Read Maru EZEKELA 5 Bible Online

EZEKELA 5 - Maru bible

EZEKELA 5

¹ASANG wa- shid ba: ra" yaug we"- tho' ra" shae pyang: dakhyae: yu mung: ni" nho: nhad' maui we' xae qaug: pye' wa,- aimung: ai: xae re jao jham mae lag mung: ai re sam bam khyo" wa,-

²Vomo" re vang" lhaung" ru baui: lao" xae sam bam mae" dabam re vomo" khug mae ngha" pye' wa,- aimung: vomo" taung gaung shad' mae nao du" qin" ra" au:- xae sam bam mae" dabam re yu yang: ni" nho: shae pyang" yang je; pye' wa,- dang: ra" sam bam mae" dabam re la khyo pye' sin" ke' wa,- aimung: ngo wa ai re shae pyang" yang cao" khe' zin: nae".

³Ai: xae mae" dajhid' re yu: to: mung: ni" mai bau: thao mae kag' zeim: ci wa,-

⁴Aimung: aimae" dajhid' re dam: yu yang: myi:khug' khyo shapye' zaui: ke' wa,- myi: mae nga" lo" vageshao:- ai: jo, qo mae" Israel damyu" geim" khyo myi: nga" du: joe" lo" vashao:- ga: ta" ra".

⁵Kho:kham ASANG wa- Yerusalem re qu" qu" shi: wa,- ngo wa ai re mug: myid: nho: agaung: mae- yao" avai: ayae mae gamung" dan: jham lhang" gam: mung: to' to: va".

⁶Ngadqere: Yerusalem wa nga" amyin" jham re tau: lhan: mung: yao: wa gamung" dan: jham tho' je: makhyang: mashab: ru qhu" byid' ra". Yao" avai: ayae mae" mung"dan: jham tho' je: maphug' cao" ru qhu" byid' ra". Yerusalem wa nga" amyin" jham re ngag: ha: pye' mung: nga" nho: tarha" jham re cao" nae" maqad ngad: ra".

⁷Yerusalem we"- ana" kho:kham ASANG ngo ta" na: rure tae" gyo: wa,- nao wa- nga" tarha" jham re maphug' cao"- mangad: lao"- nga" amyin" jham re macao" ra" khyo" yang- ni" avai: ayae lhang" gam: mae" mung"dan: byumyu" qe tho' qug: khai: je: boe" nhao: ava". Nao wa gamung" dan: byumyu" qe: nho: thung" li re cao" ava".

⁸Aimung: kho:kham ASANG ngo wa ni" gyevo ngad: ein: nao re ta" kyo" na va". Byumyu" alhab' qo" the' myao genae" khyi" ni" dao mae dao: kho' ru ngo khyo" byid: nae".

⁹Ngo nghang" rure nao kad' ra" mau" alhab' mathao mae- Yerusalem re qhid' phyao: khonhae" re: ngo makad' qu" ra" khyo: we' khonhae" re: madam: kad' nae" khyo" qobo dae byid: nae".

¹⁰Ai: mathao khyo"- myhi" pho" qe wa yao: zo: qere zo: mung: yao: zo qe wa yao: bam: myhi" pho" qere zo" li" genae". Ngo wa naonhaung" re qobo dae byid: mung: adaui na: dang mo, re shad' khao:ngo" khyo khe' sin" pye' nae".

¹¹Aimung: ngo wa kao so' daui: na: ra" Mao"So ngad: ru we' dakhyo:- ceru wa kho:kham ASANG: nho: dao: kheim: jham ngad:- naonhaung" wa nga" nho: Caung:pa" Yham re makhyang: mashab maca' majhad' ra" ja: jham: yang masan masin" boe" nhao: pye' ra" mathao mae ngo wa naonhaung" re nhag' makhyag' lo: thau: khyo" nae".

¹²Naonhaung" nho: byu sam bam mae" dabam: gu: wa vomo" khug mae no: phyo: we' vae: moe; qhug' mung: shid: byaug genae". Sam bam mae" dabam: gu: wa vomo" taung gaung mae shae pyang: jham: yang jhoe" pye' ru qhug' genae". Aimung: lo" thao" sam bam mae" dabam: gu: re wa la khyo khe' sin" pye' mung: yao: bam re shae pyang" yang cao" khe' nae".

¹³Naonhaung" wa ngo nhag' dag sho' nga" nho: nhag' yo: we' nhag' lam: zhau: ra" qam: re the' gyo: genae". Ceru alhab' boe" lo: au: re- naonhaung" nho: jhaug' mazaug: rure ngo nhag' yo: mung: ngo ASANG wa naonhaung" re dao: jhau va" ru naonhaung" khyag' ba: li" genae".

¹⁴Naonhaung" nho: avai: ayae mae" mung"dan: byu yaug khao:ngo" wa naonhaung" nhae khyo" lai: lo" re naonhaung" re qu" cae: co' mung: va: va: mae na: jo; li"- genae".

¹⁵Ngo wa naonhaung" re nhag' jam: yo: mung: naonhaung" re qobo dae byid' ra" au:- naonhaung" nho: avai: ayae mae" byumyu" qe alhab' wa gyaug: din: li" genae". Yao: bam wa naonhaung" re qu" cae: mung: naonhaung" re jung" pye' li" genae".

¹⁶Ngo wa naonhaung" nho: zo:ve re phyid' pye' byid: mung: naonhaung" re moe, shab' nhao nae". Naonhaung" wa naonhaung" re phyo' qheim" pye' nae" ga: nhao: ke' ra" ceim: ra" myo: khe' dae we' dakhyo: kham zo" ra" ve, moe; dae re kham zo" li" genae".

¹⁷Ngo wa bao" khug' we' naonhaung" nho: yao: zo: qere bin" se' pye' nae" seyo: gug'nyhug' lhe: jham re nhao: ke' byid: mung: naonhaung" re se' pye' nae" ra" no: phyo:- aqan alan mau" we' gye poe boe" nhao nae"- ngo ASANG ta" to: va"- ga: ta" ra".