Read Maru DANIELA 3 Bible Online

DANIELA 3 - Maru bible

DANIELA 3

¹Kho:kham Nebugkhaneza wa myhao phyao: khyaug' xe daung" lae phyao: khyaug' daung" bo: ra" qhang sulho dalam: kad' nhao mung: Babelon mung"dan: Dura jao: dae mae zhaug' to: nhao: ra".

²Aimung: kho:kham pho" wa mung"dan: alhab' mae" kho:kham nau" qe- mang: zug: qe- gyezug: mo" qe- mung" zug: ade, qe- ngaui ban" zam: mo,- Tarha" agyi qe- Tarha" zug: mo" qe we' gatau: zug: alhab' re daga" li" zang" phaung genae" qhid' mae" amyin" khyo" ke' ra".

³Yao: bam wa kho:kham Nebugkhaneza zhaug' to" ra" sulho re qhaug' byid' ra" phaung mae li" bozaung ca" ako". Ce: zug: ade, qe alhab' mo, sulho re qhaug' byid' ra" poe mae li" zang" phaung mung: ai: sulho qhid' kheim: mae ye; bam ko" au: re-

⁴Ceru: ga" hau: dao: re thoe qi: ke' mung: hug' kyo" ako". Mung"dan: alhab' mae" byumyu" qe byumyu" we' myan" cao jab alhab' mo, we"-

⁵Naonhaung" wa labo" jham mad thoe the' gyo: thao- kholhao: mad thoe tang she thoe- jhe' cang" we' be, ngaui" ja: jham myang thoe jham re the' gyo" li" genae". Ailao" gatau: be, nghaui" ja: alhab' re bobe; myhang" ke' li" genae". Nghaui" thoe jham be; myhang" qhid: ke' we' naonhaung" wa kho:kham Nebugkhaneza zhaug' to" ra" qhang sulho re goe; gyo" mung: caung:pa" ca" genae".

⁶Goe; gyo" mung: macaung:pa" yaug khag' re ngadqere: myishae de; ra" khyeim" mo" myi:khug' khyo aijao" yao: shapye' khyo" ru qhug' nae" ga: hau" ako".

⁷Airumung: mung"dan: alhab' mae" byumyu" qe myan" cao jab jhau: ra" byumyu" qe alhab' mo, wa be, nghaui" thoe jham re the' gyo: lao" jao" kho:kham Nebugkhaneza zhaug' to" ra" qhang sulho re goe; gyo" mung: caung:pa" ako".

⁸Ai: ayo, mae Babelon byu damyo" wa Yuda qere khyoe' nae" akho: akhang" yu: ra" ayo, ngad: ra".

⁹Yao: bam wa kho:kham Nebugkhaneza re Asang kho:kham pho" kao qhang vashao: wo"-

¹⁰Asang kho:kham nao wa nghaui" thoe jham be; nghaui" qhid: ke' we' yaug khao: ngo" qhang sulho re goe; gyo" mung: caung:pa" nae" qhid' mae" amyin" khyo" to" ra".

¹¹Aimung: magoe; gyo" lo: macaung:pa" ra" yaug khag' ngad qere: myishae de; ra" khyeim" mo" myi:khug' khyo pye' zaui: ke' ru qhug' nae" ga: amyin" byid' ra".

¹²Mung"dan: re eib nae" qhid' mae" nao san: to" ra" Yuda byu daqhae: Shadrag- Meshag we' Abednego wa Asang kho:kham ni" amyin" dao: jham re maphug' cao" mo, ngad: ako". Yao: bam wa ni" so rere: macaung:pa" mung: nao zhaug' to" ra" sulho rere: magoe; pa" ngad: ako"- ga: ta" ako".

¹³Ailao" kho:kham pho" nhag' jam: jo; yo" li" mung: ai: byu sam yaug re yao" nho: qhid' kheim: khyo jhui" li" nhao: ra".

¹⁴Yao: wa yao: bam re Shadrag- Meshag- we' Abednego we"- naonhaung" wa nga" so rere: macaung:pa"- ngo zhaug' to" ra" sulho rere: magoe; pa" ga" ru dang: i?

¹⁵Aimung: qe dang: ngad: re ana" labo"- tang: we' gatau: nghaui" ja: jham alhab' myang thoe the' gyo: lao" jao" yao: sulho re goe; pa" mung: caung:pa" ge,- naonhaung" airu: makad' gengad: re naonhaung" re ana" jao" yao: myishae de; ra" khyeim" mo" myi:khug' khyo pye' zaui: pye' qhug' genae"- naonhaung" re qo" khyad' yu nae" so na: ein: myid ko" i?- ga: ta" ra".

¹⁶Shadrag- Meshag we' Abednego wa Asang kho:kham we"- ngonhaung" khyo" yang ngonhaung" yao" gaung re vha: yu nae" qam: make' nae".

