mata" peim" ra" mathao mae qobo byu khyo" yao: shid: lo" ngad: re- yao" xao qug: nao re ngo vin nhao nae".

⁹Nao wa makhyang: mashab yaug re ta" peim: mung: yao qe qobo shad' ru mathang: pye' ngad: re yao: qobo byu ngad shi" au: khyo" shid: lo" nae". Ngadqere: ni" kao so' wa loe, nae".

¹⁰ASANG wa ngo re jhau: ra". Shid ba: ra" yaug we" Israel qe yao: bam khoru: ta" na: rure gaui cao" ta" wa,- ngonhaung" wa ngonhaung" nho: qobo jham we' ngonhaung" kad' ra" shad' ru jham: yang qo la" jo; bam va". Ngonhaung" wa na: jeim" lo" na va". Ngonhaung" khoru: qo" daui: na nae" laug i? ga" rure paug' ta" wa,-

¹¹Kho:kham ASANG ngo wa- daui: na: ra" Mao"So ngad- qobo byu dayaug shid: lo" rure maqu" ngaui ga" rure yao: bam re ta" kyo: wa,- yao: wa qobo shad' rure thang: pye' mung: kao so' daui na: rure ngo je: myid: o: ra". Israel we"- nao kad' na: ra" makhyang: mashab: rure thang: pye' wa,- nao pe" mung: shid: nug: i?

¹²Shid ba: ra" yaug we"- ana" byugai dayaug wa qobo shad' ngad: re- yao: kad' lai: lo: ra" mau" wa yao: re maqo" khyad' yu nae" ein: Israel byumyu" re ta" kyo: wa,- makhyang: mashab yaug dayaug qobo shad' rure thang: pye' ngad: re yao: wa qobo dae byid' ru maqhug' nae". Aimung: byugai dayaug qe qobo shad' qhid: ngad: re yao" nho: kao so' re matang" to: nae".

¹³Ngo wa byugai dayaug re kao so' dao:so: byid' to: ngad sho' qere:- yao: wa lai: lo va" ayo, mae" yao" nho: gai: ru wa ga" va" ga: myid: qhid: li" mung:- qobo shad' qhid: ngad: re- ngo wa yao: kad' lai: lo: ra" gai: ru daja: rere: mamyid: beim: lo: nae". Yao: wa yao" nho: qobo jham: mathao mae shid: li" nae".

¹⁴Ngo wa qobo byu dayaug re shid nae" ein: ta" peim" to: ngad sho' qere:- yao: wa qobo shad' rure thang: pye' mung: jo: ru we' gai: rure kad' qhid: lo: ngad: re-

¹⁵Dao: tau"- yao: wa ngaui jhid' byid' ru qhid' mae" yu: to" ra" zai re dam: tug' byid' ngad: re- mangad: lao"- yao: khug' yu: to" ru re dam: tug' byid' ngad: re- yao: wa qobo shad' rure thang: pye' mung: kao so' byid' ra" tarha" jham re cao " ngad: re- yao: wa mashid lo: qo" daui: na: li" nae".

¹⁶Ngo wa yao: shad' lai: lo va" qobo jham re khyad' pye' byid: mung:- yao: wa kao so' daui: na: li" nae". Pe"mung:ga"re yao: wa jo: ru we' gai: rure kad' ra".

¹⁷Aimung: ni" nho: byu jham wa ngo kad' ru majo ngad: ra" ga: ta" ako". Mangad:- majo: ru wa yao: bam: khyo she, angad: ra".

¹⁸Din:man" ra" byu dayaug wa gai: ru kad' rure thang: pye' mung: makhyang: mashab: ru kad' qhid: li" ngad: re- yao: wa ai: mathao mae shid nae".

¹⁹Makhyang: mashab: ru dayaug wa qobo shad' rure to" pye' mung:- jo: ru we' gai: rure kad' qhid: ngad: re- yao: wa yao" nho: kao so' re khyad' yu: ava".

²⁰Ngadqere:- Israel we"- nao wa ngo kad' ru majo: ngad: ra" ga: ta" ra". Ngo wa nao kad' ra" mau" yang nao re dao: kho' nae".

²¹Ngonhaung" re pyaung" nha: to: qhug' ru daxe: shid' zin ein: zin lho" daxe khye' ngo" ba: ba mae- Yerusalem mae" phao: loe; lo yaug dayaug joe" li" mung: ai: vomo" byo; gyo" lo" va" ru ngo re ta" kyo" ra".

