Read Maru DANIELA 7 Bible Online

DANIELA 7 - Maru bible

DANIELA 7

¹Babelon mae Belshaza kho:kham boe" qhid: ra" sao qhid' zin re damyi: myi ngo yab mo, dalam: mo, mung: qhu" lho dalam: the' myao:- ai: yab mo, re ngo tung" to: mung: ceru wa-

²Ai: myi ngo the' myao: rure tung" xam" to" ru ngad: ra". Shad' khao: ngo" khyo" la hug' hug' lo mung: nammugdara dao mae hug' khyad' lai: ra".

³Yao: cao: yao: majho" dau: ra" gug'nyhug' lhae: aqi: byid dau: wa nammugdara mae" thug' li" ako".

⁴Sao qhid' mae" dadau: wa khangkhyi we' dau: ra". Ngadqere: yao" nho: daung wa zeim baung: daung we' dau: ra". Ngo lhaug' qu" na: au: re ai: daung jham jad: dao" lo" ako". Ai: gug'nyhug' lhe: wa tau: to' yu ru qhug' mung: byu dayaug we' dakhyo: ye; jo, nhao: to" ako". Aimung: yao: re xao su byu: nho: nhag' lam: ke' byid' to" ako".

⁵Shid' dau: ein: ra" gugnyhug' lhe: wa vae dadau: we' dau mung: yao" nho: qhid' khyid shid' khyid mae ye; jo: ra". Yao" nho: zaui jham: agyo: mae nae cae: sam khe' re bin" zag ci mung: thoe dathoe wa yao: re xo' ye: wa,- nao qo" zo" nho" aire zo: wa,- ga: ta" ra".

⁶Ngo lhaug' qu" na: ra" au: re gug'nyhug' lhe: gatau dadau: na: thug' li" ra". Ai: dau: wa nin tin we' dau ngadqere: yao" nho: dao kao" mae ngho' daung ru" ru daung byid daung de; ra". Aimung: yao: mae au: byid lam: de; ra". Yao: re qu" re kheim: so' qam: bo: ruru: mung: ra".

⁷Ngo airu: lhaug' qu" na: au: byid dau: ein nae" gug'nyhug' lhe: na: thug' li" ra". Ai: dau: wa kheim: so' qi: mung: qu" gyaug qu" lhaung gyaug din nae" pho: ngad: ra". Qi" ra" yao" jo, to' zaui baung: jham: yang: yao" zoshao jham re bin" khyoe' pye' mung: yao: wa ai jham re zab: nhae" pye' ra". Ai: dau: wa gug'nyhug' lhe: gadau: qe we' madau yao: mae khyug daxe khe' yaug: ra".

⁸Ai: khyug jham re ngo zhaug' qu" na: au: re khyug galam: jham: agaung: mae khyug nau" dakhe' yaug: thug' li" rure ngo the' myao:- ai: khyug nau" wa ai: mae yaug: jo, va" khyug sam khyug re phai" pye' byid' ra". Ce: khyug nau" mae xao su byu nho: myo, jid jham de, mung: ngad beim: taung" phug: ta" ra" nhad' re: de; ra".

⁹Ngo qu" na: au: re kho:kham zaung tao" jham re nyhang" to" ako". Apyad ato mae daui: na yaug wa kho:kham zaung tao" jham mae dalam: mae zaung: jo; ra". Yao: nho: mai bau: jham wa gyu: we' dakhyo: phyu mung: yao" nho: xae jham wa yao mug' agyang" we' dau: ra". Myi: lhin" ce' dao mae zhaug' to" ra" yao" nho: kho:kham zaung: tao" wa myi: shae nga" na: ra".

¹⁰Aimung: qid gyaung zo: re" ru myi: she wa ai: mae" yug: sheim: thug' li" ra". Ai: jo, qo mae yao: re caung da" nae" mo, ataung atug na: bam: ako". Aimung: byu tug- yo khyo" yao" qhid' kheim: mae jo; ye; jo; ako". Tarha" dao: kho' qhid mung: mugsug' paug' jham phung" to" ako".

¹¹Ngo qu" na: au: re ai: khyug nau" phug: na ru we' ngad beim: dao: ta" na: ru the' gyo: shi" ra". Ngo lhaug' qu" na: au: re byid dau: ein nae" ra" gug'nyhug' lhe: re se' pye' ako". Aimung: yao" mao gaung re myishae khug khyo shapye' khyo" ke' mung: ngha" jheim" pye' ako".

¹²Gug'nyhug' lhe: gadau" gu rere: yao: bam: kheim: so' yu: pye' byid' ru qhug' ako". Ngadqere: yao: bam re byid' to" ra" ayo, dayo, gu: xo' daui: na nae" akhang" byid' to" ako".

¹³Ai: myi: mae ce: yab mo, re mo; na: au: re xao su byu dayaug ru"ru ngo the' myao:. Yao: wa jham: yang lhang" gam" ci yang: ngo jhao" te' li" ra". Aimung: yao: wa apyad ato mae daui: na yaug jhao" ye: mung: yao" qhid' kheim: mae yeqhaug' to: byid' ru qhug' ra".

