Read Maru EZEKELA 39 Bible Online

EZEKELA 39 - Maru bible

EZEKELA 39

¹Kho:kham ASANG ta" ra". Shid ba: ra" yaug we"- Mesheg we' Tuba byumyu" qenho: zug: au: jhaung Goga re qobo zhaug' ta" phoe: pye' wa,. Aimung:- ngo wa yao" nho: gyevo ngad: ra" khyo- yao: re ta" kyo: wa,-

²Ngo wa yao: re khyo asag' khyo lhang: qang: ke' byid: mung:- yao: wa Israel nho: bam jham khyo joe" li" sho' va" ra" mug: am: shad' mae" yao: re jhui" thug' yu nae".

³Ailao" ngo wa- yao" nho: lo, kaung: shad' lo, mae" yao" nho: lo, la: re be; khyo" pye' byid: mung: yao" nho: lo, yo shad' lo, mae" yao" nho: myo: jham re be; sin" pye' byid: nae".

⁴Goga we' yao" nho: gyetab wa yao: bam: myid vang" ba nam qe we' daga"- Israel nho: bam jham mae shid: lang" lo" li" genae". Aimung: ngo wa yao: bam: shid mao jham re seyo: gug'nyhug' lhe: jham alhab' nho: qhid' mae" zo:ve khyo" byid: zho" pye' nae".

⁵Yao: bam wa jao: dae yo mae shid: lang" lo" li" genae". Kho:kham ASANG ngo ta" to: va".

⁶Ngo wa Magoga mug: myid mae we' khag' yang mace: gin jang lo: na: bam: ra" panglai: qid zo" cao" yang: na: ra" jo, qo alhab' mae myi: ngha" te' ke' nae". Aimung: yaug khao:ngo" wa ngo ASANG ngad: rure ba: li" genae".

⁷Ngo wa nga" nho: gyang" lho" ra" mang re nga" nho: byumyu" Israel qe ba sho' kad' nae". Aimung: nga" nho: mang re nga: madam: yeim: nhao lo nae". Ailao" byumyu" qe wa- Israel byumyu" nho: ASANG Mao"So ngo ngad: rure ba: li" genae".

⁸Kho:kham ASANG ta" ra". Ngo lhaung" ta" ra" ba na wa dang dang yao: joe" lo: li" nae".

⁹Israel mung" mae" vomo" jham mae na: ra" mo, wa thug' ye" lo" mung: shapye' to: co' ra" gyezai jham re thao: kad' nae" qhid' mae" cao" gaug: zhang: li" genae". Yao: bam wa go jham - lo,la: jham- myo: jham- lhae tad' jham we' thaung kang jham: yang myi: zao ngha" mung:- nhad' zin lam: lam: nga" de; jo; li" nae".

¹⁰Yao: bam wa pa: din" mae thao: maqho ca" genae". Sag' mo" yo mae re: sag' gae jham mathau ca" genae". Pe"mung:ga"re- yao: bam ngha" nae" qhid' mae" shapye' to: co' va" shae- lhae- gyezai jham qo" li" genae". Yao: bam wa- yao: bam re la nyab lhad' yu mung: yao: re phyo' zo: mo, re yao: bam: yang:- lanyab lhad' yu: mung: phyo' yu: pye' byid' li" genae". Kho:kham ASANG ngo ta" to: va"- ga: ta" ra".

¹¹ASANG ta" ra". Ceru alhab' boe" lo: ra" au:- ngo wa Israel mae xo: tham: mae" ba thug' shad' gyaung: su: mo; lao: khaung: mae Goga re nyhab' nae" lab bug dalam: byid: nae". Goga we' yao" nho: gyetab alhab' re ai: jo, qo mae nyhab' pye' mung: ai: lao: khaung: re- Goga nho: gyetab lao: khaung: ga: mhang" li" genae".

¹²Ai: sushid mao gaung jham re Israel byumyu" qe tai: pye' mung:- ai: mug: myid re sho' san: pye' re lho" nhad' khye' lam: lam: myao" li" nae". Ngo kho:kham ASANG ta" to: va".

¹³Ai: mug: myid mae" yaug khao:ngo" wa- ai: sushid mao gaung jham bobao" nyhab' li" genae". Aimung: yao: bam wa- nga" nho: ce: aung doe; ba na mae nga: yhe' byid' ru qhug' li" genae". Ngo kho:kham ASANG ta" to: va".

¹⁴Ai: lho" nhad' khye' lai thao re yao: bam wa- ai: mug: myid re qo" san: pye' geshao: ai: myid gaung dao mae dang: jo; ra" sushid mao gaung jham re yeqho: nyhab' pye' nae" qhid' mae" mung"dan: jao: sho' su" qin" nae" byu qe khyin: to: qhug' li" genae".

