Read Maru DANIELA 2 Bible Online

DANIELA 2 - Maru bible

DANIELA 2

¹Nebugkhaneza kho:kham boe" ra" shid' zin ein: zin mae yao: wa yab mo, dalam: mo; ra". Ai: yab mo, wa yao: re maqo" yab losho' sang: kho: myid myo: nhao: ra".

²Aimung: yao: wa yao" nho: boe, phyid' mo,- man:dan: vha" mo,- yui jan: khau mo, we' jan: zho: mo, re khai: to: mung: yao: re ai: yab mo, phyid kyo: nhao: ra". Yao: bam li" mung: kho:kham pho" nho: qhid' kheim: mae ye; jo, gelao".

³Yao: wa yao: bam re ngo mo; ra" yab mo, dalam: re ngo sang: myid: kho" na: ai: yab mo, pe" lajheim: thug' rure ngo ba: nug: ga: ta" ra".

⁴Yao: bam kho:kham pho" re Aramig myan" khyo"- Asang kho:kham kao qhang sho' daui: na vashao:- ni" nho: yab mo, ngonhaung" re ta" kyo: la, ailao" ngonhaung" wa ai rure sho' kyo: nae"- ga: tau" ako".

⁵Kho:kham pho" wa yao: bam re naonhaung" yang ngo re ai: yab mo ta" kyo: mung: ai: yab mo, lajheim: ta" shid' ca" nae" ein: ngo myid: phyid' to: va". Naonhaung" maqo" ta" gengad: re- naonhaung" re adau atam" lao" cad' pye' mung: naonhaung" nho: yham jham rere: byo; qeim: bam: jo, nhao: pye' nae".

⁶Ngadqere: naonhaung" ai: yabmo, we' ai: yabmo; lajheim: shid' ja" geim" re qo" ta" ko" ngad: re wa naonhaung" re ngo jhaung qhu" jham khyo" byid: mung: ai: ra" khyo" nga: yhe' byid: nae". Aimung: ana" yabmo, pe" mo; rure: ta" mung: ai: nho: lajheim: re ta" kyo" ca" ga: ta" ra".

⁷Yao: bam wa kho:kham pho" re asang kho:kham nao: yang yabmo, za: aqo" ta" kyo: lao" wa ai: rure ngonhaung" sho' kyo: nae" ga: dam: tau" ako".

⁸Ailao" kho:kham pho" wa- ngo myid: ru we' dakhyo: yao: ngad vanhaung. Naonhaung" wa ngo re yab mo, maqo" ta" kyo: gelao"- naonhaung" alhab' mo; re dakhyo: za: qobo dae byid: nae" ein: ngo myid: phyid' rure ba: myao geyang: ayo, qhang qhang qhui: nae" phin" na: ako". Naonhaung" wa ayo, myao" lo" lao"- boe" nae" ru jham tha" byaug lai" byaug nae" rure myid: lao" mung: ngore xo' yang: ceim" mhug' nae" ga: naonhaung" yao" phaung khug mae myid vang" ci: ako". Yab mo, pe" mo; rure ngo re ta" kyo: gela, ailao" ai: yab mo, lajheim: pe" ngad: rure naonhaung" ngo re qo" ta" kyo: nae" ein: rure re: ngo ba: li" nae"- ga: ta" ra".

⁹

¹⁰Pha,jhi" byid: mo, wa ce: myid gaung: dao mae Asang kho:kham nao o: ru re qo" ta" kyo: nae" byu khag' dayaug re: mana- kho:kham khoyaug re: qi" qhang: thao" ru we' kheim: so' qi" thao" kho:kham lao" re:- yao" nho: boe, phyid' mo,- mandan: vha" mo, we' jan: zho: mo, re: airu: mho' ru makad' qu" ga: tau" ako".

¹¹Asang kho:kham nao mho' ru wa saung" qug: mung: so jham za: mangad: re xao su byu khag' re: maqo' kad' byid: genae"- ai bam wa xao su byu qe: phaung gaung: mae mana ngad: ako".

