Read Maru DANIELA 9 Bible Online

DANIELA 9 - Maru bible

DANIELA 9

¹Ahasuru nho: yauggai zo: Mede byu Dari wa Babelon mung"dan: re eib: ra".

²Yao eib: qhid: ra" sao qhid' zin mae ngo wa gyang" lho" mugsug' paug' jham re mho" zhao: na mung: ASANG: yang lapa Yeremia re ta" to" ru we' dakhyo: zin lam: nhad' xe Yerusalem byo; qeim: jo, nae" ru myid: qu" na:-

³Aimung: ngo wa zo:ve jao"- jid: mo" mai bau: ve; pye' mung: myimhab bam mae zaung: jo, zo" re"- ASANG Mao"So jhao" kyid kyid ein: ngo akyu" mho' va".

⁴Ngo wa ASANG nga" Mao"So re akyu" mho' mung: nga" byumyu" qenho: qobo jham re lhang: yu:- ngo wa ASANG Mao"So we"- nao wa qi" qhang mung: nao re ngo nga: yhe' byid' ra". Nao wa ni" dao: thang" dao mae jhaug' zaug: ru we' nao: yang jhid'de; ra" mo, re gang" tang: ra" jhid'de; myid qhu" byid: mung: nao amyin" to" rure kad' ra".

⁵Ngonhaung" qobo shad' bam va"- ngonhaung" makhyang: mashab: lo: ngonhaung" wa shad' ru kad lai: lo: bam va". Nao: yang ngonhaung" re cao" kad' nae" amyin" byid' to" rure ngonhaung" ngag: lhaui" pye' mung: nao: yang ngonhaung" re jo: ga: qhu" byid' to" ra" rumae" nhaung thao" phaug' lo" bam va".

⁶Ngonhaung" nho: kho:kham qere- ngonhaung" nho: phug' phyid' qere we' ngonhaung" damyu" geim" re ni" mang khyo" jhau: ra" ni" nho: daui daui lagyo: lapa qenho: dao: re ngonhaung" matae" gyo: lo: kad' vagenhaung-

⁷ASANG nao wa khonhae" re: jo: ru kad' ngadqere: ngonhaung" wa khonhae" re: ngonhaung" nho: dao mae nga: yeim khyo kad' yu: bam va". Ceru wa Yuda we' Yerusalem mae na: ra" ngonhaung" alhab' mae we' nao re jhaug' mazaug: ra" mathao mae mug: va: we' mug: yae khaung: khyo nao: yang khe' sin" pye' ra" Israel byumyu" qemae re: dang: lo: ava".

⁸Ngonhaung" nho: kho:kham qe- ngonhaung" zug: qe- ngonhaung" nho: phug' pho" bam wa aqho' axag' kad' lai: lo gemung:- ASANG nao re qobo shad' nghung" avako".

⁹Ngonhaung" wa nao re tau: lhan" lai: lo ngadqere: nao wa nhag' khyag' ru we' qobo khyad' byid' ra".

¹⁰ASANG ngonhaung" nho: Mao"So we"- nao: yang ngonhaung" re ni" nho: daui daui lagyo: lapa qe khyo" byid' to" ra" tarha" jham we' dakhyo: cao" ye: nae" qhid' mae" ngonhaung" re ta" shid' au: nao re ngonhaung" matae" gyo: kad' bam va".

¹¹Israel alhab' mo, wa ni" nho: tarha" jham re shad' lhoe" mung: yao: bam wa nao ta" rure matae" gyo: qad ngad: ako". Ngonhaung" wa nao re qobo shad' va". Aimung: nao wa ni" daui daui lagyo: Moshe nho: tarha" mae tung" to" ra" nhang: kheim: re ngonhaung" dao mae khyo" byid' ava".

¹²Nao wa ngonhaung" re we' ngonhaung" nho: mung" zug: qere kad' nae" ga: ta" to" rure kad' va". Nao wa myidgaung: dao mae" vomo" galam: tho' je yang: dae xo sho' Yerusalem re qobo dae byid' ava".

¹³Aimung: Moshe nho: tarha" mae sho' kyo" to" ra" qobo dae alhab' ngonhaung" re byid' ava". Ngadqere: ASANG ngonhaung" nho: Mao"So we"- ana" lao" re: ngonhaung" wa ngonhaung" nho: qobo jham mae" phaug' lo mung: ni" dangman" ra" khyo re cao" ra" khyo" yang nao myid: ngaui nae" khyo" macao" shi: genhaung.

¹⁴ASANG ngonhaung" nho: Mao"So- nao wa ngonhaung" re qobo dae byid: nae" qhid' mae" seim" nyhang" to: mung: qobo dae byid' ava". Pe"mung:ga"re nao wa khonhae" re: jo: ru kad' mung: ngonhaung" wa ni" mho dao: re matae" gyo: kad' bam va".

¹⁵O"- ASANG ngonhaung" nho: Mao"So we"- nao wa ni" byumyu" re Egutu mae" jhui" thug' yu mung: ni" kheim: so' re qhu" byid' ra". Aimung: ni" kheim: so' re ana" joe" sho' myid: beim" na shi"- ngonhaung" wa qobo shad' bam va"- ngonhaung" wa shad' nghung" ru kad' bam va".

