Read Maru EZEKELA 36 Bible Online

EZEKELA 36 - Maru bible

EZEKELA 36

¹ASANG ta" ra"- shid ba: ra" yaug we"- Israel bam jham re dao: ta" yang:- Israel mung" mae" bam jham re jhau mung:-

²Yao: bam: qhid' mae" kho:kham ASANG ngo qo" to" ra" mung dao: re tae" gyo: genae" qhid' mae" ta" kyo: wa,- Israel nho: gyevo qe wa qu" khug' bau: mung:- ai: ganhae" gaco' mae" bam jham wa ana" ngonhaung" mae" ngad va"- ga: ta" ako".

³Ailao" ceru: lapa pa mung: kho:kham ASANG ngo ta" na: rure ta" hau: wa,- avai: ayae mae" byumyu" qe Israel mung" mae" bam jham re phyo' zo" pye' ra" au:- yao: bam alhab' wa Israel re ceim" jung" ako".

⁴Aimung: ana" bam jham we' bug gaung jham naonhaung" re qid zo: gyaung: jham we' lao: khaung: jham naonhaung" re- byo; qeim: jo; ru mae to: co' ra" jo, qo naonhaung" re- phyo' zo" pye' mung: shapye' to: qhug' mung: avai: ayae mae" byumyu" qe ceim" jung" ru we' lhad' yu qhug' ra" vomo" jham naonhaung" re- kho:kham ASANG ngo ta" rure tae" gyo: ge,-

⁵Kho:kham ASANG ngo wa- nhag' yo" ru we' avai: ayae mae" byumyu" qe je yang: mae" Edom re qobo zhaug' ta" va". Yao: bam wa ngaui: bau: mung: qu" jung" ru we' nga" nho: mug: myid re lhad' sang: yu mung:- ai: mhin: gyo, jao: jham re sang: pye' ako".

⁶Aimung: Israel mug: myid re lapa pa byid: wa,- bam jham- bug gaung jham- qid zo: gyaung: jham we' lao: khaung: jham re- byumyu" qeyang yao: bam re ceim" jung" mung: khyoe' ta" ko" ra" mathao mae ngo kho:kham ASANG qu" yo: mung: myid nug' ru we' ta" rure ta" kyo: wa,-

⁷Kho:kham ASANG wa avai: ayae mae" byumyu" qe wa nyham: khyo" pye' ru qhug' genae" ein: dang dang yao: dao:so: to" to: va".

⁸Ngadqere:- Israel mung" mae" bam jham mae wa sag' gae jham dam: yaug: li" mung: nga" byumyu" Israel naonhaung" qhid' mae" ashi: dam: zaui: byid' li" nae". Naonhaung" wa khomyhao" mamyao" re yham khyo dam: phao: lo: li" genae".

⁹Ngo wa naonhaung" shad' mae bo: ra". Naonhaung" nho: yo myid re dam: phaug' mung: aimae qhovo: qhoshi: dam: qo" sin: sho' ngo kad' nae".

¹⁰Ngo wa naonhaung" re byulam: myo" je" li" nhao nae". Naonhaung" wa vomo" jham mae na: bam mung: byo; qeim: ru mae to: co' ra" lam: khao:ngo" re dam: tau: zhaug' nae".

¹¹Ngo wa byu qe we' nung: jham re myo" je" laug: lo nhao nae". Naonhaung" wa qhid' phyao: mae" tho' je" li" mung: naonhaung" wa zoshao myo: sho' qo" li" genae". Ngo wa naonhaung" re- ai: jo, qo mae naonhaung" lhaung" na: lai: lo co' ko" ru we' dakhyo: na nhao nae"- aimung: ngo wa naonhaung" re ganhae" tho' je: na: dai nhao nae". Ailao" naonhaung" wa ngo ASANG ngad: rure ba: li" genae".

¹²Ngo wa nga" byumyu" Israel naonhaung" re dam: jhui" tug' yu mung:- ai: mug: myid mae dam: na nhao nae". Airu wa naonhaung" yao" nho: mug: myid ngad: li" nae". Aimung: ai: mug: myid wa naonhaung" nho: zoshao qere khonhae" re: moe, shab' maqhug' nhao nae".

