Read Maru EZEKELA 40 Bible Online

EZEKELA 40 - Maru bible

EZEKELA 40

¹Ayo, wa- ngonhaung" re pyaung" jhui" lo" qhug' thao shid' xe: ngo" zin ein: zin- Yerusalem re lhad' yu: pye' thao daxe: byid zin ein: zin- zin sag' khye' lho" xin: daxe ba: ba ngad: ra". Ai: ba na mae ngo wa kheim: so' qi" ra" ASANG: kheim: so' wa nga" dao mae jo; ra"- yao: wa ngo re jhui" phao: lo" ra".

²Qhu" lho dalam: mae- Mao"So wa ngo re Israel mug: myid khyo jhui" lo" mung: ngo re myhao ra" bam dabam dao mae lo" nha: to" ra". Ngo wa nga" qhid' kheim: mae vomo" we' dau: ra" yham aqi: dazhan re the' myao:-

³Yao: wa ngo re te' te' jhui" ye"- alao" gyid: bo" we' dakhyo: bao: jo; ra" byu dayaug re ngo the' myao:- yao: wa phacug' ka" taui: dakhe' we' ka" gyang: yao: dakhyaung: re ci mung: kham: mo" nhae mae ye; jo; ra".

⁴Yao: wa shid ba: ra" yaug we"- lhaug' qu" na: wa,- nyang" za: tae" gyo: mung: nao re ngo qhu" byid' ru ja: khao:ngo" re te' dai" za: qu" ci wa,- pe"mung:ga"re ceru qhid' mae" nao re cekhyo jhui" li" ru ngad:- nao wa Israel byumyu" qere- nao the' myao: ru ja: khao:ngo" re ta" kyo: ca" nae" ngad: ra" ga: ngo re ta" ra".

⁵Ngo the' myao: ru wa Caung:pa" Yham ngad: ra". Aimung: ainho: avai: ayae gam: sho' vang qae: to" ako". Ai: byu wa yao" nho: lo, khyaug' daung" qhang: ra" ka" gyang: yao: re yu mung:- vang re ka" qu" ra". Airu wa khyaug' daung" myhao mung: khyaug' daung" thau: ra".

⁶Ai: thao yao: wa- ba thug' shad' khyo qang: ra" kham: mo" khyo ye" lo" ra". Yao: wa zam thao joe" sho' su" do, lo" mung: zam thao au: mae" vao kham: dung: re yeka" qu" ra". Airu wa khyaug' daung" myhao: ra".

⁷Aimae" thoe shad' khyo- su" lai khyo dakhe' dung: ra". Ai: lai khyo shad' khao:ngo" mae mae lhaug' zaung" mo; qe, sam lam: lam: jo; ra". Qe, khao: ngo" wa byid khyug ngad mung: dashad' khyaug' daung" daung" lu: ako". Aimung: daqe, we' daqe, agyo: mae" khinqae jham wa ngo" daung" daung" thau: ako". Lhaug' mo; qe, jham mae" thoeshad' khyo lai: lo" re- Caung:pa" Yham khyo qang: ye" ra" vao kham: shad' mae" qe, khyo joe" ra" khyaug' daung" qhang: ru khyo dakhe' dung: jo; ra".

⁸Yao: wa ce: qe, re ka" qu" ra". Ai wa she' daung" no; ru the' myao: ra". Airu wa Caung:pa" Yham we' jhao" thao" ra" shad' mae" kham: dung: athao" shad' thao ngad mung: gashad' thao mae" khinqae wa shid' daung" thau: ra".

⁹

¹⁰(Ai: lai khyo thoeshad' ceshad' mae" lhaug' mo; qe, jham wa daqi" za: ngad mung:- ai: qe, jham: nho: agyo: mae" khinqae jham re: dakhyo: za: thau: ako".)

¹¹Ai: thao ai: yaug wa- vao kham: mae" lai khyo re lu shad' khyo ka" qu" ra". Ai: khyo wa daxe: sam daung" lu: ra"- aimung: bung" jo; ra" kham: mo" agyo: mae" jo, qo wa daxe daung" ngad: ra".

¹²Lhaug' mo; qe, lam: khao:ngo" nho: qhid' kheim: mae- dadaung" daung" myhao mung: dadaung" daung" thau: ra" khinqae nyham dalam: lam: qae: to" ako". (Ai: qe, jham wa shad' khao:ngo" khyaug' daung" daung" ngad: ako".)

