Read Maru HOSEA 12 Bible Online

HOSEA 12 - Maru bible

HOSEA 12

¹Israel byumyu" qe ne, seim mae" myi" ayo, joe" sho' kad' ru ja: khao: ngo" wa pe" akyu" mabo: ru we' phyo' qheim" ru za: ngad: ra". mhug' pyag' ru we' aqan alan mau" jham wa yao: bam: phaung gaung: mae- je: myo" laug: li" ra". Yao: bam wa Asuri we' myid vang" thao: ce' jham to: mung: Egutu we' phaga: mau" qhan" ako".

²ASANG wa Yuda byu qere qobo zhaug' nae" qo" ra". Yao: wa Israel byu qere re: yao: bam: lo, mau" mathao mae qobo dae byid: naeva". Yao: wa yao: bam re yao: bam kad' lo: ru qhid' mae" yao: wa aibam: nho: aphug' tug' byid' li" nae".

³Yao: bam: phug' pho" Yaku wa yao" co' zam Eso" we' daga" yao: shid' tao: yao: myhi" nho: aung mae bo shi" au: mae" jho" zhaug' ako". Yaku qi" li" re Mao"So re gye phaug' kad' ra".

⁴Yao: wa mug: lagyo: dayaug we' jho" zhaug' mung: aung: pye' ra". Yao: wa ngug mung: shaman" jeju mho' ra". Aimung: Bethela mae Mao"So wa ngonhaung" nho: phug' pho" Yaku jhao" li" mung: yao: we' jho" jhau: ako".

⁵Ceru wa Qam: so' bo: thao" ra" Mao"So ASANG ngad: ra". ASANG ga" ra" mang wa yao: re caung:pa" nae" mang ngad: ra".

⁶Aimung: ana" Yaku myid:zo: qe we"- naonhaung" Mao"So re lam khug mung: yao: jhao" lhang: lo geri:- jhaug' zaug mung: din: man" na ge,. Aimung: naonhaung" nho: Mao"So mau" zaui: nae" rure nhag' lam: qhang qhang to: mung: lao" na ge,.

⁷ASANG wa- Israel byumyu" qe wa- Khanan byu qe we' dakhyo: yao: madangman: ngad: ako". Yao: bam wa yao: bam mae" zai vai mo, re maman" ra" jao ci mung: mhug' pyag' zo" ako".

⁸Yao: bam wa ngonhaung" mae jo,nho" qo" ra". Ngonhaung" zhau: vha: bo: ngonhaung" madangman" ra" khyo" jo,nho" qo" rure khag' yang qobo maqo" zhaug'- ga: ta" ako".

⁹Ngadqere: naonhaung" re- Egutu mae" jhui" phao: thug' lo: ra" naonhaung" Mao"So ASANG ngo wa din"pyad' yo mae naonhaung" jhao" ngo joe" li" au: naonhaung" na: lo: ru we' dakhyo: naonhaung" re zaung nau" jham mae dam: na nhao nae".

¹⁰Ngo wa lapa qere jhau mung: yao: bam re qhu" lho myo: sho' byid: va". Ngo wa lapa qe: nhad' khyo" yang nga" byumyu" re ta" peim: byid: va".

¹¹Ngadqere: Gilead mae solho jham re caung:pa" ako". Aimung: aijham re caung:pa" mo, wa shid: li" genae". Gilgala mae nung: jaung lo: jham re xeim: ngaui" byid' ako". Aimung: ai: jo, qo mae" phan jham wa pa:din" jham mae laug zang abam boe" lo" li" genae".

¹²Ngonhaung" nho: phug' pho" Yaku wa Mesopotamia khyo yham sang myhi" yeyu nae" qhid' mae" phao: lo" ca" re ai: jo, qo mae byu dayaug: qhid' mae" mau" zaui: mung: yao" nho: yao jham re zam: byid' ra".

¹³ASANG wa Israel byumyu" qere Egutu mae" khyad' khyui: yu mung: yao: bam re zam: nae" qhid' mae" lapa dayaug re nhao: ke' byid' ra".

¹⁴Israel byumyu" qe wa ASANG re alokho: sho' nhag' yo: nhao mung: yao: bam wa yao: bam shad' nghung" ra" byuse' yug: mau" mathao mae shid nae" man: qi" ako". ASANG wa yao: bam: yang nga: yeim nhao: ra" mathao mae yao: bam re qobo dae byid' li" nae".