¹³Kho:kham ASANG ngo ta" va". Ai: mug: wa byu re zo" ra" mug: ngad: ai: byumyu" qere yao: zo: qe lhad' yu: pye' byid' ra" mug: ngad: ga: su ta" ru wa dang: ra".

¹⁴Ngadqere:- ana" mae" thao phyao: ai: mug: myid wa- naonhaung" nho: yao: zo: qere lhad' yu: pye' byid' ra" byu zo" ra" mug: mangad: lo nae". Kho:kham ASANG ngo ta" to: va".

¹⁵Ai: mug: myid wa byumyu" qeyang ceim" jung" ru- su: yang ceim" nyhe' ru magyo: ca" lo nae". Ailao" ai: mug: myid wa ai: byumyu" mae" yao: zo: qere malhad' yu byid: lo nae". Kho:kham ASANG ngo ta" to: va".

¹⁶ASANG wa ngo re jhau: ra".

¹⁷Shid ba: ra" yaug we"- Israel byumyu" qe wa yao: bam: mug: myid mae na: bam: au:- yao: bam wa yao: bam na: ra" ave, we' yao: bam kad' ra" lo,mau" khyo" ai: mug: myid re masan masin" boe" nhao: ako". Ngo wa yao: bam: ave, re mai ci: au: mae" myiqe: we' dakhyo: lalam lakhug khyo" magyang" san ein: myid byid' ra".

¹⁸Yao: bam shad' ra" byuse' mau" we' solho khyo" yao: bam masan masin" yug nhao: pye' ko" ra" mathao mae yao: bam re nga" nho: nhag' yo" ru kham zo: nhao nae".

¹⁹Yao: bam na: ru we' kad' ra" ave, qhid' mae" yao: bam re ngo dao: kho' nae". Aimung: ngo wa yao: bam re taung: bug: mang: khyo khe' sin" ke' nae".

²⁰Yao: bam khai: khyo ye: ngadqere:- khyi" khao:ngo" mae nga" nho: gyang" lho" mang re nga: yeim nhao: ako". Pe"mung:ga"re su gaje qe wa ceru: ta" ako". Cebam wa ASANG: nho: byumyu" ngad: ako". Ngadqere: yao: bam wa yao: bam: mug: myid mae" phao: qin" ako"- ga: ta" ako".

²¹Airu: ga" ru wa ngo re nga" nho: gyang" lho" mang qhid' mae" myid: myo: nhao: ra". Pe"mung:ga"re- Israel byumyu" qe wa yao: bam ye" lo" ra" khyi" khao:ngo" mae ngo re nga: yeim nhao: ako".

²²Aimung: ana" wa- Israel byumyu" qere yao: bam qhid' mae" kho:kham ASANG qo" to" ra" lau dao: ta" kyo: wa,- ngo kad' ke' nae" ru wa- Israel byumyu" naonhaung" qhid' mae" mangad:- naonhaung" joe" ye" lo" ra" mung"dan: khao:ngo" mae naonhaung" yang nga: yeim nhao: ra" nga" nho: mang qhid' mae" kad' nae" angad:-

²³Byumyu" qenho: phaung gaung: mae naonhaung" nga: yeim nhao: pye' ra" nga" nho: qi" qhang: ra" mang gyang" lho" rure ai: byumyu" qere ngo lho: qhu" byid' au:- yao: bam wa ngo ASANG ngad: rure ba: li" genae". Kho:kham ngo ta" to: va". Ngo gyang" lho" ru byumyu" qere qhu" byid: nae" qhid' mae" ngo wa naonhaung" re ci yhung: nae".

²⁴Ngo wa naonhaung" re byumyu" ja: khao:ngo" we' mung"dan: lam: khao:ngo" mae" jhui" tug' yu mung: naonhaung" yao" mug: myid mae na nhao nae".

²⁵Ngo wa gyang" san: ra" qid re naonhaung" nho: dao mae pyi" sin: mung: naonhaung" re naonhaung" nho: sohau: jham alhab' mae" we' naonhaung" re masan masin" yug nhao: ru gatau alhab' mae" gyang" san: lo nhao nae".

²⁶Ngo wa naonhaung" re nhag' lam: asag' we' byo ag' ke' byid: nae". Ngo wa naonhaung" nho: sang: dang: ra" laug zang nhag' lam: re yu pye' byid: mung:- mho dao: gyo" ra" nhag' lam: ke' byid: nae".

