Read Maru HOSEA 1 Bible Online

HOSEA 1 - Maru bible

HOSEA 1

¹Ce: mungdao: wa Yuda mung" mae Uzia- Yotham- Ahaza we' Hezekia bam kho:kham boe" mung: Israel mung" mae Yehoasha nho: yauggai zo: Yeroboam kho:kham boe" ra" ayo, gyo: mae Beri nho: yao: zo: Hosea re ASANG: yang byid' ra" mungdao: ngad: ra".

²Hosea khyo" yang Israel byu qere ASANG sao qhid' dao: jhau: au: yao: wa Hosea re- Myi: yeyu wa, Ni" yham sang myhi" wa jhaug' mazaug' yaug ngad nae". Amung: ni" zo: qe wa yao: we' dakhyo: yao: ngad: li" genae". Ai we' dakhyo: nga" byumyu" qe wa ngo re to: co' gemung: jhaug' mazaug mo, boe" li" genae"- ga: ta" ra".

³Aimung: Hosea wa Diblaim nho: myiqe: zo: Gome ga: mang yaug re lo, xo' yu: ra"- zoqhid' yauggai zo: khau thao re-

⁴ASANG wa Hosea re- Yao: re Yezre ein: mhang" wa,- pe"mung:ga"re Yezre mae Israel kho:kham nho: phug' pho" Yehu yang byuse' ra" mathao mae Israel kho:kham re qobo dae byid: nae" mamyao" lo:- Ngo wa Yehu nho: kho:kham byuxag' re thao" nhao naeva".

⁵Yezre lao: khaung: mae ai: ayo, re Israel nho: gye qam: re ngo phyo' qheim" pye' nae"- ga: ta" ra".

⁶Gome wa shid' yaug ein: nae" zoshao dam: qo" ra"- Ce:lhang mae" wa myiqe: nau" ngad: ra". ASANG wa Hosea re yao" mang re Majhid' De, Yaug ein: mhang" wa,- pe"mung:ga"re ngo wa Israel byumyu" re jhid'de; myid maqhu" byid: lo nae". Yao: bam re qobo makhyad' byid: lo nae".

⁷Ngadqere: Yuda byumyu" qere wa ngo: yang jhid'de; myid qhu" byid: nae". Yao: bam: Mao"So ASANG ngo wa yao: bam re khyad' yu nae" ngadqere: ngo wa ai: rure gyekhe' mang: zin: mau" khyo" makad' nae". Shae pyang:- lo, la:- myo: khe'- myao: we' myao: jui: sulhe: jham maci nae"- ga: ta" ra".

⁸Gome wa yao" myiqe: zo: re nug' bin: kao thao re gaung dam: la: mung: yauggai zo: dayaug dam: qo" ra".

⁹ASANG wa Hosea re- Yao: re Nga" Byumyu" Mangad: ein: mhang" wa, pe"mung:ga"re Israel byumyu" wa nga" byumyu" mangad:- ngore: yao: bam: Mao"So mangad:- ga: ta" ra".

¹⁰Israel byumyu" wa panglai: mae" ma coe we' dakhyo: matho' nghe' matho' lag lo:sho' myo" li" genae". Ana" Mao"So wa yao: bam re- Naonhaung" wa nga" byumyu" mangad:- ga: ta" ra". Ngadqere: daba: ba na mae wa- Naonhaung" wa daui: na: ra" Mao"So: yao: zo: qe ngad:- ga: ta" nae" ba na joe" li" nae".

¹¹Yuda byumyu" qe we' Israel byumyu" qe wa dadang: dalam: dam: boe" byaug: li" genae". Yao: bam wa yao: bam yao" qhid' mae" au: she yaug dayaug re za: khyin: yu: li" genae". Aimung: yao: bam wa yao: bam: mug:myid mae dalhang dam: qi" qhang mung: na: dai: li" genae". Ngad va"- Yezre ba na wa ba na mo" daba ngad: li" nae".