Read Maru EZEKELA 46 Bible Online

EZEKELA 46 - Maru bible

EZEKELA 46

¹Kho:kham ASANG wa- akhug vang" khyo vao lo" ra" ba thug' shad' kham: wa mau" zaui" ra" khyaug' ba: geim" mae pyid' to: ca" ra". Ngadqere: Dugno: Ba we' Lho" Xin: poe ayo, mae kam" wa phung" to: ca" ra".

²Eib: khang" zug: wa taung gaung shad' vang" mae"- kham: mo" nho: kham: baung zang nhae mae" kham: dung: khyo qe, mo" kham: dung: khyo"- vao lo" au:- khinjaung qe wa- yao" nho: dau: geim" ngaui" byid' ra" xeim: jham re phad' ngaui" mung:- yao" nho: zam" khug: xeim: re qhaug' byid: ca" ako". Ai: kham: mo" mae- yao: caung:pa" mung: dam: phao: thug' lo" ca" ra". Kham: mo" re myi" thao joe" sho' magai: pyid' to: genae".

³Dugno: Ba khao:ngo" we' Lho" Xin: poe khao:ngo" mo,byu qe wa- ai: kham: mo" jao: kheim: nhae mae goe; gyo" mung: ASANG re caung:pa" ca" ako".

⁴Dugno: Ba mae eib khang" zug: wa- ASANG re dau: geim" phad' ngaui" byid: ca" ra" xeim: khyo"- alhab' geim" pe" qo mabo: ra" yao nau" khyaug' dau: we' yao: lo: dadau: cili" ca" ra".

⁵Yao lo: dadau: we' daga" gaug zo dajhid' bo cili" mung:- yao nau" dadau: we' daga" pe" ngadqere: ci nug: ru cili" ca" ra". Gaug zo xeim: daphai" mae zhanlun xau nhad' kaug' boci: li" ca" ra".

⁶Lho" xin: poe mae yao: wa nung: jaung lo: nau" dadau:- yao nau" khyaug' dau: we' yao lo: dadau:- alhab' geim" pe" qo mabo: ru cili" ca" ra".

⁷Nung: jaung lo: dadau: dau: we' yao lo: dadau: dau: qhaug' byid' ra" xeim: mae- gaug zo dajhid' jhid' we' yao nau" dadau: dau: mae eib khang" zug: yao: yao: myid: ngaui: ru pe" ngadqere: ngaui" xeim: boqhaug' byid: ca" ra". Gaug zo daphai" we' daga" zhanlun xau nhad' kaug' boqhaug' byid: ca" ra".

⁸Eib khang" zug: wa- lae: ra" qe, mo" khyo yao: vao ye" ra" kham: khyo" dam: phao: thug' lo" ca" ra".

⁹Poe dalam: lam: mae- ASANG re caung:pa" nae" qhid' mae" mug: am: shad' kham: mo" khyo" vao ye: mo, wa- yao: bam bin: caung:pa" lao" mug: thao shad' khyo" dam: thug' lo" ca" genae". Aimung: mug: thao shad' kham: mo" khyo" vao ye" ra" mo, byu qe wa- mug: am: shad' kham: mo" khyo" phao: thug' lo" ca" genae". Khag' re: yao: yao: vao li" ra" gau: khyo" madam: gai: thug' lo" nae"- tau" te' vang" vang" khyo" phao: thug' ca" ra".

¹⁰Eib khang" zug: wa mo, byu qe vao ye" ra" au: vao ye: mung:- yao: bam phao: thug' ra" au: phao: thug' ca" ra".

¹¹Zo: shaug' poe ba na jham we' poe qi: jham kad' na: au:- nung: jaung lo: dadau:- dau: mangad lao" yao lo: dadau: dau: we' daga" gaugzo daphai"- yao nau" dadau: dau: we' caung:pa" mo, byid: nug: ru pe" ngaui" xeim: ngadqere: bobo ca" ra". Gaugzo daphai" we' daga" zhanlun xau nhad' kaug' boqhaug' byid: ca" ra".

¹²Eib: khang" zug: wa- dau: geim" phad' ngaui" ra" xeim: ngad ngad- zam" khug ngaui" xeim: ngad ngad qhaug' byid: nug: ngad: re- akhug shad' vang" khyo vao ye" ra" kham: mo" re yao" qhid' mae" phung" to: byid: ca" ra". Yao: wa Dugno: Ba mae qhaug' byid' ru we' dakhyo: yao: xeim: ngaui" byid: ca" ra". Aimung: yao: dam: phao: thug' lo" thao" kham: mo" re pyid' pye' ca" ra".