¹²Ailao" kho:kham pho" nhag' jam: phin" yo" li" mung: Babelon mung" mae" kho:kham re pha,jhi" byid: mo, alhab' re se' pye' nae" qhid' mae" amyin" khyo" ke' ra".

¹³Aimung: Daniela we' yao" byin cao: qe bo:bo mung: yao: bam alhab' mo, re se' pye' nae" amyin" lau dao: dalam: pyo: ke' ako".

¹⁴Ai: thao Daniela wa- byu se' nae" mau" vhin: to: qhug' ra" kho:kham pho" nho: kao zaung" zug: Ariog jhao" ye" ra". Daniela wa ta" nae" dao: kheim: jham re nyang" za: khyin mung:-

¹⁵Kho:kham pho" yang airu" ra" amyin" re pe" mung: khyo" ru Ariog re myid' qu" ra". Aimung: Ariog wa pe" boe" lo: ru Daniela re ta" shid' ra".

¹⁶Daniela wa aijao" kho:kham pho" jhao" ye: mung: yab mo, pe" lajheim: ein: bo: ru kho:kham pho" re qo" ta" kyo: nae" qhid' mae" akhang" mho' yu: ra".

¹⁷Ai: thao Daniela wa yham phao mung: yao" nho: byin cao: Hanania- Mishae we' Azaria bam re boe" lo: ra" khyo lo" ta" kyo" ra".

¹⁸Yao: wa mug:gaung mae" Mao"So jhao" nhag' khyag' ru qo" yu nae" qhid' mae" we' Babelon mae" pha,jhi" byid: mo, we' daga" yao: bam rere: mabo: se' pye' sho' yao: bam re ai: mug' pho: jab re qo" ta" sho' kyo: nae" qhid' mae" akyu" mho' nhao: ra".

¹⁹Aimung: ai: myi mae yao: ai: mug' pho: jab re Daniela jhao" qhu" lho mae pheim: qhu" mung: yao: wa mug:gaung mae" Mao"So re caung:khin" ra".

²⁰Mao"So wa pha,jhi" bo mung: kheim so' thin: ra" wo"- yao: re apyad ato mae caung:khin" byid: ge,.

²¹Yao: wa ayo, akhyin: we' yo, gin re zaui" ci: ra". Yao: wa kho:kham qere to' yaug khyo" yaug ngad: ra". Pha,jhi" we' laba lajhao byid' yaug ngad: ra".

²²Yao: wa no, mung: lanyham: lavho' mau" zo" jham re de: de: za: pug: qhu" ra". Aimung: yao: wa mug cad' khug mae nyham" to" ra" ja: re ba: ra". Yao: yao: re wa bo" bao: yang lhang" kham" ci: ra".

²³Phug' pho" qe: Mao"So we"- ngo wa nao re caung:khin" mung: nga: yhe; ra" wo". Nao wa ngo re pha,jhi" we' qam: o: byid' ra". Nao wa nga" akyu" mho' dao: tau: byid: mung:- kho:kham pho" re pe" ta" kyo: nae" ru qhu" byid' ava".

²⁴Aimung: Daniela wa kho:kham pho" yang kho:kham pha,jhi" byid: mo, re se' pye' nae" qhid' mae" amyin" byid' to: qhug' ra" Ariog jhao" ye" ra". Aimung: yao: wa yao: bam re dase' pye' ngo re kho:kham pho" jhao" jhui" ye: la,- ailao" yao" nho: yabmo, pe" lajheim: bo: ru yao: re ngo ta" kyo: nae"- ga: ta" ra".

²⁵Ailao" jao" Ariog wa Daniela re kho:kham Nebugkhaneza nho: qhid' kheim: khyo jhui" ye: mung: kho:kham pho" re- Asang kho:kham re ni" yabmo, pe" lajheim: bo: ru qo" ta" kyo: nae" yaug pyaung" nha: to" ra" Yuda qe mae" dayaug re ngo qhug' myao: va"- ga: ta" kyo" ra".