¹⁵Yao: bam wa- ai: mung"dan: seyo: vogaung: khaung: do, lo" gyo" lo" ye: ye: lo lo kad' mo, wa- byu: shoqug: dakhe' qhug' myao khao:ngo"- lab dau: mo, li" mung: ai re Goga nho: gyetab: lao: khaung: mae qo" dau" nyhab' geshao: ga: ai: shoqug: ayae mae aso: zhaug' to: co' li" genae".

¹⁶(Ai: avai: ayae mae ai: gyetab: mang mang: ra" vogaung: dalam: jo; li" nae".) Aimung: ai: mug: myid wa dam: gyang" san: lo" li" nae".

¹⁷Kho:kham ASANG wa ngo re ta" ra". Shid ba: ra" yaug we"- khyi" khao:ngo" mae" ngho' jham we' gug'nyhug' jham re yao: bam qhid' mae" ngo jaung: to: byid' ra" xeim: jham re li" zo: genae" qhid' mae" khai: ke' wa,- Israel nho: bam jham mae yao: bam sho: qo" zo: mung: sa: qo" shaug' ra" poe mo" dalam: yao: boe" li" nae".

¹⁸Yao: bam wa- yao lo: jham- yao nau" jham cad' be, jham we' xau: yaung" ra" nung: jaung lo: jham re we' dakhyo: se' pye' qhug' genae" ra" gyezo: qenho: sushid mao gaung jham re zo: mung: mug: myid dao mae" zug: qenho: sa: re shaug' genae" ngad: ako".

¹⁹Ngo wa- Ce: byu qere ngaui" xeim: jham we' dakhyo: se' pye' ra" au:- ngho' jham we' gug'nyhug' jham wa xau re- yao: bam qo" zo" nho" gag zo: mung:- sa: re yao: bam nghang: sho' shaug' li" genae".

²⁰Yao: bam wa nga" nho: vae:zo: jaung: mae- myao: jham we' myao: zaung mo, gyezo: qe we' gye khe' mo, re yao: bam qo" zo" nho" gag zo" li" genae". Kho:kham ASANG ngo ta" to: va".

²¹ASANG ta" ra". Ngo wa byumyu" qere nga" nho: phungbao myao nhao mung: nga" nho: tarha" din:man" ra" khyo" myid: phyid' rure kad' boe" nae" qhid' mae" nga" kheim: so' re ngo khoru: ci: ru yao: bam re qhu" byid: nae".

²²Ai: ayo, mae" thao phyao: Israel byumyu" qe wa- yao: bam nho: Mao"So ASANG ngo ngad rure ba: lo" li" genae".

²³Aimung:- Israel byumyu" qe ngo re shad' ra" qobo jham: mathao mae pyaung" nha: to: qhug' ko" rure byumyu" qe ba: li" genae". Ngo wa- yao: bam mae" lhang: phaug' lo mung:- yao: bam: gyevo qe wa yao: bam re aung: pye' ru we' yao: bam re gye poe mae se' pye' ako".

²⁴Ngo wa yao: bam re- yao: bam: masan masin" ru we' yao: bam: makhyang: mashab: ru we' man: qi" ru byid: va". Aimung: ngo wa yao: bam mae" lhang: phaug' lo" va".

²⁵Kho:kham ASANG ta" ra". Ngadqere: ana" ngo wa Israel nho: byumyu" Yaku nho: myid:zo: qere nhag' khyag' yu mung: yao: bam re dalhang dam: na: dai nhao nae". Ngo wa nga" nho: gyang" lho" mang re gug: gam qo" vha: yu nae".

²⁶Yao: bam wa yao: bam yao" mug: myid mae khag' yang makyaug' nhin" lo: gug: gam taung" dalhang dam: qo" na ko" au:- yao: bam wa ngo re jhaug' mazaug phaug' lhag' lo" ko" ruyang yao: bam nga: yeim qhug' rure qo" to" myhid' pye' li" genae".

²⁷Byumyu" myo: sho' mo, re ngo gyang" lho" ru qo" qhu" byid: nae" qhid' mae"- ngo wa nga" byumyu" qere- yao: bam: gyevo qe na: ra" mung"dan: alhab' mae" dam: jhui" tug' yu nae".

²⁸Ailao" nga" byumyu" qe wa- yao: bam: ASANG Mao"So ngo ngad: rure ba: li" genae". Yao: bam wa ceru re ba: li" genae". Pe"mung:ga"re- ngo wa yao: bam re taung" jhui" lo" nae" khyo nhao: ke' mung: ana" yao: bam re dayaug re lhao" matang" to: losho' khai: zhang: yu mung: yao: bam: mug: myid khyo dam: jhui" tug' yu va".

²⁹Ngo wa nga" nho: byo re nga" nho: byumyu" Israel qe: dao mae vhe' sheim: byid: mung: ngo wa yao: bam mae" Khonhae" re: malhang: phaug' lo" lo nae". Kho:kham ASANG ngo ta" to: va"- ga: ta" ra".