¹³Ai: thao yao: wa- qe, daqe; nho: nhaung thao" shad' khinqae mae" su" lai khyo shad' mae" qe; nho: nhaung thao" shad' khinqae joe" sho' kyo: rure ka" qu" ra". Aimung: airu wa shid' xe: ngo" daung" bo: ra".

¹⁴Lo" thao" qe, wa vang" khyo lo" ra" mae jo; ra". Yao: wa ai: qe, re ka" qu" mung:- airu wa shid' xe daung" lae: ru the' myao: yu: ra".

¹⁵Kham: mo" khinqae taung gaung shad' mae" lo" thao" qe, va" thao" ra" shad' joe" sho' su" lai khyo wa qhang phyao: ngo" xe daung" ngad: ra".

¹⁶Qe, jham: nho: taung gaung shad' khinqae jham mae abung" ngai jham phung" to" ako". Aimung: akhug shad' qe, jham: agyo: mae" khinqae jham mae re: de; ako". Lai khyo shad' qang: ra" akhug shad' mae" khinqae jham mae the' gae lho jham kyaung" tung" te' to" ako".

¹⁷Ai: yaug wa ngo re- kham: dung: khyo khyo" vang" khyo jhui" ye" lo" ra". Taung gaung shad' khinqae we' nhaung thao" phaug' yang: sam xe qe, kad' to" ako". Aimung: ai: qe, jham: qhid' kheim: mae wa laug zang myhung" ra" jo, qo dalam: jo; ra".

¹⁸Ai: jo, qo wa- vang" gam: sho' xo' lo" ra" taung gaung shad' mae" vang" jao: kheim: wa- akhug shad' qe, mo" jao: kheim: tho' je: nyham: ra" zhao" mae jo; ra".

¹⁹Akhug shad' vang" khyo joe" ra" kham: dung: wa je: myhao: ra" kai" mae jo; ra". Ai: yaug wa- kham: dung: shid' lam: agyo: mae ka" qu" re- dayo daung" jho" kyo: ako".

²⁰Ai: thao- ai: yaug wa taung gaung shad' vang" khyo joe" ra" mug: am: shad' mae" kham: dung: re ka" qu" ra".

²¹Byu lai khyo: nho: thoeshad' ceshad' mae" lhaug' mo; qe, sam qe,- ai: qe, jham: agyo: mae" khinqae jham we' vao kham: mae" qe, jham alhab' wa- ba thug' shad' vao kham: mae" we' dakhyo: za: ngad: ako". Vao kham: wa qhang phyao: alhab' ngo" xe daung" qhang mung: lu phyao: wa shid' xe: ngo" daung" lu: ra".

²²Vao: ra" shad' qe,- bao: zo: kham: jham we' kyaung" te' to" ra" the' gae lho jham wa- ba thug' shad' kham: mo" mae" we' dakhyo: za: ngad: ako". Ce: jo, qo mae- kham: mo" joe" sho' zam thao nhad' kham kad' to" ako". Aimung: vao: ra" shad' qe, wa vang" khyo qang: ra" lo" thao" shad' athao mae jo; ra".

²³Qe, mo" agaung: khyo" ce: mug: am: shad' kham: dung: mae" kham: dung: dadung: wa- ba thug' shad' mae" we' dakhyo: yao:- akhug shad' vang" khyo joe" ye" lo" ra". Ai: yaug wa- ce: lai kham: dung: shid' lam" agyo: mae ka" qu" re ai: ru wa- dayo daung" jho" kyo: ako".

²⁴Ai: thao ai: yaug wa ngo re mug: thao shad' khyo jhui" ye" lo" ra". Aimung: ai: mae kham: dung: dalam: re nga" shid' zo: the' myao:- yao: wa ai: nho: akhug shad' khinqae we' vao: ra" qe, re ka" qu" ra". Aimung: aijham wa galam: we' dakhyo: za: ngad: ako".

²⁵Ce: kham: dung: mae" qe, jham mae wa- galam: mae" we' dakhyo: za" ru bao: zo: kham: jham de; ako". Vao kham: qhang phyao: alhab' wa ngo" xe daung" ngad: ra". Lae phyao: wa shid' xe: ngo" daung" ngad: ra".

