Read Maru EZEKELA 8 Bible Online

EZEKELA 8 - Maru bible

EZEKELA 8

¹Ngonhaung" pyaung" nha: to: qhug' ru khyaug' zin ein: zin lho" khyaug' khye' ngo" ba: ba re- Yuda mae" pyaung" nha: to: qhug' mo, au: jhaung qe wa nga" yham mae ngo we' daga" na: bam: ako". Kho:kham ASANG: kheim: so' wa nga" dao mae nyag din taung" joe" gyo" li" ra".

²Ngo tau" qu" ke' re- xao su byu ru" ru myi: xao su byu akhyao qhu" lho dalam: re yao" nho: gaung phyid' dam: mae" o: gu: wa myi: ru" ru dau mung:- phyid' dam: mae" tho' gu: wa boe; qhui: to" ra" gyid: bo" we' dau: ra".

³Yao: wa lo, ru" rure yheim" ke' mung: ngo re au: cab' mae" zhab' she: yu: ra". Aimung: ce: qhu" lho mae Mao"So: byo wa ngo re mug: dao khyo to' yu mung: ngo re Yerusalem khyo jhui" ye" lo" ra". Yao: wa ngo re Caung:pa" Yham: nho: mug: am: shad' kham: mo" dung: akhug shad' khyo" jhui" ye" ra". Ai: jo, qo mae Mao"So nhag' yo" ra" so alho dalam: jo; jo; ra".

⁴Kheba qid gyaung: nhae mae ngo myao: qu" va" ru we' dau: ra" Israel qe: Mao"So: qhid' kheim: re qhu" byid' ra" bo" bao qhui qhui qhag qhag mung: rure the' myao:-

⁵Mao"So wa ngo re- shid ba: ra" yaug we" mug: am: shad' khyo qu" ke' wa,- ga: ta" ra". Ngo qu" ke' re kham: mo" dung: nhae mae Mao"So nhag' yo" ra" so alho dalho re ngo the' myao:-

⁶Mao"So wa ngo re- shid ba: ra" yaug we"- pe" boe" na: rure nao myao: i? Israel byumyu" qe wa ce: jo, qo mae maca' majhad' mau" kad' mung: nga" gyang" lho" jo, qo mae" je: je: va" lo" sho' ngo re khe' na: ako". Nao wa ce: tho' je yang maca' majhad' mau" jham re the' myao shinae"- ga: ta" ra".

⁷Yao: wa ngo re taung gaung shad' Caung:pa" Yham vang" khyo jhui" ye: mung: vang khyae bao mae" abung" dadung: re jhui" qhu" ra".

⁸Yao: wa- shid ba: ra" yaug we"- cemae vang khyae bao re cad' vao lo" wa,- ga: ta" ra". Ngo cad' vao lo" re kham: dung: dadung: re qhug' myao:-

⁹Yao: wa ngo re- vao ye: mung: ai: jo, qo mae yao: bam kad' ra" makhyang: mashab: ru we' maca' majhad' mau" jham re qu" qu" wa,- ga: ta" ra".

¹⁰Aimung: ngo yevao: qu" va" khinqae jham wa lhao maui jham we' masan masin" ra" gug'nyhug' jham: alho we' Israel byumyu" qe caung:pa" na: ra" gaja: jham: alho re tung" te' to" ako".

¹¹Shaphan nho: yauggai zo: Yazani bobo mung: Israel au: jhaung nhad' xe yaug ai: mae na: ako". Yaug khao:ngo" wa sheim nae pyo: ja: myidam dalam: lam: ci mung: ai: sheim nae pyo: ja: mae" myikhug' thug' ra".

¹²Mao"So wa ngo re- shid ba: ra" yaug we"- Israel au: jhaung qe azug' avho' kad' na ko" rure nao the' myao: i? Yao: bam alhab' mo, wa so alho jham byang" bo: jo; ra" qe, daqe, mae caung:pa" na: ako". Yao:bam wa- ASANG ngonhaung" re mamyao- yao: wa mung"dan: re shapye' to: co' va"- ga: gaui te' yang: ta" ako".

¹³Ai: thao ASANG wa ngo re- aitho' mae" je yang: lhao" maca' majhad' mau" jham re yao: bam kad' rure nao the' myao: li" nae"- ga: ta" ra".

¹⁴Aimung: yao: wa ngo re Caung:pa" Yham mae" mug: am: shad' kham: mo" khyo jhui" ye: mung:- Tamu so shid: lo" rure kaug' ngug: na: ra" myiqe: qere qhu" byid' ra".

¹⁵Yao: wa shid ba: ra" yaug we"- ai re nao myao: i? Ai: tho' je yang lhao" maca' majhad' mau" jham re nao the' myao shinae"- ga: ta" ra".

¹⁶Aimung: yao: wa ngo re- Caung:pa" Yham nho: akhug shad' vang" khug khyo jhui" vao lo" ra". Ai: gyang" lho" yham kham: dung: nhae mae phan we' khyo agyo: mae yauggai shid' xe yaug ko na: bam: ako". Yao: bam wa gyang" lho" yham shad' khyo nhaung thao" phaug' mung: ba thug' shad' khyo goe; gyo" mung:- ba thug' li" rure goe; pa" na: ako".

¹⁷ASANG wa ngo re- shid ba: ra" yaug we"- ai re nao the' myao: i? ce: Yuda byumyu" qe wa- cemae nao the' myao va" ra" maca' majhad' mau" alhab' re kad' mung:- damung" geim" mae aqan alan mau" re byo: lo" nhao ko" ru: yang za: nhag' madag ngad: ako" mangad: nae"- yao: bam wa ce: Caung:pa" Yham mae aijham re li" kad' gemung: ngo re je yang: nhag' yo: nhao: ako". Yao: bam wa ngo re magai: thao" ra" lo, mau" khyo" ngo re roe" ako".

¹⁸Yao: bam wa thin: ra" nga" nhag' yo: aso' alhab' re leim zo" li" genae". Ngo wa yao: bam re khyam" sa mabyid:- tang" to: nae" mangad:- nhag' khyag' rure: maqhu" byid: nae". Yao: bam wa qo" hug' qhi" hug' mung: ngo re akyu" mho' li" genae"- ngadqere: ngo wa yao: bam re matae" gyo: byid: nae".