Read Maru EZEKELA 7 Bible Online

EZEKELA 7 - Maru bible

EZEKELA 7

¹ASANG wa ngo re-

²Shid ba: ra" yaug we"- ceru wa qam: bo: ra" ASANG ngo khyo" yang Israel mung" re ta" na: ru ngad:- ceru wa damung" geim" nho: athao" ngad va"- ga: ta" ra".

³Israel we"- athao" joe" lo va". Nao kad' lai: lo va" ru: qhid' mae" ngo wa nao re dao: kho' na: ru yang ngo nhag' yo" rure nao kham zo" li" nae". Ni" nho: maca' majhad' mau" zo" alhab' qhid' mae" nao re ngo dam: xe' byid: nae".

⁴Ngo wa nao re tang" to: nae" mangad: nao re nhag' khyad' myid re: qhu" byid: nae" mangad:- nao kad' lai: lo: ra" maca' majhad' mau" jham: mathao mae nao re ngo qobo dae byid: mung: ngo wa ASANG ngad: rure nao ba: li" nae"- ga: ta" ra".

⁵Ceru wa ASANG ta" na: ru ngad: ra". Kyi" khyag' ru dalam" thao dalam: naonhaung" jhao" joe" lo: na: ra".

⁶Alhab' baui" byaug va". Ce wa athao" ngad: va". Naonhaung" wa bin: avako".

⁷Ai: mug: mae na: ra" naonhaung" qhid' mae" athao" wa joe" li" na va". Bam dao mae" phan yham jham mae poe makad' lo: ashug ashag za: mung nae" ayo, wa jhao" li" na: ava".

⁸Khomyhao" mamyao" re naonhaung" wa thin: ra" nga" nhag' yo: so' alhab' re qo" kham zo" li" genae". Ngo wa naonhaung" kad' lai: lo va" mau" qhid' mae" naonhaung" re dao: kho' na: ru ngad:- ngo wa naonhaung" kad' ra" maca' majhad' mau" jham alhab' qhid' mae" dam: xe' byid: nae".

⁹Ngo naonhaung" re tang" to: nae" mangad:- naonhaung" re nhag' khyag' myid re: qhu" byid: nae" mangad:- naonhaung" kad' lai: lo: va" maca' majhad' mau" jham: mathao mae naonhaung" re ngo qobo dae byid: naeva" rumung: ngo wa ASANG ngad: ru we' ngo wa naonhaung" re qobo dae byid: yaug ngad: rure naonhaung" ba: li" genae".

¹⁰Israel qhid' mae" byo; qeim: ra" ba na joe" li" na va". Aqan alan mau" wa dae xo: laug: li" ra". Ngad beim" ru wa myhao: thao" mae joe" ava".

¹¹Aqan alan mau" wa apyag' avhan" mau" re je: boe" thug' ke' nhao: ra". Yao: bam: pe" daja: re: madang nae". Yao: bam: jo,nho"- yao: bam: qi" qhang: mung: gyag: ru we' yao: bam: phungbao pe" re: madang lo: nae".

¹²Ayo, joe" lo: na: ava". Yaug khao:ngo" nho: dao mae Mao"So: qobo dae byid' ru gyo" zao" lo nae" ngad: ruyang vai zo: aung: zo: kad' ru wa pe" lajheim: mabo nae" ba na joe" li" na: ava".

¹³Mao"So: nhag' yo" ru wa yaug khao:ngo" dao mae jo; ru yang phaga: pho" wa yao: yao: ci: yhan" pye' ra" ru alhab' re dam: qo" yu sho' kao maqhang: na lo nae"- makhyang: mashab mo, maqo" daui: na: ru dang genae".

¹⁴Labo" myang: li" mung: yaug khao:ngo" wa jin" jin" seim" ci: ako". Ngadqere: gye poe khyo khag' maye: ngad: ako". Pe"mung:ga"re Mao"So: nhag' yo" ru wa yaug khao:ngo" dao mae gyo" zao" nae" ngad: ra".

¹⁵Hau" mo" khyo jham mae jho" byo, jho" khe' zin" ako". Yham khug jham mae wa no phyo: we' bao" khug' boe" ra". Seyo: vogaung: mae yethug' na: ra" yaug khao:ngo" wa jho" byo, jho" khe' zin" ru mae shid: lo" li" genae". Aimung: vomo" khug mae na: ra" yaug khao:ngo" wa- no phyo: we' vae: moe' ru qhug' li" genae".