¹³ASANG ta" ra"- ne, seim khao:ngo"- pe" qo mabo: ra" dazin byang" va" yao nau" dadau: dau: re dau: geim" geim" phad' ngaui" mung: ASANG re qhaug' byid: ca" ra". Ce: ngaui" xeim: re ba khao:ngo" qhaug' byid: ca" ra".

¹⁴Ai we' dakhyo:- ne, seim khao:ngo" jung: cin man" we' lhag' nae" qhid' mae" zhanlun xau shid' kaug' re- jung: cin man" dabye: je je qhaug' byid: ca" ra". ASANG re- ce: ngaui" xeim: qhaug' byid: nae" thung" tarha" wa- apyad ato mae gang" tang: jo, ca" ra".

¹⁵Yao nau"- jung: cin man" we' zhanlun xau gu: wa- apyad ato mae ne, seim khao:ngo" ASANG re qhaug' byid: ca" ra".

¹⁶Kho:kham ASANG amyin" byid' ra". Eib khang" zug: qe- yao: sang: ra" myidgaung dacug' cug' dalam: lam: re yao" nho: yauggai zo: dayaug yaug: lo, khyo jhaung qhu" khyo" byid' pye' ngad: re- ai: myid gaung re- ai: yauggai zo: wa yao" yham khaung ug' khug' nho: jo,nho" khyo" qo" sang: li" nae".

¹⁷Ngadqere:- eib: khang" zug: wa- yao" nho: myid gaung dacug' cug' dalam: lam: re yao" mau" zaui: byid' ru dayaug yaug re byid' pye' ngad: re- ai: myid gaung wa- dam: tug' byid' ra" zin joe" lo: au: eib khang" zug: nho: jo,nho" dam: boe" lo" ca" nae". Ai: mug: myid wa yao: sang: ru ngad mung: yao: we' yao" nho: yauggai zo: qe za: ai re apyad ato khyo" qo" sang genae".

¹⁸Eib khang" zug: wa- mung" byu qenho: jo, nho" re yao: bam: lo, mae" magai: yu: pye' byid: nae". Yao" yang yao" nho: yauggai zo: qere byid' ra" pe" myid gaung ngadqere:- yao: re kho' gae: to" ra" myid gaung mae" ngad ca" ra". Ailao" yao: wa nga" nho: byumyu" qenho: mug: myid re lhad' yu: pye' ra" khyo" nga" nho: byumyu" qere madeim" zag zo: nae".

¹⁹Ai: thao ai: yaug wa ngo re- akhug shad' vang" mae" mug: thao shad' kham: mo" nhae mae- mug: am: shad' qang: ra" qe, khyo vao ye" ra" kham: dung: khyo jhui" ye" lo" ra". Cegu: wa khinjaung qe: qhid' mae" gyang" lho" qe, jham ngad: ako". Yao: wa qe, jham: nho: ba vao shad' jo, qo dalam: re lo,nyhug' ceim" ke' mung:-

²⁰Ce: jo, qo wa- khinjaung qe- qobo qhid' mae" qhaug' byid' ra" ngaui" xeim: mangad: lao" dam: xe' ra" ngaui" xeim: jham mae" sho: jham re xaug' ra" jo, qo- ngaui" xeim: jung: cin man" re phad' ra" jo, qo ngad: ruyang- mo,byu qere dae qo" te' nae" magyang" malho" ru pe" daja: re:- taung gaung shad' vang" khyo maqo" tai: ye: nae" ngad: ako".

²¹Ailao" yao: wa ngo re- taung gaung shad' vang" khyo jhui" ye: mung: ai: vang" ajheim byid lam: jheim khao:ngo" mae- byid xe daung" qhang mung: sam xe daung" lae: ra" qe, nau" dalam: lam: bo: rure qhu" byid' ra".

²³Ai: qe, khao:ngo" re laug khinqae: yang gam: sho' qae: to: mung:- khinqae tin: mae myi:khyeim" jham kad' ke' to" ako".

²⁴Ai: yaug wa ngo re- cejham wa Caung:pa" Yham mae" daui daui mo,- mung" byu qe qhaug' byid' ra" xeim: jham re jho' ra" vae: yhaung" qe, jham ngad: ako"- ga: ta" shid' ra".