Read Maru EZEKELA 38 Bible Online

EZEKELA 38 - Maru bible

EZEKELA 38

¹ASANG wa ngo re jhau: ra".

²Yao wa- shid ba: ra" yaug we"- Magoga mug: mae" Mesheg we' Tuba byumyu" qenho: zug: ajhaung Goga re qobo zhaug' yang: ta" phoe: pye' wa,- yao: re qobo zhaug' ta" phoe: pye' wa,-

³Aimung: kho:kham ASANG ngo wa yao" nho: gyevo ngad: ru yao: re ta" kyo: wa,-

⁴Ngo wa yao: re lao" phaug' yu nae"- yao" nho: ae khao: jham re langhoe" yang nghoe" te' to: mung: yao: we' yao" nho: gyezo: phung: jham re she: khyad' nae". Yao" nho: gyetab wa- myao: jham we' gyekhin ve; ra" myao: zaung mo, we' daga" gyai myo" ako". Aimung: gyezo: yaug khao:ngo" wa go dayaug dalam: vo; ci mung: shae pyang: dayaug dakhyae: vin: ako".

⁵Persia- Ethiopia we' Libya mae" byu qe wa yao: we' daga" ngad mung: alhab' mo, wa go jham we' jo,to' maug jham qo" ako".

⁶Mug: am: shad' Gome we' Bed Togarma mug: myid mae" gye khe' yauggai qe alhab' wa yao: we' daga" ngad: ako". Ai we' dakhyo:- gatau: byumyu" qemae" yauggai qere: yao: shad' bobo: ako".

⁷Jin" jin" seim" to: nae" qhid' mae" we' yao" nho: gyephung: jham alhab' rere: yao: amyin" byid' re jin" jin" seim" ci nae" qhid' mae" yao: re ta" kyo: wa,-

⁸Zin na myo: sho' thao re- byumyu" mung"dan myo: sho' mae" jhui" nha: to: qhug' ko" ra" byumyu" qe na: mung"dan:- gye poe re gyaug maca" lo: na: ra" mung"dan: khyo jhui" vao ye: nae" amyin" byid: nae". Yao: wa ayo, myao" sho' cae: jhug' tag mung: din"pyad' yo boe" jo, ngadqere: ana" byumyu" qe alhab' gug: gam za: na: jo, ko" ra" Israel nho: bam jham khyo jhin" vao ye" li" nae".

⁹Yao: we' yao" nho: gyetab wa byumyu" myo: sho' we' daga" la qam" we' dakhyo: khe' zin" lo mung: jham thaui: we' dakhyo: ai: mug: myid re nghoe' pye' li" nae"- ga: ta" ra".

¹⁰Ceru wa Goga re kho:kham ASANG ta" ru ngad: ra". Ai wa ayo, joe" lao" nao wa makhyang: mashab: ra" mau" re myid: kyae: thug' li" nae".

¹¹Nao wa- gyevha zaung jham majo, vang- makyae" lhaung" ra" vogaung: jham mae yaug yo cae tae" ru we' gug: gam taung" na: bam ko" ra" byumyu" nho: mung"dan: de: de: mung: jo; rure khe' jhin" vao: sang: yu nae" qhid' mae" myid: phyid' li" nae".

¹²Nao wa ganhae" qhid' phyao: dalhang byo: qeim: jo; ra" vomo" jham mae na: ra" byu qere lhad' khyad' zo: mung: la nyab: jham sham" yu: li" nae". Yao: bam re byumyu" qemae" jhui" khai: zhang" to: mung:- ana" yao: bam wa gug'nyhug' jham we' jo,nho" jham qo" yang: mug: myid: nho: khyokao: mae na: bam: ako".

¹³Sheba we' Dedan mae" byu qe we' Spain mung" mae" vogaung: mae na: ra" phaga: byu qe wa- nao re ceru: myid' li" genae". Nao wa khe' zin: mung: lanyab sham" yu mung: lhad' zo: nae" qhid' mae" ni" nho: gyetab re khai: zhang: to: va" i? Nao wa qhang we' ngaui gug'nyhug' jham we' jo,nho" qo" yu mung:- ai: lanyab alhab' re tai: phao: lo" nae" ein: myid: yaung: to" i? ga: myid' li" genae".

¹⁴Aimung: Goga re:- kho:kham ASANG yao: re pe" ta" na: ru yeta" kyo: nae" qhid' mae" ngo re nhao: ke' ra". Ana" nga" byumyu" Israel wa gug:gam taung" na: jo, ko" au:-

¹⁵Nao wa mug: am: shad' gyai va" ra" naoyao" jo, qo mae" byumyu" myo: sho' gyezo: qe bobo: mung: myao: zaung alhab' zaung: ra" gyetab qi: datab mae" kheim: so' qi" ra" gyezo: qere jhui" to" lo: li" nae".

¹⁶Nao wa mug: myid mae hug' lai: lo" ra" la qam" we' dakhyo: nga" byumyu" Israel re khe' zin" li" nae". Ayo, joe" lo lao" ngo wa- byumyu" qere ngo khag' ngad: ru qhu" byid: nae" qhid' mae" we' nao khyo" yang ngo kad' lo: ra" mau" mae nga" nho: gyang" lho" ru qhu" byid: nae" qhid' mae"- nao re nga" nho: mug: myid khyo jhin" vao ye: nhao: ke' nae".

¹⁷Nao wa- joe" lo nae" ayo, gu: mae Israel re khe' zin: nae" byu dayaug re ngo jhui" lo byid: nae" ein: nga" nho: daui daui: mo, Israel lapa qe: nhad' khyo" yang ngo ta" hau" ra" au: ganhae" ni" khyo re ngo lhaung" ta" yaug ngad: ava"- ga: ta" ra". Kho:kham ASANG ta" to: va".

¹⁸Kho:kham ASANG ceru: ta" ra". Israel re Goga jhin" vao: ra" ba na mae- ngo nhag' jam: yo: nae".

¹⁹Ngo wa nhag' gyai: yo" ruyang ai: ba na mae Israel mung" mae dae xo: ra" myid lab: lab' li" nae".

²⁰Ngo:- ngho' dau: khao:ngo"- gug'nyhug' aqi: angai dau: khao:ngo"- myid gaung dao mae" xao su byu qe yaug khao:ngo" wa ngo re gyaug: yang ko, ko, nin" li" genae". Bam jham bad: gyo" lo" genae"- amung: vang jham gyoe; gyo" lo" li" genae".

²¹Ngo wa qug: khai: kyi" khyag' cao jab alhab' yang Goga re kyaug' tin" nae". Kho:kham ASANG ngo ta" to: va". Yao" nho: byu qe wa yao: bam: shae pyang: jham: yang yao: cao: yao: jho" zin" li" genae".

²²Ngo wa yao: re- no: phyo: we' sa: thug' ruyang qobo dae byid: nae". Mug: mo" qu: ru we' lag qu khyo" nhao mung:- myi: we' vhang lhag' yang: yao: we' yao" nho: gyetab dao mae re: yao: bam shad' bode; ra" byumyu" myo: sho' mo; dao mae re: vhe' sheim: nae".

²³Ceru: khyo" yang- ngo wa qi" qhang: ru we' gyang" lho" yaug ngad: rure byumyu" alhab' re ngo qhu" byid: nae". Ailao" yao: bam wa ngo ASANG ngad: rure ba: li" genae"- ga: ta" ra".