Read Maru EZEKELA 34 Bible Online

EZEKELA 34 - Maru bible

EZEKELA 34

¹ASANG wa ngo re jhau: ra".

²Shid ba: ra" yaug we"- Israel zug: ade, qere qobo zhaug' ta" phoe: pye' wa,- yao: bam re lapa pa byid: mung:- ngo ASANG yao: bam re ta" ru ta" kyo: wa,- Israel yao zaung" mo, we"- naonhaung" wa byuxa: voqoe, qhug' avako". Naonhaung" wa naonhaung" yao" gaung re qu" gun caung mung: yao jham re wa khonhae" re: mazam: ngad: ako".

³Naonhaung" wa yao nug' shaug' mung: yao mug' mae" kad' ra" mai bau: jham ve; ako". Aimung: nga" nho: yaung" thao" ra" yao jham re se' zo" ako". Ngadqere: yao jham re naonhaung" khonhae" re: mazam: ngad: ako".

⁴Naonhaung" wa qam: nang" ra" dau: re malhaung" gun caung ngad: ako". No: ra" yao jham re maya: gai byid: ngad: ako". Dae de; ra" yao jham re pin: cug' yang mathab' byid: ngad: ako". Na: du" lae" lo" ko" ra" yao jham re madam: jhui" yu ngad: ako". Aimung: byaug: byaug: ra" yao jham rere: maqho ngad: ako". Ai: atha" naonhaung" wa ai: yao jham re abe, akhyad' kad' ako".

⁵Yao jham wa yao zaung" yaug maqo" gemung: ai jham wa na: sin" lo" ako". Aimung: seyo: gug'nyhug' lhe: jham wa ai jham re bin" se' zo" pye' ako".

⁶Aimung: nga" nho: yao jham wa- myhao: ra" bug gaung jham we' bam jham khyo na: du" lae" lo" ako". Ai jham wa myidgaung: dao kao" mae na: sin" lo" mung:- yao: bam re khag' yang macao" qho- yao: bam re qho nae" re: khag' qam: make' ngad: ako".

⁷Yao zaung" mo, we"- ana" naonhaung" re ngo ASANG ta" na: rure tae" gyo: ge,-

⁸Ngo wa kao so' daui: na: ra" Mao"So ngad- aimung: naonhaung" nga" dao: re tae" gyo: ge,- nga" nho: yao jham wa- yao zaung" yaug mana mung: seyo: gug'nyhug' lhe: jham: yang khe' taung: mung: bin" se' zo" pye' ru qhug' ako". Nga" nho: yao zaung" mo, wa- ai: yao jham re qho: yu nae" qhid' mae" qam: make' ngad: ako". Yao: bam wa yao: bam yao" gaung re za: qu" gun caung: na mung:- yao jham re macaung ngad: ako".

⁹Aimung: yao zaung" mo, we"- nga" dao: re tae" gyo: ge,-

¹⁰Ngo wa naonhaung" nho: gyevo ngad: ein:- ngo ASANG ta" hau" to: va". Ngo wa nga" nho: yao jham re naonhaung" mae" yu: pye' byid: mung:- naonhaung" re yao: bam: yao zaung" mo, khonhae" re: madam: kad' nhao lo nae". Ngo wa khonhae" re:- naonhaung" yao" gaung re za: dam: qu" gun caung nhao lo nae" mangad:- ngo wa nga" nho: yao jham re- naonhaung" mae" khyad' khyui: yu mung: naonhaung" yang yao: bam re zo: nhao nae" mangad:-

¹¹Kho:kham ASANG ngo wa naonhaung" re ta" va"- yao zaung" yaug wa du" lae" sin" lo" ra" yao" nho: yao jham re qu" gun caung mung: daga" dam: jhui" yu: ru we' dakhyo:- nga" nho: yao jham re ngo yao: cao" qho mung:- yao: bam re qu" gun caung nae". Ai: mug: cad' mung: byo; qeim: ra" ba na mae ngo wa yao: bam re- yao: bam na: sin" lo" ra" jo, qo alhab' mae" dam: jhui" tug' yu nae".

¹³Ngo wa yao: bam re taung bug: mung"dan: jham mae" jhui" thug' yu mung:- yao: bam re daga" za: zhang: phaung: to: nae". Aimung: yao: bam: mug: khyo dam: jhui" lo" nae". Ngo wa yao: bam re Israel bam jham we' qid gyaung: zo: jham khyo dam: jhui" tug' yu mung:- yao: bam re yaung" ra" mhin: gyo, jham mae zho: nae"-

¹⁴Ngo wa yao: bam re- Israel mug: myid mae" bam vohau: yo jham- lao: khaung: jham- we' nyug: ra" mhin: gyo, jao: jham mae gug: gam taung" lhae: zo: nhao nae".

¹⁵Ngo yao: nga" nho: yao jham re zaung" yaug ngad nae". Aimung: ngo wa yao: bam re nyug: ra" no: na nae" jo, qo dalam: qho byid: nae". Kho:kham ASANG ngo ta" to: va".

