Read Maru DANIELA 8 Bible Online

DANIELA 8 - Maru bible

DANIELA 8

¹Belshaza kho:kham boe" ra" sam zin ein: zin mae shid' lam: ein: nae" qhu" lho dalam: re ngo the' myao:.

²Qhu" lho mae ngo wa ngoyao" gaung re Elam mung" dau mae" vang: yang qae: lhaung" to" ra" Susa vomo" khug mae joe" na: jo; ru the' myao:- ngo wa Ulai qid gyaung: yae mae ye; jo;-

³Aimung: ai: qid yae mae khyug aqhang shid' khe' yaug: ra" yao lo: dadau: re the' myao: khyug dakhyug wa gatau dakhyug tho' je: qhang mung: je: sag' shi" ra".

⁴Ai: yao lo: wa yao" nho: khyug jham: yang ba vao shad'- mug: am: shad' we' mug: thao shad' khyo khyug vhang: vhang" na: rure ngo lhaug' qu" na: pe" gug'nyhug' re: yao: re maqo" tam" pye'- yao" kheim: so' mae" re: maqo" phao: loe, ngad: ako". Yao: wa yao: o: khyo" kad' mung: ngad beim" li" ra".

⁵Ceru pe" lajheim: ngad: laug ein: ngo myid: qu" na: ra" au:- cad' be, dadau: wa ba vao shad' khyo" yao" nho: khyid myid gaung mae mazao" matin: losho' phyad phyad tao" thug' li" ra". Yao: mae khyug shid' khyug: agyo: mae gakai lai qi" ra" myo, jid' dajid' de; ra".

⁶Yao: wa qid gyaung: nhae mae ye; jo; rure ngo the' myao: ra" ai: yao lo: jhao" joe" li" mung: qam: bo: thao" phin: yang yao: jhao" khe' dan: ye" ra".

⁷Yao: wa ai: yao lo: re khe' thaung" rure ngo lhaug' qu" na:- yao: wa gyai nhag' yo: mung: khyug shid' khyug re thaung" khyug' pye' sho' yao: jhao" thug' byae: ye" ra". Yao: lo: wa lham: tam" nae" qam: mabo ngad: ra". Yao: wa myid gaung khyo pye' khyo" ke' mung: zab: nhae" pye' ru qhug' ra". Aimung: yao: re qo" khyad' yu nae" khag' mana ngad: ra".

⁸Cad' be, wa je yang: yang: ngad beim" li" ra". Ngadqere: yao" nhao: qi" thao" ra" kheim: so' ein: nae" khyug wa gyug' byaug va". Yao" khyug khu mae qam: qi" ra" khyug byid khyug yaug: thug' li" ako". Byid khyug: geim" wa dakhyug dashad' khyo qang: thug' li" ako".

⁹Ce: khyug byid khyug khug mae" mug: thao shad' ba thug' shad' we' Dao:so: to" ra" mung" shad' khyo kheim: so' cae" joe" lo" ra" khyug nau" dakhe' yaug: thug' li" ra".

¹⁰Aiwa mug:gaung mae" gyetab re mang qo" zin: nae" qhi" ngad mung: kyi jham re lao" qo" khe' zin: nae" qhi" qam: bo: li" mung: yao: wa yao bam mae" damyo" gu: re myid gaung khyo" pye' khyo" ke' mung: zab: nhae" pye' ra".

¹¹Aiwa mug:gaung mae" gyetab: nho: kho:kham nau" re lao" maphug' makhyad' kad' mung: yao: re qhaug' byid' ra" ngaui" xeim: re phyo' qheim" pye' ra".

¹²Mang byu qe wa ai: jo, qo mae ba: khao: ngo" qhaug' byid: ca" ra" ngaui" xeim: jham: atha" qobo shad' ako". Aimung: dangman" ra" lalam lakhug re myid gaung khyo shapye' khyo" ako". Ai: khyug wa yao: kad' ru ja: khao: ngo" mae aung doe; ra".

¹³Ailao" mug: lagyo: dayaug wa mug: lagyo: gayaug re ceru ta" ru ngo the' gyo"- ai: qhu" lho mae the' myao: ra" cegu: wa khomyhao" myhao" sho' xo' boe" na nae" ga" laug i? Ba: khao: ngo" qhaug ngaui" byid: ca" ra" xeim: ngaui jham: qo mae gyaug ci" ja: qobo re khomyhao" myao" sho' tha" jo, nae" laug i? Mug:gaung: gyetab we' Caung:pa" Yham re khomyhao" myao" sho' ce zab: nhae" to" ru qhug' genae" laug i? ga: myid' ra".