¹⁶Nao wa lai: lo va" ayo, mae ngonhaung" re gye vha byid: mung: gug: gam byid' lo va". Aimung: Yerusalem re nhag' dayo: lo:- ai: wa ni" nho: vomo" ngad: ra". Ni" nho: gyang" lho" bug gaung ngad: ra". Ngonhaung" nho: qobo jham: mathao mae we' ngonhaung" phug' pho" bam kad' lai: lo: ra" makhyang: mashab: mau" zo" jham: mathao mae avai: ayae mae" mung"dan: byumyu" qe: yang Yerusalem re we' ni" byumyu" qere qu" jung" qu" ngai: pye' ako".

¹⁷O"- Mao"So we"- nga" akyu" mho' dao: we' ngo mho' yao: thoe gyo: byid: la,- phyo' qheim" pye' va" ni" Caung:pa" Yham re dam: tau: zhaug' wa,- nao wa Mao"So ngad: rure yaug khao: ngo" yang ceim" ba nae" qhid' mae" aire dam: tau: zhaung: wa,-

¹⁸O"- Mao"So we"- ngo re tae" gyo: byid: la,- ngonhaung" re qu" qu" wa,- aimung: ngonhaung" qug: khai: qhug' na: rure we' ni" mang vin: ra" vomo" leim zo" na: ra" dayin dayo: nao myao byid: la,. Ngonhaung" wa ngonhaung" jo: ru kad' ra" mathao khyo" mangad:- nao wa nhag' khyag' myid bo: ra" yaug ngad ruyang ngonhaung" nao re akyu mho' na: bam va".

¹⁹ASANG we"- ngonhaung" re gyo: byid: la,- ASANG we"- ngonhaung" re qobo khyad' byid: la,- ASANG we"- ngonhaung" re tae" gyo: byid: mung: lo, mau" zaui: wa,. Nao Mao"So ngad: rure yaug khao:ngo" ba: lo" nae" qhid' mae" yam" yam" dakad' na- ce: vomo" we' ce: byumyu" wa ni" mae" ngad: ako".

²⁰Ngo wa nga" nho: qobo jham we' nga" byumyu" qenho: qobo jham re lhang: yu zo" re" akyu" xo' yang: mho' na:- aimung: ASANG nga" Mao"So re yao" nho: gyang" lho" Caung:pa" Yham re dam: tau: zhaug' to: nae" qhid' mae" mho' yao: na:-

²¹Ngo akyu" mho' na: au: re- no' mae" qhu" lho mae ngo the' myao co' va". Gabriela wa ngo na: jo; ra" khyo dao" gyo" li" ra". Ai: ayo, wa myi" thao zo" mae" phad' ngaui" xeim: qhaug' byid: yo, ngad: ra".

²²Yao: wa ceru: ga: sho' kyo" ra". Daniela we"- ngo wa ai: lapa dao: re nao ba: gyo: sho' bao" yu nae" qhid' mae" cekhyo joe" li" va".

²³Mao"So jhao" nao mho' yao: au: mae"- nao re Mao"So tau: byid' ava". Yao: wa nao re jhid'de; ra". Aimung: nao re dao: phyid ta" shid' nae" qhid' mae" ngo joe" li" ru ngad:- ana" ai: qhu" lho re ngo sho' kyo" na: au: nyang" za: gyo" yu wa,.

²⁴Nhad' xe zin nhad' lhang wa- ni" byumyu" re we' ni" nho: gyang" lho" vomo" re qobo we' makhyang: mashab: ru mae" loe; beim nhao nae" qhid' mae" Mao"So xam: so" to: byid' ra" ayo, agin ngad: ra". Qobo re khyad' pye' byid: mung: apyad ato mae tarha" din: nyang: rure zao: to" li" nae". Aimung: qhu" lho we' lapa dao: wa jo; dang: lo: li" nae". Aimung: gyang" lho" Caung:pa" Yham re dam: qhaug' byid' li" genae".

²⁵Ceru re xam" ci mung: ba: gyo" to: wa,- Yerusalem re dam: te: nae" amyin" khyo" byid' ra" ayo, mae"- Mao"So: yang khyin: to" ra" yaug joe" li" ra" ayo, joe" sho' nhad' zin nhad' lhang myao" lai: lo" li" nae". Yerusalem re hau" mo" khyo jham we' tang: ra" gyelham jo, qo tae" to" li" genae". Aimung: ai wa khyaug' xe: shid' zin nhad' lhang gang" tang: jo; li" nae". Ngadqere: ce: zin gu: wa qug: khai: ayo, ngad: li" nae".

²⁶Aimung:- ai: ayo, thao" lo" yo, re Mao"So: yang khyin: to" ra" au: jhaung re matarha" ra" khyo" se' pye' li" genae". Vomo" we' Caung:pa" Yham re kheim: so' qi" ra" mung" zug: kho:kham dayaug: yang phyo' qheim" pye' li" nae". Lo" thao" ayo, wa qid je" li" ru we' dakhyo:- joe" lo mung: Mao"So nyhang" yaung: seim" to" ra" gyekhe' poe we' phyo' qheim" rure boe" thug' nhao: li" nae".

²⁷Ai: mung" zug: kho:kham wa byu myo: sho' we' nhad' zin mae tang: ra" myid vang" khyo re qo" yu: to" li" nae". Aimung: ce: ayo, agaung: daqi" lai: lo" re xeim: phad' ngaui" byid' ru we' alu: ngaui qhaug' byid' rure tam" pye' li" nae". Qu" gyaug sho' ra" maca' majhad' re Caung:pa" Yham mae" myhao: thao" khaung: dam: au: mae to" to: mung:- airu wa ai: jo, qo mae aire to" to: yaug: qhid' mae" Mao"So nyhang" jaung: to" ra" athao" joe" sho' jo; jo; li" nae".