²⁶Ai: khyo joe" sho' zam thao nhad' kham kad' to" ako". Aimung: ai: vao: ra" shad' qe, wa vang" shad' qang: ra" lo" thao" shad' athao mae jo; ra". Lai khyo shad' qang: ra" khinqae jham mae the' gae lho jham kyaung" tung" te' to: ko" ra".

²⁷Cetau mae re:- akhug shad' vang" khyo joe" lo" ra" kham: dung: dalam: jo; ra". Ai: yaug wa qe, shid' lam: ein: ra" kham: dung: khyo joe" sho' khovha" kyo: rure ka" qu" ra". Aimung: ai wa dayo daung" bo: ra".

²⁸Ai: yaug wa ngo re- mug: thao shad' kham: dung: khyo" akhug shad' vang" khyo jhui" ye" lo" ra". Yao: wa ai: kham: dung: re ka" qu" re ai wa taung gaung shad' khinqae: nho: kham: dung: qhi" ngad: ra".

²⁹Ai: nho: lhaug' mo; qe, jham ainho: vao kham: mae" qe, we' ai: nho: akhug shad' khinqae jham wa- kham: dung: galam: mae" qe, jham we' daqi" ngad: ako". Ce: kham: dung: mae" qe, jham mae re: bao: zo: kham: jham de; ako". Qhang phyao: alhab' re ngo" xe daung" qhang mung:- lae phyao: shid' xe: ngo" daung" ngad: ra".

³⁰

³¹Ai: vao kham: mae" qe, wa taung gaung shad' vang" khyo qang: jo; ra". Aimung: byu lai khyo cao" yang: mae" khinqae jham mae the' gae lho jham kyaung" tung" te' to" ako". Ce: kham: mo" khyo zam thao she' kham kad' zao: to" ako".

³²Ai: yaug wa ngo re- ba thug' shad' kham: mo" khyo" akhug shad' qe, mo" khyo jhui" lo" ra". Yao: wa kham: dung: re ka" qu" ra"- ai wa kham: dung: gagu: we' dakhyo: za: ngad: ra"

³³Ai: lhaug' mo; qe, jham ai: vao kham: mo" qe, we' ai: akhug shad' khinqae jham wa- gatau: vao kham: dung: jham mae" we' dakhyo: za: ngad: ako". Ai jham: avai: ayae lhang" gam: mae bao: zo: kham: jham de; ako". Aimung: vao kham: qe, mae re: airu: de; bam: ako". Qhang phyao: alhab' wa ngo" xe daung" ngad mung:- lae phyao: wa shid' xe: ngo" daung" ngad: ra".

³⁴Vao kham: shad' qe, wa taung gaung shad' qang: to" ra". Byu lai khyo cao" yang: khinqae jham mae the' gae lho jham kyaung" tung" te' to: ko" ra". Ce: kham: mo" khyo zam thao she' kham kad' to" ako".

³⁵Ailao" ai: yaug wa ngo re mug: am: shad' kham: mo" khyo jhui" ye" ra". Yao: wa ai re ka" qu" ra". Airu wa kham: mo" gagu: we' dakhyo: za: lae: ra".

³⁶Aijham we' dakhyo:- ai: lam: mae re: lhaug' mo; qe, jham- shaung: yhaung" pye' ra" akhug shad' khinqae jham- vao kham: mae" qe, daqe, we' shad' khao:ngo" mae bao: zo: kham: jham de; ako". Ai: nho: qhang phyao: alhab' wa ngo" xe daung" ngad mung: lae phyao: wa shid' xe: ngo" daung" ngad: ra".

³⁷Vao kham: shad' qe, wa taung gaung shad' qe, mo" khyo qang: jo; ra". Lai khyo cao" yang: khinqae jham mae the' gae lho jham kyaung" tung" te' to" ako". Ce: kham: mo" khyo zam thao she' kham zao: to: byid' ra".

³⁸Taunggaung shad' vang" mae wa- mug: am: shad' mae" akhug shad' kham: mo" we' xo' to" ra" vang" shad' khyo qang: ra" vao kham: mo" shad' khyo phung" to: mung:- dau: geim" geim" re ngaui" xeim: khyo" phad' ngaui" ra" gug'nyhug' mao jham re ai: jo, qo mae cid' ako".