¹⁴Mug: lagyo: gayaug wa ceru: ga: tau" rure ngo the' gyo"- airu wa 1150 ba myao" li" nae". Ai: ayo, gu mae ne, seim we' myi" thao: ngaui" xeim: re maqhaug byid: genae". Ai: thao Caung:pa" Yham re dam: tug' byid' li" genae"- ga: tau" ru re ngo the' gyo".

¹⁵Qhu" lo: nho: lajheim: re ngo ba: gyo: sho' myid: ca: qu" na: au: re nga" qhid' kheim: mae nyag' din taung" byu dayaug ye; thug' li" ra".

¹⁶Ulai qid gyaung dao mae" thoe dathoe ceru: ga: yao: thug' li" rure ngo the' gyo"- Gabriela we"- ai: yaug re yao: the' myao: ra" ja: nho: lajheim: we' akhyo jham re sho' kyo: wa,- ga: ta" ra".

¹⁷Gabriela wa ngo jhao" li" mung: nga" nhae mae ye; ra". Airumung: ngo wa saung" gyaug: din mung: myid gaung khyo gyang: lang" lo" va". Yao: wa ngo re- shid ba: ra" byu we"- lajheim: re ba: gyo: wa,. Ai: qhu" lho wa mug: myid thao" lo" ra" ayo, we' sin" ru ngad: ra"- ga: ta" ra".

¹⁸Yao: jhau: na: au: re ngo wa magyang: maso: myid gaung khyo mo; lang" lo" va". Ngadqere: yao: wa ngo re zaui: mung: tau: yhe' ke' ra".

¹⁹Aimung: yao: wa- Mao"So nho: nhag' yo" ra" mathao mae pe" boe" lo nae" rure ngo nao re qhu" byid: nae". Ai: qhu" lho wa lo" thao" ayo, re qang yang ta" nug: ru ngad: ra".

²⁰Nao the' myao: ra" khyug shid' khyug yaug: ra" yao lo: wa Media we' Persia mung"dan: shid' lam: re lho: qhu" ru ngad: ra".

²¹Cad' be, wa Heleni mung"dan: nho: gaung ngad: ra". Aimung: myo, jid' shid' jid' agyo: mae" khyug bam: khyug wa sao qhid' yaug ein: ra" kho:kham ngad: ra".

²²Sao Qhid' lam: ein: nae" khyug gyug' ban" lo" thao yaug: thug' li" ra" khyug byid khyug wa- ai: mung"dan: go; sin" lo" mung: aijham wa sao qhid' mae" mung"dan: qhi" qam: mabo genae" rure qang yang lho: qhu" ru ngad: ra".

²³Ai: mung"dan: jham nho: lo" thao" joe" lo: au: re yao: bam wa qobo dae kham zo: nae" qhid' mae" xo sho' makhyang: mashab boe" li" genae". Nhag' lam: qao ra"- makhyang" ru we' mhug' pyag' ra" kho:kham dayaug na: thug' li" nae".

²⁴Yao: wa qam: bo: li" nae"- ngadqere: yao" kheim: so' khyo" qam: bo nae" mangad:- yao: wa gyaug din taung" phyo' qheim" rure boe" nhao mung: yao: kad' ra" ja: khao: ngo" mae aung doe; lo: li" nae". Yao: wa kheim:so qi" ra" byu qere we' Mao"So yao" nho: byumyu" qere phyo' qheim" li" nae".

²⁵Yao: wa nhag' lam: kaui mung: yao" nho: mhug' pyag' mau" jham mae yao: wa yao: yao" gaung re ngad beim: mung: byu myo: sho' re pe" mata" peim: lo: se' tam" pye' li" nae". Yao: wa kho:kham alhab' mae" qi" qhang: thao" ra" yaug re lao" re maphug' makhyad' kad' li" nae". Ngadqere: xao su byu nho: kheim: so' re maci lo: yao: re phyo' qheim" pye' li" nae".

²⁶Ne, seim we' myi" thao mae" phad' ngaui" xeim: we' sin: yang nao re sho' kyo" lai: lo va" ce: qhu" lho wa dang dang za: boe" lo: li" nae". Ngadqere: ana" aire zug' to: shi: wa,. Pe"mung:ga"re airu ma jo; dang: lo shire ayo, gyai myao" ca" shi: nae" ngad: ra"- ga: ta" ra".

²⁷Ngo wa qam: shan: byaug mung: ba na ga" go" zo: myao" sho' no: pye' va". Ai: thao ngo wa to" mung: kho:kham pho" yang ngo re zaui: nae" qhid' mae" byid' to" ra" mau" zo" khyo dam: tug' ye" lo" va". Ngadqere: ngo wa ai: qhu" lho: ra" mathao mae myid: mug' byaug mung: aire maba: gyo:.