¹⁴Mung: dan: alhab' byumyu" we' myan" cao jab mae" byu qe: yang yao: re caung da" byid: nae" qhid' mae"- yao: re mung" eib kheim: so' nga: lho" ru we' kho:kham qam: o: byid' to" ru qhug' ra". Yao" nho: mung" eib kheim: so' wa apyad ato jo; jo; mung: yao" mung"dan: wa khonhae" re: thao" nae" mangad:-

¹⁵Ngo the' myao: ra" qhu" lho jham: yang ngo re din nhao mung: ngo wa dae xo sho' myid myo: byaug va".

¹⁶Ngo wa ai: jo, qo mae ye; jo, mo, mae" dayaug jhao" su" do, ye: mung: aijham alhab' re ta" sho' kyo: la, ein: yao: re mho' va". Aimung: yao: wa ngo re lajheim: alhab' ta" shid' ra".

¹⁷Yao: wa- ce: seyo: gug'nyhug' byid dau: wa mug: myid dao mae to" li" nae" gyai qi" ra" khosin" mung"dan: mo" byid lam: ngad: ako".

¹⁸Aimung: myhao: thao" Mao"So: byu qe wa mung" eib kheim: so' re qo" rumung: ai: kheim: so' re apyad ato mae zam" cili" genae"- ga: ta" ra".

¹⁹Gatau: gug'nyhug' lhe: qe: we' madau qu" gyaug qu" lhaug taung" zo: sho: jham re yao" nho: gyid: bo" sin: jham we' jo, to' zaui jham: yang khyoe' pye' mung: zab: nhae" pye' ra" byid dau: ein nae" gug'nyhug' lhe: nho: akhyo re ngo: ba: laung" yu nug: ra".

²⁰Aimung: ngo wa yao" nho: au: mae" khyug daxe khyug: ra" khyo we' thao mae cao" yaug: thug' li" ra" khyug nau" wa ai: khyug sam lam: re ban" gyo" lo" nhao: rure ba nug: ra". Yao: mae myo, jid' jham we' ngad beim: taung" phug: ta" ra" nhad' dalam: de; ra". Khyug ai: lam: wa galam: tho' je: qu" gyaug sho' ru ngad: ra".

²¹Ngo qu" na: au: re ai: khyug wa Mao"So: byumyu" qere mang zin: mung: yao: bam re aung: yu: pye' ra".

²²Ailao" apyad ato mae daui: na yaug li" lo mung: myhao: thao" ra" Mao"So nho: byumyu" qe shad' bo: de, yang: dao: phyid' ru ta" ke' ra". Mao"So: byumyu" qe kho:kham kheim: so qo" yu nae" ayo, joe" li" va".

²³Ceru wa ngo re byid' to" ra" ta" sho' kyo" ra" khyo ngad: ra". Byid dau: ein: ra" gug'nyhug' lhe: wa myid gaung dao mae jo; li" nae" ra" khosin" mung"dan: byid lam: ein: lam: ngad mung: airu wa khosin" mung"dan: gaje alhab' we' madau nae". Ai wa mug: myid dalam" geim" re khyoe' pye' mung: aire zab: mhan" pye' li" nae".

²⁴Khyug daxe khyug wa ai: khosin" mung"dan: re eib: nae" kho:kham daxe yaug ngad: ako". Ai: thao kho:kham dayaug na: thug' li" nae". Yao: wa yao" qhid' mae" mo, we' madau mung: kho:kham sam yaug re aya: khyo" pye' li" nae".

²⁵Yao: wa myhao: thao" ra" Mao"So re ngag: thaug' dao: ta" li" mung: Mao"So: byumyu" qere deim: zag zo" li" nae". Yao: wa yao: bam: lam khug: tarha" jham we' poe jham re tha" nae" qhid' mae" phin: mung: Mao"So: byumyu" qe wa yao" kheim: so' qao: mae sam zin: dakhyae: na: li" genae".

²⁶Ailao" mug:gaung: tarha" yung" mae dao: kho' mung: yao" nho: kheim: so' re yu: pye' byid: yang: yao: re bin sho' phyo' qheim" pye' li" genae".

²⁷Myidgaung dao mae" mung"dan: alhab' nho: kheim: so' we' qi" qhang: rure myhao: thao" ra" Mao"So: byumyu" qere byid' pye' li" nae". Yao: bam: kho:kham kheim: so' wa khonhae" re: thao" byaug nae" mangad:- Amung: myid gaung dao mae" mung" eib kho:kham alhab' mo, wa yao: bam re ceim" caung: da" byid' ru we' phug' cao" li" genae".

²⁸Cegu: wa boe" lo: ru athao" ngad: ra". Ngo wa saung" gyaug: din: pye' mung: sa: lhao" mabo lo:- aimung: ja: khao: ngo" re nga" aung khug mae xam" ci va".