Read Maru DANIELA 6 Bible Online

DANIELA 6 - Maru bible

DANIELA 6

¹Dari wa yao" nho: khosin" mung"dan: geim" mae mung" eib zug: dayo: shid' xe yaug re san: to: nae" myid: phyid' ra".

²Ai: tho' mago" yao: wa mung" eib zug: qere mau" pyo: byid: mung: yao" mau" re caung da" byid: nae" qhid' mae" Daniela we' gatau shid' zo: re san: to" ra".

³Khomyhao" mamyao" re Daniela wa gatau: zug: mo" shid' zo: we' mung" eib zug: jham tho' mau" je: qo" zaui" rure qhu" byid' ra". Yao: wa gakai: lai boe" doe, yang: kho:kham pho" yang khosin" damung" geim" re eib nae" mau" vhin nae" myid: yaung to" ra".

⁴Ailao" ai: gatau: zug: mo" shid' zo we' mung" eib zug: qe wa Daniela mung" eib mau" zaui" rumae qobo shad' ru daja: ja: qhug' sho' phin" qho: na: ako". Ngadqere: Daniela wa lam ga" ru we' shad' ru ngad ngad madang maman" ru ngad ngad daja: re: makad' rumung: qobo maqhug' myao ngad: ako".

⁵Yao: bam yao: cao: Daniela re wa yao" nho: lalam lakhug we' sin" ra" khyo daja: ja: mae za: mangad: re qobo qo" zhaug' nae" ngonhaung" qhug' myao byid: nae" mangad: ga: jho" ta" ako".

⁶Aimung: yao: bam wa kho:kham pho" jhao" yeqhug' mung:- kho:kham Dari we"- asang kho:kham kao qhang vashao wo"-

⁷Ni" mung"dan: re eib: na: ra" ngonhaung" zug: ade, qe- mung" eib zug: qe bao" thaug' zug: qe we' zug: gatau alhab' mo, wa- asang kho:kham nao khyo" yang amyin" dalam: khyo" mung: aire khyag' phug' cao" nhao nae" hau" pyo vashao: ein: myid vang" bam va". Ba na" sam xe ba geim" mae nao mae" lai yang: so mae" re: khag' byu dayaug mae" re: pe" mamho' nhao nae". Asang kho:kham khyo" amyin" dalam: tung" pyo: ke' wa,- ce: amyin" re ngag: lhaui: yaug khag' re ngadqere: khang khyi byang" sho' ke' to" ra"- khang khyi thaung: khyo pye' khyo" ke' ca" nae".

⁸Aimung: ce: amyin" re asang kho:kham khyo" tung" pyo mung: lo, xam: deim: yang: magai: lhai: nae" ra" Mede we' Persia mung" nho: tarha" boe" nhao vashao:- ga: ta" ako".

⁹Aimung: kho:kham Dari wa ai: amyin" re lo, xam: deim" ra".

¹⁰Ai amyin" re lo, xam: deim: va" ga" rure Daniela the' ba: yu lao" yham phao: lo" ra". Yao" yham tho' pyae mae" qe, daqe, mae wa Yerusalem shad' khyo qang: ra" bao: zo: kham: jham bung" ra". Ai: jo, qo mae khonhae" re: yao: lhaung" kad' na: ru we' dakhyo:- phung" to" ra" bao: zo: kham: mae pad' thaug' thaug' yang: daba re sam lhang lhang Mao"So re akyu" mho' ra".

¹¹Daniela nho: gyevo qe wa yao airu Mao"So re akyu" mho' ru the' myao lao".

¹²Yao: bam alhab' mo, wa Daniela re qobo zhaug' nae" qhid' mae" kho:kham jhao" daga" zang" ye" lo" ako". Yao: bam wa asang kho:kham we"- nao wa joe" lo nae" ba na" sam xe geim" mae nao mae" lai yang: gatau so dayaug yaug mangad: lao" byu dayaug yaug re mho' yao yaug khag' re ngadqere: khang khyi byang" sho' ke' to" ra" thaung: khug khyo shapye' zaui: ke' nae" amyin" dalam: re lo, xam: deim: to" ra"- ga: ye: ta" ako". Kho:kham pho" wa- magai: lhai" pye' ra" Mede we' Persia mung" mae" Tarha" gyai qao: ru dalam: khyo" to: va"- ga: ta" ra".

¹³Ailao" yao: bam wa kho:kham pho" re Yuda mae" pyaung" to" ra" mo, mae bobo: ra" Daniela wa asang kho:kham nao rere: maphug' ngad: ra" nao tung" pyo: ke' ra" amyin" dao: rere: maphug' cao: ngad: ra". Yao: wa daba re sam lhang man: man: akyu" mho' na: ra" ga: ta" ako".