¹⁷Ngonhaung" caung da" byid' ra" Mao"So wa ngonhaung" re myishae de; ra" myi:khyeim" mae" we' ni" kheim: so' mae" qo" khyad' yu: ngad: re yao: khyad' yu: li" nae".

¹⁸Ngadqere: yao: qe makhyad' yu sho' ngadqere: Asang kho:kham nao khyo" ba: to: ca" nae" ru wa ni" so rere: ngonhaung" macaung pa" nae". Nao zhaug' to" ra" qhang sulho rere: ngonhaung" magoe; pa" nae"- ga: tau" ako".

¹⁹Ailao" Nebugkhaneza wa nhag' yo: mung: Shadrag- Meshag we' Abednego re nhag' yo" ru yang yao" nho: myo, khung: byao byao ne: li" ra". Aimung: yao: wa myishae de; ra" myi:khyeim" re nhad' zhao" myao sho' myi: zan: nae" qhid' mae" yao" byu qere amyin" byid' ra".

²⁰Aimung: yao: wa ai: byu sam yaug re taui: mung: myishae de; ra" khyeim" mo" myi:khug' khyo pye' zaui: ke' nae" qhid' mae" yao" gyetab khug mae" qam: bo thao" mo, re amyin" byid' ke' ra".

²¹Aimung: yao: bam re bau: jham- bau: qhang jham- maug jham we' mai bau: alhab' ve, ci gau re taui: mung: myishae de; ra" khyeim" mo" myi:khug' khyo pye' zaui: ako".

²²Ana" kho:kham pho" yang myishae de; ra" khyeim" mo" myi: re gyai dae xo sho' laung nae" khyo: kad' to: nae" qhid' mae" amyin" byid' to" ru: yang ai: byu qere jhui" ye" ra" gug: gam mo, re myi: shae: yang lham: mhai: pye' ra".

²³Ailao" Shadrag- Meshag we' Abednego wa ai ru: taui" to: gau yao: khyeim" mo" myi: tham: agaung: khyo gyo" vao lo" ako".

²⁴Ailao" jao" Nebugkhaneza wa mug' yang: nyag din taung" thug' jhu" li" ra". Yao: wa yao" nho: zug: ade, qere- byu sam yaug re ngonhaung" taui: mung: khyeim" mo" myi:khug' khyo pye' zaui: ke' mangad: i?- ga: myid' ra".

²⁵Yao: bam wa ngad: ra" Asang kho:kham we"- ngonhaung" airu: kad' va" ga: tau" ako". Yao: wa aire pe" mung: myi:khyeim: khug mae byu byid yaug su" qin" rure ngo the' myao: laug i?- ga: myid' ra". Yao: bam wa taui: re: made, pe" dae de; nhohab re: maqu" mung lo:- aimung: byid yaug ein: yaug wa mug: lagyo: ru" ru dau: ra"- ga: ta" ra".

²⁶Aimung: Nebugkhaneza wa myishae de; ra" myi:khyeim" kham: dung: khyo ye: mung: Shadrag- Meshag- Abednego we" myhao: thao" qi" qhang: thao" Mao"So: daui daui lagyo: qe we"- thug' lo ge,- ga: hug' yao: ke' ra". Yao: bam wa aijao" yao: thug' lo: ako".

²⁷Kho:kham nau" qe- mung" eib zug: ade, qe- gyezug: mo" qe we' kho:kham pho" nho: zug: gaje alhab' mo, wa myi" yang pe" dae made; ra" byu sam yaug re li" zang" ham: qu" ako". Yao: bam: nho: xae manga" pyad' pye'- yao: bam: mai bau: jham re: manga"- yao: bam: gaung mae re: myikhug' sheim manae ngad: ako".

²⁸Kho:kham pho" wa Shadrag- Meshag we' Abednego nho: Mao"So re caung:khin" byid' ra". Yao: wa yao: re lam khug mung: caung da" byid' ra" cebyu qere bao" yu nae" qhid' mae" yao" nho: mug: lagyo: re nhao: ke' ra". Yao: bam wa yao: bam yao" Mao"So mae" je yang: gatau: so re magoe; pa" macaung:pa" nae" ga: yao: bam yao" kao so' re dan: pye' sho' nga" amyin" dao: jham re maphug' cao" lo: ngag: thaug' pye' ako".

²⁹Aimung: ana" ngo khyo" yang Shadrag- Meshag we' Abednego nho: Mao"So re maphug' makhyad' ta" ra" yaug wa kho: byumyu" khoja" mung" pe" myan" jhau: ru mae" ngadqere: khyid lo, adau atam" phyid' sin" pye' mung: yao" nho: yham re byo; qeim: jo, sho' phyo' pye' byid' ru qhug' ca" nae" ein: amyin" khyo" ke' ra". Ceru: qo" khyad' yu: ra" gatau: so daja: re: mana ngad: ra"- ga: ta" ra".

³⁰Aimung: kho:kham pho" wa Shadrag- Meshag we' Abednego re Babelon mung"dan: mae" je: myhao: ra" aya: to' byid' ra".