¹⁶Damyo" gu: wa lao: khaung: jham mae" kyaug' tao" ke' ra" phaung" kyug' jham we' dakhyo: bam jham khyo phao: loe; lo" li" genae". Yao: bam alhab' mo, wa yao: bam: qobo jham: mathao mae kaug' ngug: li" genae".

¹⁷Yaug khao:ngo" nho: lo, jham wa qam: nang: genae"- aimung: yao: bam: pad' laug jham wa qhad qhad ga: laui" li" genae".

¹⁸Yao: bam wa jid: mo" mai bau: ve, mung: dagaung: geim" nin" na: li" genae". Yao: bam: au: jham re myhaug' pye' mung: yao: bam alhab' mo, wa nga: khyoe' ru qhug' li" genae".

¹⁹Yao: bam wa yao: bam: qhang we' ngaui re hau" mo" khyo jham: khaung: mae basad we' dakhyo: shapye' sin" pye' li" genae"- Pe"mung:ga"re- ASANG: yang yao" nho: nhag' yo" ru vhe' sheim: thug' ke' au: ngaui: yang re: qhang: yang re: yao: bam re maqo" khyad' yu nae". Yao: bam wa aijham re yao: bam: nhag' dag sho' maqo" ci yao: bam: vae: dug: jham rere: maqo" gyi: nhao ngad: ra". Qhang we' ngaui wa yao: bam re qobo khug khyo jhui" lo" ako".

²⁰Qhid' phyao: yao: bam wa yao: bam: yaung" ra" laug sin" jham: mathao mae ngad beim" lai: lo gengadqere: yao: bam wa ai jham re maca' majhad' so alho jham kad' nae" qhid' mae" ci: pye' ako". Aimung: ASANG wa yao: bam: jo,nho" jham re yao: bam ca' byaug sho' kad' ra".

²¹ASANG wa- taungbug byumyu" qe: yang yao: bam re lhad' zo: nhao nae"- aimung: tarha" phyo' mo; yang yao: bam: jo,nho" re yu: pye' ru we' ai re masan masin" kad' pye' li" genae".

²²Nga" phug' de; ra" Caung:pa" Yham re masan masin" sho' kad' pye' au:- lhad' zo: mo, ai: khug khyo cad' vao ye: mung: masan masin" kad' pye' ra" au:- ngo mabo vao: tam" nae".

²³Ja: khao:ngo" wa athaui: anhaung" mung: jo; ra". Aimung: myid wa byu se' mau" byang" jo, mung:- ai: vomo" jham wa aqan alan mau" jham byang" jo; ra".

²⁴Ngo wa- makhyang: mashab: thao" ra" byumyu" qere ce: khyo jhui" lo mung: yao: bam re naonhaung" nho: yham jham re sang: yu nhao nae". Ngo: yang yao: bam re naonhaung" caung:pa" ra" jo, qo jham re masan masin" kad' pye' nhao: ra" au:- naonhaung" mae" qam: bo: thao" ra" yauggai gai lo: qe lhao" re:- yao: bam: myid: lam khyo cithao" pye' li" genae".

²⁵Nhag' lam: thao" nae" khyo joe" lo: na: ava". Naonhaung" wa yaug yo cae: tae" rure qho ngadqere: khonhae" re: ai re maqhug' genae".

²⁶Kyi" khyag' ru daja: thao daja: cao" lo mung: magai: ra" lau dao: jham wa abang mabyid xo' yang: xo' yang joe" vao lo: li" nae". Naonhaung" wa yao: bam gau: qhid' khae" yang: myao: rure qhu" byid: genae" qhid' mae" lapa qere mho' li" genae". Khinjaung qe wa mung" byu qere mho" shid' nae" ru pe" maqo" genae". Zug: ade, nhag' bo lau: de, qere: pha,jhi" byid: nae" pe" maqo" genae".

²⁷Kho:kham pho" wa kaug' ngug: li" nae"- kho:kham mau" wa myid: lao" rure to" pye' li" nae". Aimung: mung" byu qe wa gyaug: nin" na: bam: li" genae". Ngo wa naonhaung" kad' lai: lo: ru alhab' qhid' mae" naonhaung" re qobo dae byid: nae". Ai mung: naonhaung" yang su gaje qere dao: kho' ru we' dakhyo: yao: naonhaung" re ngo dao: kho' nae". Ceru wa naonhaung" re- ngo ASANG ngad: ru qhu" byid' li" nae".