Read Maru HOSEA 10 Bible Online

HOSEA 10 - Maru bible

HOSEA 10

¹Israel byumyu" qe wa sabyi shi: byang" zaui" ra" sabyi naui we' dau: lo: ako". Yao: bam je: na: dai lao" phan jham je: myo: sho' zhaug' li" ako". Yao: bam: mug:myid mae" xan: zai gai je: thug' lao" yao: bam caung:pa" byid' ra" gyang" lho" laug zang baung: jham je: shaung: yhaung" ako".

²Nhag' lam: akhug' apyag' mung: ra" byumyu" wa yao: bam: qobo jham: mathao mae" ana" dayin dayo: kham zo: ca" avako". Mao"So wa yao: bam: phan jham re be; khyoe' mhan" pye' byid: mung:- yao: bam: gyang" lho" zang baung: jham re phyo' qheim" pye' li" nae".

³Ce: byumyu" qe wa khomyhao" mamyao" re- ngonhaung" wa ASANG re magyaug: phug' mung: kho:kham maqo" bam lo:- ngadqere: kho:kham dayaug yaug ngonhaung" qhid' mae" pe" qo" kad' byid: nae" i?- ga: ta" li" genae".

⁴Yao: bam wa dao: seim jhau mung: madang: ra" dao:so: jham byid' ru we' pe" akyu" mabo: ra" myid vang" thao: ce' to" ako". Tarha" din: nyang: ru wa tarha" madin" khyo" boe" lo" va"- aijham wa yothaung: mae" khin cid' myo, gae we' dakhyo: yaug: qi" li" ako".

⁵Samari vomo" mae na: ra" byu qe wa gyaug mung: Bedaven mae" qhang nung: jaung lo: byaug yang: kaug' ngug: li" genae". Ai: nung: jaung lho re caung:pa" ra" yao: bam we' khinjaung qe wa ai: mathao mae kaug' ngug: li" genae". Ai: nho: qhang phungbao khyad' pye' au: re yao: bam wa gyi: ngug: li" genae".

⁶Ai: nung: jaung lho re wa- Asuri khyo khosin" qhid' mae" khang: khyo" dao: lo" li" genae". Israel wa yao: cao" ye" ra" pha,jhi" dao: mathao mae nga: yeim mung: qho' phau" li" nae".

⁷Yao" nho: kho:kham wa- qid dao mae" sag' je; re we' dakhyo: ci: lo" ru qhug' li" nae".

⁸Israel byumyu" qe solho re caung:pa" byid' ra" jo, qo- Aven mae" bug gaung dao mae jo; ra" phan yham jham wa phyo' qheim" pye' ru qhug' genae". Yao: bam: phan dao mae zau: kyi we' myo, jham: yang se: nghoe' pye' byid' li" nae". Byu jham wa bam jham re- ngonhaung" re nyham: gela,- ga: bug gaung jham rere:- ngonhaung" re lonhai" gela,- ga: mho' yao: li" genae"- ga: ta" ra".

⁹ASANG wa- Israel byumyu" qe wa Gibea mae yao: bam ngore qobo shad' lhoe" rumae" qobo kad' ru mathang shi: ngad: ako". Aimung: Gibea mae yao: bam re gyekhe' ru cao" myhi: lo: li" nae".

¹⁰Ngo wa- ce: qobo qo" ra" byumyu" re khe' zin: mung: qobo dae byid: nae". Byumyu" qe wa yao: cao jho" qhan: mung: yao: bam re gye kad' li" genae". Israel byumyu" qenho: qobo myo: sho' mathao mae qobo dae byid' ru qhug' li" genae".

¹¹Israel wa- ganhae" dalhang gaug nao: nae" jin" jin" ngad sho' phyid' to: va" nung: bae: nau" we' dau: lo: ako". Ngadqere: ngo wa yao" nho: yaung" ra" lang zang: mae kyau: te' mung: nhoyu thung: byid' ru we' je: qug' ra" mau" mae ci nae" myid: phyid' va". Ngo wa Yuda re yothaung: phaug' nhao mung: Israel re yo kyo' the: she nhao va".

¹²Ngo wa- naoyao" qhid' mae yo sag' re phaug' yu wa,- din:man" rure qho: mung:- ngore phug' cao" ra" mathao mae qo" li" nae" shaman" jeju re yad: yu wa,- ni" ASANG ngo jhao" dam: lhang: lo nae" ayo, joe" va". Ngo joe" li" mung: ni" dao mae shaman" jeju vhe' sheim: byid: nae"- ein: ta" va".

¹³Ngadqere: naonhaung" wa ai: atha" makhyang: mashab: rure qho: mung: ai: ashi: re qhug' yad: yu: ako". Naonhaung" wa naonhaung" nho: mhug' pyag' ta" rumae" zaui" thug' ra" ashi: re zo" avako". Naonhaung" wa naonhaung" nho: gyekhe' myao: lhin" jham re myid: lam mung: myo" laug: ra" naonhaung" nho: gyezo: qere lam khug: ako".

¹⁴Mang: zin: poe wa ni" byu qejhao" joe" li" mung: ni" nho: gyetab vang alhab' re phyo' qheim" pye' ru qhug' li" nae". Aiwa- Shalman kho:kham: yang: Bethabe vomo" re gyekhe' mung: phyo' qheim" pye' ru we' zoshao: yao: myhi" qere yao: bam: zoshao jham we' daga" be; mhan" se' pye' ra" ba na we' dakhyo: ngad: li" nae".

¹⁵Bethela mae" byu qe we"- naonhaung" kad' lai: lo: ra" makhyang: mashab: mau" zo" jham: mathao mae naonhaung" mae airu: yao: boe" lo: li" genae". Gyekhe' qhid: li" we' Israel kho:kham shid: lo" li" nae".