²²Yao: joe" li" nae" qhid' au: myi" thao zo" mae ASANG: nho: qhid' kheim: mae" kheim: so' re ngo the' gyo"- thao: ba: ne, kao ai: yaug joe" li" re- ASANG wa ngo re dao: qo" jhau nae" kheim: so' dam: tug' byid' ra".

²³ASANG wa ngo re jhau: ra".

²⁴Shid ba: ra" yaug we"- Israel mug: mae" byo; qeim: jo; ra" vomo" jham mae na mo, wa- ceru: ga: ta" na: ako". Abraham wa dayaug za: ngadqere:- yao: re damung" geim" byid' to" ru qhug' ra". Ngonhaung" wa myo: sho' mo, ngad: ai mung: ana" ai: mug: myid wa ngonhaung" nho: ngad va"- ga: ta" ako".

²⁵ASANG ngo ta" na: ru yao: bam re ta" kyo: wa,- naonhaung" wa sho: mae sa: bo shi" re zo" ako". Naonhaung" wa solho jham re caung:pa" ako". Naonhaung" wa byu se' ako". Ai: mung"dan: re naonhaung" sang: ein: khokhyo" qo" myid: yu: ko" i?

²⁶Naonhaung" wa naonhaung" nho: shae pyang: jham mae khug ngha: ako". Naonhaung" nho: ave, jham wa ca' ja: ngad: ako". Yaug khao:ngo" wa myi: shad' lao shad' ako". Ai: mung"dan: wa naonhaung" nho: ngad: ein: kho khyo" qo" myid ko" i?

²⁷Ngo wa daui: na: ra" Mao"So ngad:- ai: byo; qeim: jo, ra" vomo" jham mae na: jo; ra" mo, wa se' pye' ru qhug' li" genae" ein: yao: bam re ta" peim" ru- yao: bam re ta" kyo: wa,- seyo: vogaung: mae na: ra" mo, re seyo: gug'nyhug' lhe: jham: yang zo" pye' li" genae". Bam jham we' laug aug' jham mae phao: vho' na: qin" mo, wa no phyo: jham: yang shid: lo" li" genae".

²⁸Ngo wa seyo: vogaung: re cae: jhug tag jo, qo kad' pye' nae". Aimung: yao: bam gyai ngad beim: mung: phug: ra" kheim: so' thao" byaug nae". Israel mung" mae" bam jham wa gyai lhaung mung: khag' re: ai: khyo maqo" su" lai: lo" genae".

²⁹Ngo wa mung" byu qere yao: bam: qobo jham: qhid' mae" qobo dae byid: mung: seyo: vogaung: jham cae: jhug tag kad' pye' au:- yao: bam wa ngo ASANG ngad: rure ba: li" genae".

³⁰ASANG ta" ra"- shid ba: ra" yaug we"- ni" nho: byu qe wa- vomo" kham: qi: jham mae mangad: lao" yao: bam: yham kham: dung: nhae mae mangad lao" vogaung: vang nhae mae jho" qhug' ra" au: ni" khyo re lau ta" ako". Ana" ASANG mae" pe" mungdao: joe" li" rure yetae" gyo" qu" gelang: ga: ta" ako".

³¹Aimung: nga" byu qe wa nao ta" ke' nae" rure tae" gyo: nae" qhid' mae" zang" ham: ye" lo" ako". Ngadqere: yao: bam wa yao: bam re nao kad' nhao: rure makad' ngad: ako". Yao: bam: nhad' qid jham mae jhid'de; dao: jhau: ako". Ngadqere:- yao: bam wa yao: bam: myo, nyad so' kho' ra" khyo re xo' yang: kad' ako".

³²Yao: bam: qhid' mae" nao wa jhid'de; nghaui"caung: byid' ra" shangaui shapyo: yaug- mangad: lao" tang: be, yaug tho' pe" maje ngad: ra". Yao: bam wa ni" nho: dao: jham alhab' re tae" gyo: mung: ai: gu: mae" dakheim: rere: maphug' cao" ngad: ako".

³³Ngadqere: ni" nho: dao: kheim: jham alhab' jo; dang: lo: au:- aijham wa jo: dang: lo: li" nae"- ai au:- yao: bam wa yao: bam: phaung gaung: mae lapa dayaug na: lai: lo va" rure yao: bam ba: li" genae".