²⁷Ngo wa naonhaung" khug mae nga" nho: byo re ke' byid: mung: naonhaung" re ngo byid' to: va" ra" tarha" jham alhab' re- cao"-macao" ko" ru we' nga amyin" dao: jham alhab' phug' cao"- macao" ko" rure qu" nae".

²⁸Ailao" naonhaung" wa naonhaung" nho: phug' pho" re ngo byid' ra" mug: myid mae na: li" genae". Naonhaung" wa nga" byumyu" ngad mung:- ngo wa naonhaung" nho: Mao"So ngad nae".

²⁹Naonhaung" re masan masin" nhao ra" ja: khao:ngo" mae" naonhaung" re ngo khyad' yu nae". Ngo wa gaug zo maui: lam: re magan: mago" myo: nae" qhid' mae" amyin" byid: nae"- aimung: naonhaung" wa bao" khug' makhug' lo: genae".

³⁰Ngo wa naonhaung" nho: shigae jham we' yo jham re ashi: myo" laug: zaui: nhao mung: byumyu" qenho: phaung gaung: mae naonhaung" re nga: yeim nhao nae"- bao" khug' majo, lo nae".

³¹Naonhaung" wa naonhaung" shad' lai: lo: ra" makhyang: mashab: ra" ave, jham we' naonhaung" kad' shad' ru jham re myid: beim: mung:- naonhaung" wa naonhaung" nho: qobo jham we' yug: no dae jham: mathao mae naonhaung" yao" gaung re ca' byaug: li" genae".

³²Israel we"- ngo wa ceru alhab' re ni" qhid' mae" kad' ru mangad:- naonhaung" kad' ra" qho' ja: we' nga: yeim: ru nao re kham zo: nhao nug: yang kad' ru angad: ein: ru ba nhao nug: ra". Kho:kham ASANG ngo ta" to: va".

³³Kho:kham ASANG ngo ta" va". Ngo wa naonhaung" re naonhaung" nho: qobo alhab' mae" bin: gyang" san nhao lao"- ngo wa naonhaung" re naonhaung" nho: vomo" jham mae dam: na nhao mung:- naonhaung" byo; qeim: jo; rure dam: tau: zhaug' nae" akhang" byid: nae".

³⁴Naonhaung" nho: yo myid jham khyo" su" lai: lo" ra" yaug khao:ngo" wa ai: yo myid jham khoqhi" myo, se mung: cad' jo; rure the' myao: avako". Ngadqere:- ngo wa naonhaung" re ai: yo myid jham mae dam: phaug' zo: nhao nae".

³⁵Yaug khao:ngo" wa- qhid' phyao: ganhae" dalhang din"pyad' yo boe" jo; ra" ce: mug: myid wa Edin khyae we' dakhyo: boe" lo va" ru we' phyo' khyo" pye' mung:- lhad' paui: yu: pye' ru we' byo; qeim jao: mae shapye' to: co' ra" ce: vomo" jham wa ana" khoru: byu dam: na mung: gyetab kyae" kham" pye' rure ta" li" genae".

³⁶Ailao" mashid na: dang: ra" avai: ayae mae" yham kyo: byumyu" qe wa- byo; qeim: lo" va" vomo" jham re ngo ASANG dam: tau: zhaug' mung: to" cad' pye' ra" yo myid jham re dam: qho" to" rure ba: li" genae". Ngo ASANG wa ceru re kad' nae" ein: ta" to: va". Aimung: ngo wa kad' yao: kad' nae".

³⁷Kho:kham ASANG ta" ra" ngo wa Israel byumyu" qeyang ngo mae" bao" yu: ru dalhang dam: mho' nhao nae". Aimung: ngo wa yao: bam re- yao dakyaung" we' dakhyo: je" li" nhao nae".

³⁸Ana" byo; qeim: jo; ra" vomo" jham wa ganhae" qhid' phyao: dalhang Yerusalem mae poe poe: na: au: phad' ngaui" xeim: khyo" qhaug' byid' to" ra" yao jham byang" jo; ru we' dakhyo: byang" jo; bam: li" nae". Ailao" yao: bam wa- ngo ASANG ngad: rure ba: li" genae".