Read Maru EZEKELA 48 Bible Online

EZEKELA 48 - Maru bible

EZEKELA 48

¹Mug: am: shad' mae" mug: kyo: wa- Mug:gaung: panglai: mae" ba thug' shad' Hethlon vomo" khyo- aimae" Hamad Bam gyo: khyo" Enon vomo" khyo- Damasku mung" we' Hamad mung" mug: kyo: joe" sho' ngad: ra". Byumyu" kaung boe: khao:ngo" wa mug: am: mae" mug: thao shad' khyo o mae bo: ru we' dakhyo:- ba thug' shad' mug: kyo: mae" ba vao shad' Mug:gaung: panglai: joe" sho' jo; du: lo" ra" mug: myid dau dadau dau re qo" yu ca" ako". Dan Ashe Nabhtali Manashe Ephrim Rubin Yuda

⁸Aimae" xo' ra" mug: myid dau wa gakai: lai mau" zo" ceqhid' mae" kho' san: to: ca" ra". Airu wa mug: am: mae" mug: thao joe" sho' shid tug: ngo" taung lae bo mung: ba thug' shad' mae" ba vao shad' re: byumyu" kaung re byid' ra" dau we' daqi" ngad ca" ra". Caung:pa" Yham wa cedau: gu: mae bobo: ca" ra".

⁹Cedau: gu mae" agaung: mae"- qhang khyo man: 10- lu phyao: man: 8- bo: ra" gu: wa gakai: lai mug: myid dau ngad mung: ASANG re qhaug' byid: ca" ra".

¹⁰Khin jaung qe wa- ce: gyang" lho" jo, qo mae" gae bam dabam qo" yu ca" ako". Ba thug' shad' mae" ba vao shad' joe" sho' yao: bam: gae bam wa shid' tug: ngo" taung lae bo mung: mug: am: shad' mae" mug: thao shad' datug' lae ka" byid: ca" ra". ASANG: nho: Caung:pa" Yham wa ce: jo, qo agaung: mae jo, ca" ra".

¹¹Ce: gyang" lho" jo, qo wa- Zadog nho: myid:zo: qe mae" khinjaung qe: qhid' mae" ngad: ra". Yao: bam wa ngo re jhaug' zaug taung" caung da" byid: mung: gakaung mae" Levi byu qeru: shad' ru kad' ra" Israel byumyu" qe mae mabo: bo ngad: ako".

¹²Aimung: yao: bam wa- Levi byu qe sang: ra" jo, qo we' xo' ra" gakai: lai jo, qo re qo" yu ca" mung: ai wa alhab' tho' je: gyang" lho" nae".

¹³Levi byu qere- gakai: lai jo, qo dalam:- khinjaung qenho: jo, qo mae" mug: thao shad' re qo" yu ca" ako". Ai: jo, qo re ba thug' shad' mae" ba vao shad' joe" sho' khyo 10 man: bo mung: ba thug' shad' mae" ba vao shad' joe" sho' khyo 4 man: bo ca" ra".

¹⁴ASANG re qhaug' byid' ra" jo, qo gu: wa- ai: mug: myid mae" gai: thao" ngad mung:- aimae" kholam: rere:- magai: aung" pye' nae"- tha" re: magai: jho" tha" nae"- gayaug rere: magai: jho" ab byid: nae". Ai wa gyang" lho" mung: ASANG: yang sang: ru ngad: ra".

¹⁵Gakai: lai jo, qo mae" dang: ra" gu: qhang phyao: khyo 10 man:- lu phyao: 2 man: lae: ra" myid gaung wa magyang" lho" ngad: ra". Ngadqere:- mung" byu qe ai re gai: ci: ra". Yao: bam wa ai: jo, qo mae gai: na mung: ai: myid gaung re qo" ci nae" ngad: ako". Vomo" wa- ai: jo, qo agaung: mae yao: jo, ca" ra".