¹⁶Ngo wa byaug: byaug mo, re cao" qho nae" na: lae" lo" mo, re dam: jhui" tug' yu nae"- dae de; mo, re pin: cug' yang thab' byid: nae"- aimung: no mo, re no ya: gai byid: nae". Ngadqere:- xau mung: qam: bo mo, re wa ngo phyo' qheim" pye' nae". Pe"mung:ga"re- ngo wa jo: rure kad' ra" yao zaung" yaug ngad:-

¹⁷Aimung: nga" yao phung: we"- ana" kho:kham ASANG ngo wa- naonhaung" yaug khao:ngo" re gai mo, we' magai mo,- yao jham we' cad' be, jham gatau tau kho' kao: mung: dao: phyid' nae" ein: naonhaung" re ta" va".

¹⁸Naonhaung" mae" daqhae: wa gai: thao" ra" vohau: qo" zo" na: rure nhag' madag ngad: ako". Naonhaung" wa naonhaung" mazo" rure lhao" re: zab: nhae" pye' ako". Naonhaung" wa qid gyang: re shaug' mung: naonhaung" mashaug' ra" qid re zab: mhoe: pye' ako".

¹⁹Nga" nho: yao gaje: gu: wa naonhaung" zab: nhae" pye' va" ra" mhin: re zo: ca" ako". Aimung: naonhaung" zab: mhoe: pye' ra" qid re yao: shaug' ca" ako".

²⁰Aimung: ana" kam" wa- Kho:kham ASANG ngo wa- qam: bo: ra" yao naonhaung" we' qam: nang" ra" yao jham: nho: agyo: mae dao: kho' nae" ein:- naonhaung" re ta" va".

²¹Naonhaung" wa no: na mo, re ayae khyo kang" qhui" to: mung: yao: bam re yao kyaung" mae" va: khyo khe' kao" pye' ako".

²²Ngadqere:- ngo wa nga" nho: yao jham re khyad' khyui: yu mung:- yao: bam re khonhae" re:- manug makhyad' makad' nhao lo nae". Ngo wa nga" nho: yao dau: khao:ngo" re dao: kho' mung: gai: ra" mo, we' magai mo, re kho' kao" pye' nae".

²³Yao: bam: dayaug za" yao zaung" yaug boe" nae" qhid' mae" nga" nho: daui daui yaug Davi we' dau: ra" kho:kham dayaug yao: bam re ngo byid: nae". Aimung: yao: wa- yao: bam re qu" gun caung: li" nae".

²⁴Ngo ASANG wa yao: bam: Mao"So ngad nae". Aimung: nga" nho: daui daui yaug Davi we' dau: ra" kho:kham dayaug wa yao: bam: zug: ngad: li" nae". Ngo wa ta" to: va".

²⁵Ngo wa yao: bam: gug: gam: ru qhid' mae" lam: to" ga" ra" dao: thang" dalam: re yao: bam we' kad' to: nae". Ngo wa ai: mug: myid mae gyaug ci" ja: gug'nyhug' alhab' re sham" pye' nae". Ailao" nga" nho: yao jham wa pa: din" jham mae gug: gam taung" qo" na mung: sag' mo" jham mae qo" yab: li" genae".

²⁶Ngo wa yao: bam re shaman" byid: mung:- yao: bam re nga" nho: gyang" lho" bug gaung gam: sho' mae na nhao nae". Ai: jo, qo mae ngo wa yao: bam re yao: bam ca" ra" au: mug: byam byam mung: yang shaman" byid: nae".

²⁷Sag' gae jham wa ashi: zaui" li" genae". Yo myid jham wa gaug zo thug' nhao genae". Aimung: yaug khao:ngo" wa yao: bam yao" mug: myid mae gug: gam taung" qo" na: li" genae". Ngo wa nga" byumyu" qenho: jao co: jham re phyid' pye' byid: mung:- yao: bam re jeim kad' mo; nho: lo, mae" loe; beim nhao: ke' ra" au: ngo ASANG ngad: rure yao: bam ba: li" genae".

²⁸Tarha" taungbug: byumyu" qe wa yao: bam re khonhae" re: malhad' paui zo: lo: genae". Seyo: gug'nyhug' lhe: jham re: yao: bam re mabin" se' zo: lo: genae". Yao: bam wa yaug yo ce tae" ru we' qo" na mung:- yao: bam re khag' yang re:- makyaug' tin" lo: genae".

²⁹Ngo wa yao: bam re myid xau gai: ra" yo myid jham byid: mung: ai: mug: myid mae moe, shab' ru thao" nhao: pye' nae". Gatau: byumyu" qe wa yao: bam re khonhae" re: manyhe' jung" maqu" cae: lo: genae".

³⁰Israel re ngo gug: gam byid' ru we' yao: bam wa nga" nho: byumyu" ngad: rure- yaug khao:ngo" ba: li" genae". Kho:kham ASANG ngo ta" to: va".

³¹Ngo zho" ra" yao kyaung"- nga" nho: yao naonhaung" wa- nga" byumyu" ngad: ako". Aimung: ngo wa naonhaung" nho: Mao"So ngad:- ga: kho:kham ASANG ta" ra"- ga: ta" ra".