³⁹Ce: vao kham: mo" qe, mae vae: zo: jaung: byid lam: jo; ra". Ai: qe, mae" dashad' khyo vae: zo: jaung: shid' lam: lam: jo; ako". Ce: vae: zo: jaung: jham mae- dau: geim" geim" phad' ngaui" byid' ra" xeim: ngad ngad- qobo qhid' mae" qhaug' byid' ra" xeim: khyo" ngad ngad- jhin tug' xe' ra" ngaui" xeim: khyo" ngad ngad- gug'nyhug' jham re se' ako".

⁴⁰Ai: qe, mae" taung gaung shad' mae- daru" za" ru vae: zo: jaung: byid lam: jo; ako". Mug: am: shad' mae" kham: mo" vao kham: dung: dashad' mae ai: vae: zo: jaung: shid' lam: lam: ngad: ako".

⁴¹Xeim: ngaui" byid: nae" gug'nyhug' jham re se' nae" qhid' mae" kai" ra" vae: zo: jaung: alhab' wa she' lam: ngad: ra". Vae: zo: jaung: byid lam: wa qe, akhug shad' mae jo, mung: byid lam: wa vang" nho: taung gaung shad' mae jo; ako".

⁴²Cui" ke' ra" qe, zo: mae" vae: zo: jaung: byid lam: wa- laug zang re kho' yang: kad' to" ru ngad mung:- dau: geim" geim" phad' ngaui" byid' ra" xeim: nyhang" seim" nae" qhid' mae" ci: ako". Aijham wa dadaung" daung" myhao mung: aigu: nho: adao shad' athao jham wa byid khyug de, mung: dashad' khyo dadaung" dathu thu bo: ako". Ngaui" xeim: gug'nyhug' re se' au: ce: zai jham alhab' re ce: vae: zo: jaung: jham: adao mae shaung: to" ako".

⁴³Vae: zo: jaung: jham: nho: akham" gam: mae lo, shid' shi: shi: lu: ra" alo, de; ako". Xeim: ngaui" byid: nae" sho: alhab' re ai: vae: zo: jaung: jham: adao mae to" ako".

⁴⁴Ailao" yao: wa ngo re akhug shad' vang" khyo jhui" vao lo" ra". Akhug shad' vang" mae kham: bung" jo; ra" qe, shid' qe, jo; ako". Daqe, wa- mug: am: shad' mae" kham: mo" nhae mae- mug: thao shad' qang mung: jo; jo; ra". Aimung: gatau daqe, wa- mug: thao shad' kham: mo" nhae mae mug: am: shad' khyo qang mung: jo; jo; ra".

⁴⁵Aiyaug wa ngo re- ai: mug: thao shad' qang: jo; ra" qe, wa Caung:pa" Yham mae caung da" byid' ra" khinjaung qe: qhid' mae" ngad:-

⁴⁶Aimung:- mug: am: shad' khyo qang: ra" qe, wa phan mae caung da" byid' ra" khinjaung qe: qhid' mae" ngad: ga: ngo re ta" shid' ra". Khin jaung qe alhab' wa- Zadog mae" myhung: gyo" lo mo, ngad: ako". Yao: bam wa- ASANG: nho: qhid' kheim: mae yao: re caung da" byid: nae" qhid' mae" akhang" qo" ra" Levi kaung boe: mae" mo, ngad: ako".

⁴⁷Ai: yaug wa akhug shad' vang" re ka" qu" ra"- airu wa byid khyug ngad mung:- dashad' khyo dayo daung" daung" bo: ra". Caung:pa" Yham wa ba vao shad' mae jo; ra"- aimung: ai: nho: jao: kheim: mae phan dalam: jo; ra".

⁴⁸Ai: thao yao: wa ngo re- Caung:pa" Yham khyo vao ye" ra" kham: mo" qe, khyo jhui" ye" ra". Yao: wa vao kham: mo" re ka" qu" ra". Airu wa ngo" daung" no, mung:- daxe: byid daung" daung" thau: ra" khinqae dashad' dalam: jo; ra".

⁴⁹Shid' xe daung" lae mung: daxe: shid' daung" no; ra" zam thao jham wa vao kham: mo" qe, khyo joe" sho' myhae" to" ako". Zang baung: shid' lam: wa- vao kham: mo" nho: dashad' khyo dalam: lam: jo; jo; ako".