¹⁶Aimung: ai: jo, qo wa byid shad' geim" dakhyo: za: dashad' 7560 pe: bo: li" nae".

¹⁷Vomo" avai: ayae shad' khao:ngo" gam: sho' mae- 420 pe: lu: ra" myid keim jo, ca" nae".

¹⁸Gyang" lho" jo, qo mae" mug: thao shad' te' te' mae xo' ra" jo, qo mae- vomo" re bin: te: thao dang: ra" myid gaung wa- ba thug' shad' qhang khyo 4 man:- lu khyo 2 man:- ba vao shad' qhang khyo 4 man:- lu khyo 2 man:- aigu: wa- vomo" mae na: ra" mo, qho: zo: qho: shaug' nae" mug: myid khyo" ci ca" genae".

¹⁹Vomo" mae na: ra" yaug khao:ngo" wa pe" kaung boe: mae" ngadqere:- ai: mug: myid mae qo" qho: zo: qho: shaug' genae".

²⁰Aimung: yang: gatau kho' to" ra" vomo" agaung: mae" jo, qo alhab' wa- byid shad' geim" dakhyo: za: qhang mung: shad' khao:ngo" khyo 10 man: man: bo: ra". Aigu: mae vomo" jo, qo yu: to" ra" gu: re: bobo: li" nae".

²¹Caung:pa" Yham- khinjaung qenho: mug: myid we' Levi byu qenho: mug: myid: vomo" bobo: ra" ce: jo, qo mae" ba thug' shad' we' ba vao shad' dang: ra" myid gaung gu: wa- eib khang" zug: sang: ru ngad: ra". Aigu: wa ba thug' shad' khyo mug: kyo: joe" sho'- ba vao shad' khyo Mug:gaung: panglai: joe" sho' ngad mung:- mug: am: shad' wa Yuda kaung boe: sang: ra" dau we' mug: thao shad' Benyamin kaung boe: sang: ra" dau: yang mug: kyo: kyo" kho' to" ra".

²³Ce: gakai: lai dau mae" mug: thao shad' mae wa- ba thug' shad' mug: kyo: mae" ba vao shad' Mug:gaung: panglai: joe sho' gu: re- dang: ra" byumyu" kaung khao:ngo" yang o mae" japhin: adai: ato' khyo" qo" yu ca" ako". Benyamin Simon Isakha Zebulun Gad

²⁸Gad kaung boe: re byid' ra" gae bam mug: mae" mug: thao shad' mug: kyo: wa- ba vao shad' mug: thao khyo- Tama mae" Kade qid thug' joe" sho'- aimae"- ba vao shad' mug: am: khyo- Egutu mug: kyo: cao" yang- Mug:gaung: panglai: joe" sho' ngad: ra".

²⁹Kho:kham ASANG ta" ra". Ceru wa- Israel byumyu" qe sang: yu nae" qhid' mae" yao: bam re mug: myid kho' gae byid: nae" khyo ngad: ra".

³⁰Vao ye" ra" kham: mo" daxe: shid' lam: jo; ra". Vang khyae bao byid shad' geim" dashad' 7560 pe: bo mung:- dashad' mae kham: dung: sam lam: bo: ra". Kham: dung: dalam: wa byumyu" dakaung boe: mae" mang mang: ra". Mug: am: shad' vang khyae bao mae" kham: dung: jham wa Rubin- Yuda we' Levi kaung boe" nho: mang mang: ako". Ba thug' shad' vang mae" kham: jham wa Yoseb- Benyamin we' Dan kaung boe" mang mang: ako". Mug: thao shad' vang mae" kham jham wa Simon- Isakha we' Zebulun- ba vao shad' vang mae" kham: jham wa Gad- Ashe we' Nabhtali kaung boe: bam: mang mang: ako".

³⁵Vomo" nho: vang byid shad' geim" wa qhang phyao: 30240 pe: bo: ra". Vomo" nho: mang wa Ana" mae" thao phyao: ASANG wa- ce mae ngad: ga: mang: li" nae".