¹⁴Ceru re kho:kham pho" the' gyo: lao" yao: myid mapyo: mung: Daniela re qo" khyad' yu nae" khyo dagau: gau: qhug' sho' gai: boe" qhi" qho: ra". Yao: wa ba vao sho' xo' yang: qho: na: ra".

¹⁵Ailao" ai: byu qe wa kho:kham pho" jhao" dam: li" mung: kho:kham: yang tung" pyo: ke' ra" pe" amyin" rere: Mede we' Persia mung"dan: tarha" khyo" madam: gai: lhai" rure asang kho:kham nao ba gau ngad: ra"- ga: ta" ako".

¹⁶Aimung: kho:kham pho" Daniela re taung: nae" amyin" khyo" ke' yang: yao: re khang khyi byang" sho' bo: ra" thaung: khug khyo shapye' khyo: ke' ako". Yao: wa Daniela re- nao jhaug' zaug taung" caung da" byid' ra" ni" Mao"So wa nao re khyad' yu vashao: wo"- ga: ta" ra".

¹⁷Dung: khung: nhad' mae laug zang dalam" yang jhid' nghoe' pye' mung: Daniela re khag' yang maqo" khyad' yu sho' kho:kham pho" wa yao" kho:kham dazid yao: we' yao" zug: ade, qenho: dazid thaung" te' to" ra".

¹⁸Ai: thao kho:kham pho" wa kho:kham kho" khyo phao: lo" mung: myi khyeim zo:ve mazo: mashaug' cingaui cipyo: ja: daja: re: mabo lo: gyang" bo" ra".

¹⁹Ne, seim mug: bo" li" re kho:kham pho" to" li" mung: khang khyi thaung: khyo hin hin ye" lo" ra".

²⁰Yao: aikhyo joe" ye" re yao: wa sang kho" ru we' ceru: ga: khai: yao: ke' ra"- Kaoso' daui: na: ra" Mao"So: daui daui yaug Daniela we"- nao ai nho" jhaug' zaug taung" za: caung da" byid ra" Mao"So wa nao re khang khyi jham mae" qo" khyad' yu va" i? ga: hug' ra".

²¹Daniela wa- asang kho:kham kao qhang vashao: wo"-

²²Khang khyi jham: yang ngo re dae maqo" te' sho' nhad' pyid' byid nae" qhid' mae" Mao"So wa yao" nho: mug: lagyo: re nhao: ke' ra". Ngo wa qobo maqo" ru we' asang kho:kham nao re mashad' nghung" rure: yao: ba mung: yao: wa ceru: kad' ru ngad: ra"- ga: tau" ra".

²³Kho:kham wa dae xo sho' ngaui bau: mung: Daniela re dung: khung: khug mae" she: phoe' thug' yu nae" amyin" byid' ke' ra". Aimung: yao re she: phoe' thug' yu: re yao: wa Mao"So re lam khug mung: yao: mae pe" dae dajhid' re: made; ru qhug' myao: ako".

²⁴Ailao" kho:kham pho" wa Daniela re qobo zhaug' ra" mo, alhab' re taung: nae" amyin" khyo" ke' mung: yao: bam re yao: bam: yham sang myhi" jham we' yao: zo: qe we' daga" khang khyi byang" bo: ra" dung: khung: khug khyo shapye' khyo" ke' ako". Yao: bam dung: khung: athai: khyo lao" majoe" gyo" lo" shi: mae" khang khyi jham wa yao: bam re byae: taung: mung yao: bam: shoqug: jham alhab' re bin" khyug' pye' byid' ako".

²⁵Aimung: kho:kham Dari wa myid gaung: dao mae byumyu" mung"dan: alhab' myan" cao jab mae" byu qere mugsug' tung" ke' mung: ngaui pyo: yaug yo: na geshao wo".

²⁶Ngo wa yaug khao: ngo" yang Daniela nho: Mao"So re gyaug mung: ceim" phug' genae" qhid' mae" nga" mung"dan: gam: sho' khyo amyin" khyo" ke' ra". Yao: wa kao so' daui: na: ra" Mao"So ngad mung: yao: wa apyad ato mae eib: na: li" nae". Yao" nho: mung"dan: khonhae" re: phyo' qheim" pye' ru qhug' nae" mangad:- Aimung: yao" nho: kheim: so' wa khonhae" re: thao" lo" nae" mangad:-

²⁷Yao: wa khyad' khyui: yu mung: loe, nhao: ra". Yao: wa mug:gaung mae we' myid gaung mae mug' pho: lo, mau" we' ve,lho jham kad' ra". Yao: wa Daniela re khang khyi jham: yang se' pye' nae" ru mae" khyad' yu: ra" ga: tung" ke' ra".

²⁸Daniela wa Dari eib: ra" pyad mae we' Persia kho:kham Kuru eib: ra" ayo, gyo: gu: mae na: dai: ra".