Read Maru EZEKELA 6 Bible Online

EZEKELA 6 - Maru bible

EZEKELA 6

¹ASANG wa ngo re-

²Shid ba: ra" yaug we"- Israel nho: bam jham khyo qu" ke' mung: yao: bam re nga" mungdao: byid' ke' wa,-

³ASANG: mungdao: re gyo: nae" qhid' mae" ai: bam jham re ta" kyo: wa,- bam jham- byo, khao: jham- lao: khaung: jham re kho:kham ASANG ngo ta" shid' na: ra". ASANG: mung dao: re gyo: nae" qhid' mae" ta" kyo: wa,. Ai wa- mung" byu qe so alho re caung:pa" ra" jo, qo jham re phyo' qheim" pye' nae" shae pyang: re ngo nhao: ke' nae".

⁴Phan jham re phyo' sin" pye' mung: nae pyo: xau phan jham byo; lo" li" nae". Ai mae na: jo, mo, alhab' wa yao: bam: so alho jham: qhid' kheim: mae se' pye' ru qhug' genae".

⁵Ngo wa Israel qenho: byu maogaung jham re shapye' sin" pye' nae". Ngo wa yao: bam: shoqug: jham re ai: phan jham: lhang" gam: mae pye' sin" to: nae".

⁶Israel vomo" jham alhab' re phyo' qheim" pye' mung: yao: bam: phan jham we' so alho jham alhab' wa aje, aman" khyoe' mhan" pye' ru qhug' nae". Yao: bam: sheim nae pyo: xau phan jham wa gyoe, sin" lo" mung: yao: bam kad' to" ru ja: khao:ngo" wa byaug: lo" li" nae".

⁷Khyi" khao:ngo" mae byu jham wa se' pye' ru qhug' mung: mashid na: dang mo, wa ngo ASANG ngad: rure lhang: yu: li" genae".

⁸Ngo wa damyo" gu: re se' pye' ru mae" phao: loe, nhao mung: yao: bam re su: byumyu" qenho: phaung gaung: khyo khe' sin" pye' nae".

⁹Yao: bam wa ai: mae pyaung" nha: to" ru qhug' li" genae". Ailao" yao: bam wa- ai: jo, qo mae ngo re myid: beim: mung:- yao: bam khyo" yang ngo re tho' so alho jham re je: o ngaui: ra" mathao mae ngo: yang yao: bam re qobo dae byid: mung: nga: yeim nhao: rure ba: li" genae". Aimung: yao: bam wa yao: bam kad' lai: lo va" ra" makhyang: mashab: ru we' ca' ja: mau" zo" jham: nho: mathao mae yao: bam yao" gaung re ca' li" genae".

¹⁰Yao: bam wa ngo ASANG ngad: rure ba mung:- ngo ta" peim" ru wa mageim: akeim mae ta" kyaug' ru mangad: nhaung ga: ba: li" genae"- ga: ta" ra".

¹¹Kho:kham ASANG wa- ni" lo, re nai: sham" pye' wa,- ni" khyid zab: thang" ke' wa,- Israel byumyu" qe kad' ra" makhyang: mashab: ru we' maca' majhad' mau" jham alhab' mathao mae kaug' gyi: ngug: ke' wa,- yao: bam wa gye poe mae- bao" khug' yang we' no phyo: jham: yang shid: li" genae".

¹²Va: va: mae na mo, wa no: phyo: qhug' mung: shid: li" genae". Ajhao" mae na mo, wa gye poe mae se' pye' ru qhug' genae". Mashid na: dang mo, wa vae moe' shid: lo" li" genae". Yao: bam wa nga" nho: nhag' yo: thin: ru alhab' re qo" ba: yu: li" genae".

¹³Sushid mao gaung jham wa- so alho jham: phaung gaung: mae phan jham: lhang" gam: mae sin" bam: jo; li" genae"- myhao ra" bug gaung khao:ngo" mae we' bam au: khao:ngo" mae- sag' jam: gae khao:ngo" we' shikhai: mo" qao: khao:ngo" mae- yao: bam: so alho jham re xeim: phad' ngaui" byid' ra" jo, qo khao:ngo" mae sin" jo; li" genae". Ailao" yaug khao:ngo" wa ngo ASANG ngad: rure ba: li" genae". Ngo kho:kham ASANG ta" to: va".

¹⁴Ngad va"- ngo wa nga" lo, re yheim" ke' mung: yao: bam: mung"dan: re phyo' qheim" pye' nae". Ngo wa ai re- mug: thao shad' din"pyad' yo mae" mug: am: shad' Ribla vomo" joe" sho'- Israel byumyu" qe na: ra" jo, qo khotau: re: matang" to: lo: sho' mug: gao: kad' pye' byid: nae". Ailao" yaug khao:ngo" wa ngo ASANG ngad: rure ba: li" genae"- ga: ta" ra".