²⁶Kho:kham pho" wa Daniela (Belteshaza ga: re: mang: ra" yaug) re- ngo yabmo, pe" myao: ru we' airu pe" lajheim: bo: ru nao ngo re qo" ta" kyo: nae" i? ga: myid' ra".

²⁷Daniela wa Asang kho:kham we"- airu re boe, phyid' mo,- yui jan: zho: yaug- man:dan: vha" yaug- kyi do: ba: qu" yaug re: nao re qo" ta" kyo" ru mana-

²⁸Ngadqere: qug' ra" mug' pho: mau" jham re pheim: qhu" byid: yaug mug:gaung mae" Mao"So daso kam" na: ra". Yao: wa joe" lo nae" ayo, mae boe" nae" ru Asang kho:kham nao re kyo: byid' ava". Nao yab: jo, au: the' myao: ra" yabmo, qhu" lho re ana" ngo nao re ta" kyo: li".

²⁹Asang kho:kham nao yab: jo; ra" au:- joe" lo nae" ayo, nho: khyo re nao yab mo, mo; ra". Aimung: qug' ra" mug: pho: mau" jham re pheim: qhu" ra" Mao"so wa boe" lo nae" rure nao re qhu" byid' ra".

³⁰Ana" ngo re ce: qug' ra" mug' pho: mau" re qhu" byid' ra". Ai wa gaje qe tho' pha,jhi" je: bo yang: angad:- Asang kho:kham nao khyo" yang ni" yabmo, nho: lajheim: re ba: yu mung: nao jhao" joe" li" ra" myid: qu" khyo jham re ba: gyo: nae" qhid' mae" ngad: ra".

³¹Asang kho:kham we"- ni" qhu" lho mae nao wa ni" qhid' kheim: mae sulho aqi: dalam: qhi qhi mung: bao: ru we' qu" gyaug taung" ye; jo; ru the' myao: ra".

³²Ai: sulho au: lam wa gyang" thao" ra" qhang: yang kad' to" ra". Ai: nho: qao gao we' lo, wa ngaui: yang kad' to" ako".

³³Phyid' dam: we' paung daung: re wa gyid' yang kad' to" ra". Ai: nho: khyid shid' khyid wa jo, to' ngad: ra". Khyid vo: jham wa datam" wa jo, to' datam" wa zhogam: ngad: ra".

³⁴Nao aire qu" na: ra" au: re byo; khao: mae" laug baui qi: dabaui khag' yang mazao" tin" ru bai" gyo" lo mung: sulho nho: jo, to' we' zhogam: khyid vo: re lapye' ra". Aimung: ai: khyid jham re aje, aman" pye' phyi: sin" pye' ra".

³⁵Ailao" jao" jo, to'- zhogam:- gyid: bo"- ngaui we' qhang jham gyoe; gyo" mung: xaung: gaung- gaug nao: jao: mae" phalhug' we' dakhyo: boe" lo" ako". Airu alhab' re la hug' yang cidao" lo" mung: pe" khu re: matang" to: co' ngad: ra". Ngadqere: ai: laug baui wa myhao: li" mung: myid gaung geim" re nghoe' nhai" pye' ra" bam boe" lo: ra".

³⁶Ceru wa ai: yabmo, ngad: ra". Ana" Asang kho:kham nao re ngo ai: lajheim: ta" kyo: nae".

³⁷Asang kho:kham we"- nao wa kho:kham alhab' mae je: qi" qhang: thao" yaug ngad: ra". Mug:gaung mae" Mao"So wa nao re khosin" boe" nhao mung: nao re kheim: so' qam: o: we' nga: yhe' ru byid' ava".

³⁸Yao: wa nao re byu na: ra" myid gaung dao mae na: ra" byu alhab' re eib: ra" yaug we' gug'nyhug' we' ngho' jham alhab' dao mae eib: ra" kho:kham boe" nhao: ra". Nao wa qhang au: lam ngad: ra".

³⁹Ni" thao mae ni" mung"dan: qhi" maqi" qhang: ra" mung"dan: dalam: thug' li" nae". Ai: thao sam lam: ein: ra" gyid bo" mung"dan: wa myid gaung geim" re eib: li" nae".

