Read Maru DANIELA 12 Bible Online

DANIELA 12 - Maru bible

DANIELA 12

¹Jid mo" pin: mai bau: ve; ra" mug: lagyo: wa ceru: ta" ra". Ai: ayo, mae ni" byumyu" re lhaug' zaung" ra" mug: lagyo: mo" Mikhae wa na: thug' qhu" li" nae". Ailao" ai: ayo, wa qug: khai: ayo, ngad: mung: byumyu" mung"dan: jham sao qhid' jo; qhid: li" au: mae" ana" joe" sho' mae qug' thao" ngad: li" nae". Ai: ayo, joe" lo: re Mao"So: mugsug' paug' mae mang tung" to" ra" ni" amyu" qemae" byu alhab' wa khyad' yu: ru qhug' li" genae".

²Shid: lo" va" mo, mae" myo: sho' mo, wa dam: daui: to" lo: li" genae". Damyo" gu: wa apyad ato kao so' qo" yu: li" genae". Aimung: daqhae" gu: wa apyad ato nga: yeim: ru dae leim zo" li" genae".

³Pha,jhi" bo: ra" au: jhaung qe wa mug:gaung mae" bao: ru byang" sho' yang qhi qhi mung: bao: jo; li" genae". Aimung: byumyu" myo: sho' mo, re jo: ru kad' cao" nae" qhid' mae" mho" shid' lo mo, wa- kyi jham we' dakhyo: khonhae" re: abao: jo; li" genae"- ga: ta" ra".

⁴Yao: wa ngo re aimung: Daniela we"- ana" wa ai: mugsug' paug' re pyid' pye' mung: mug: myid thao" yo, joe" sho' aire dazid dalam" yang thaung" to: wa,- ai: ayo, gu: mae boe" li" na: ra" mau" jham re ba: gyo: nug yang: byu myo: sho' mo, wa yao: bam: qam: re amyid: avho: phin" pye' li" genae"- ga: ta" ra".

⁵Ailao" ngo wa byu shid' zo: qid ye dung" kam" mae dashad' mae dayaug ye; jo; rure the' myao:-

⁶Yao: shid' zo: mae" dayaug wa qid meim shad' mae ye; jo: ra" mug: lagyo: re ceru: ga: myid' ra". Cera" mug' pho: mau" zo" jham thao" lo" nae" qhid' mae" khomyhao" myao" shinae" laug i?- ga: myid' ra".

⁷Mug: lagyo: wa shid' lo; geim" re mug:gaung khyo tau: to' ke' mung: apyad ato mae" Mao"So: mang mae mabaui mabyo; ra" dao:so: to" ra". Yao: ceru: ga: ta" rure ngo the' gyo"- ngo wa sam zin: dakhyae: myao" li" nae"- ga: ta" rure the' gyo"- Mao"So nho: byu qere yhin" ru thao" byaug lao"- cegu: alhab' bin: boe" byaug nae"- ga: ta" ra".

⁸Yao: ta" rure ngo the' gyo" ngadqere: aire ngo maba: gyo:- Ai:mung: ngo wa aire- asang we"- airu wa khoru: jo; boe" thao" lo" nae" laug i?- ein: myid' qu" va".

⁹Yao: wa Daniela we"- nao ana" lo" ca" va". Pe"mung:ga"re ce: dao: kheim: jham re zug' ci mung: lo" thao" ayo, joe" li" sho' nyham" to: ca" ra".

¹⁰Byu myo: sho' mo, wa kyang" san: pye' byid' ru qhug' li" genae". Makhyang: mashab mo, wa maba: gyo: genae"- ngadqere: yao: bam wa makhyang: mashab: mau" re kad' na: jo, li" genae". Pha,jhi" bo mo, za: aba: gyo: genae".

¹¹Ba khao: ngo" ngaui" byid' ra" phad' ngaui" xeim: re thang: pye' ra" ayo, mae" ngad mung:- ai wa qu" gyaug sho' ra" maca' majhad' ayo, mae" 1290 ba na wa lai: lo" li" nae".

¹²Ba na 1335 lai sho' jhaug' zaug: na mo, wa ngaui lho" ako".

¹³Aimung: nao Daniela we"- nao lo" thao" joe" sho' jhaug' zaug: na wa,. Ai: thao nao shid li" nae" ngadqere: lo" thao" ayo, mae ni" nho: aphug' jhaung qhu" khae: yu: nae" qhid' mae" kao so' dam: daui to" li" nae"- ga: ta" ra".