⁴⁰Aimung: thao mae byid lam: ein: ra" mung"dan: wa jo, to' qhi" qao mung: ja: khao:ngo" re phyo' pye' mung: aje, aman" kad' pye' li" nae". Jo, to' wa ja: khao:ngo" re aje, aman" kad' pye' ru we' dakhyo:- ai: ru wa yao" qhid' mae" mung"dan: jham re aje, aman" kad' sin" pye' li" nae".

⁴¹Khyid vo: we' khyid nyhug' jham wa datam" wa jo, to' datam" wa zhogam: ngad: rure re: nao the' myao: ra". Ce: ru wa ai: mung"dan: shid' gao kho' pye' qhug' nae" ga" ra" lajheim: ngad: ra". Ai: mae jo, to' we' zhogam: myid zhai: lhag' bo: jo, rumung: jo, to' nho: qam: dakhyae: bo: li" nae".

⁴²Khyid nyhug' jham wa jo, to' datam" zhogam: datam" ngad: ru yang mung"dan: dakhyae: wa qam: bo nae"- mung"dan: dakhyae: wa qam: nang: nae" ga" ru ngad: ra".

⁴³Jo, to' we' zhogam: lhag' rure nao the' myao: ra". Ceru wa mung"dan: mae" kho:kham qe wa myibyid: myiyu kad' mung: dang" qhan: nae" phin" li" genae". Ngadqere: jo, to' we' zhogam: magai: lhag' ru we' dakhyo: yao: bam qam: maqo" dang" qhan: li" genae".

⁴⁴Ai: kho:kham qenho: apyad ayo, mae mug:gaung mae" Mao"So wa khonhae" re: mathao" magan: ra" mung"dan: dalam: re te" to" li" nae". Airu re khonhae" re: maqo" aung: pye' li" genae". Ai: yang yaug: kam" wa ai: mung"dan: alhab' re bin sho' phyo' qheim" pye' mung: ai: thao apyad ato mae gang" tang: jo; li" nae".

⁴⁵Laug baui dabaui wa khag' yang re: mathaung" zao" ru byo, khao: mae" bai" gyo" lo mung:- jo, to' gyid: bo" zhogam: ngaui we' qhang: yang kad' to" ra" sulho re lopye' rure nao the' myao: ra". Qi" qhang" ra" Mao"So wa Asang kho:kham nao re joe" lo nae" ayo, mae boe" nae" rure ta" shid' na: ra". Ngo wa nao re nao the' myao: ra" yabmo, khyag' ta" kyo: mung: ai: nho: lajheim: agyang" re pheim: kyo: va"- ga: ra"ra".

⁴⁶Kho:kham Nebugkhaneza wa myid gaung khyo goe; gyo" mung: Daniela re xeim: phad' ngaui" byid: nae" we' qhaug' byid: nae" amyin" khyo" ke' ra".

⁴⁷Kho:kham pho" wa ni" nho: Mao"So wa so alhab' tho' je: qi" qhang yaug ngad: ra". Kho:kham qe: dao mae" ASANG ngad: ra". Aimung: qug' ra" mug' pho: jab jham re pheim: thug' qhu" byid: yaug ngad: ra". Ce: qug' ra" mug' pho: jham re nao qo" sho' kyo" ra" mathao mae ceru re ngo ba:- ga: ta" ra".

⁴⁸Alao" yao: wa Daniela re myhao: ra" aya: jo, qo mae san: to: mung: phug' de; ra" jhaung qhu" myo: sho' byid' ra". Yao: re Babelon mung"dan: dao mae eib nhao mung: kho:kham pha,jhi" byid: mo, nho: au: jhaung khyo" san: to" ra".

⁴⁹Daniela yang kho:kham pho" re mho' ru we' dakhyo: Shadrag Meshag we' Abednego bam re Babelon mung"dan: dao mae eib nae" qhid' mae" san: to" ra". Daniela kam" wa kho:kham vang" khug mae za: na: jo; ra".