Read Maru HOSEA 14 Bible Online

HOSEA 14 - Maru bible

HOSEA 14

¹Israel byu qe we"- naonhaung" Mao"So ASANG jhao" dam: tug' lo ge,. Naonhaung" qobo wa naonhaung" re khyid au: thaung: mung: gyang: lang: nhao: ava".

²ASANG jhao" dam: tug' lo mung: ce: akyu" mho' dao: wa yao: re qhaug' byid' ra" ngaui" xeim: ngad vashao:- ngonhaung" qobo jham alhab' re khyad' pye' byid: mung: ngonhaung" nho: akyu" mho' dao: re khae: yu byid: la,- aimung: ngonhaung" dao:so: to" ru we' dakhyo: nao re caung:khin" nae".

³Asuri wa ngonhaung" re khonhae" re: maqo" khyad' yu- gyekhe' myao: jham wa ngonhaung" re maqo" gug:gam byid:- ngonhaung" nho: solho jham re ngonhaung" nho: Mao"So ngad: ein: khonhae" re: madam: ta" lo nae". O" ASANG we"- nao wa khag' jhao" maba: dam: tug' phaug' lo mo, re nhag' khyag' myid qhu" byid' ra".

⁴ASANG ta" ru wa- Nga" byumyu" qere ngo jhao" dam: jhui" yu nae"- ngo wa yao: bam re nga" nhag' lam: alhab' yang jhid'de; nae". Yao: bam re ngo khonhae" re: nhag' mayo: lo nae".

⁵Ngo wa Israel byumyu" qhid' mae" kyaug' ho: ra" mug:myid mae" mug: qid we' dakhyo: ngad li" nae". Yao: bam wa bin: jham we' dakhyo: bu" yaung" li" genae". Yao: bam wa Lebanon mae" sag' gae jham we' dakhyo: agyi: tang za: cin" li" genae".

⁶Yao: bam wa asag' yaug: qi: mung: daui: na: li" genae". Aimung: zhanlun gae jham we' dakhyo: yaung" li" genae". Yao: bam wa Lebanon mae" shaug' gae jham ru: ngham: sheim nae: li" genae".

⁷Yao: bam wa ngoyang gug:gam byid' ra" aqab khug mae dalhang dam: na: li" genae". Yao: bam wa gaug zo maui: lam: qho: mung: sabyi khyae we' dakhyo: ashi: zaui" li" genae". Yao: bam wa Lebanon mae" sabyi qang: we' dakhyo: suhau: qi" li" genae".

⁸Israel byumyu" qe wa- solho jham we' pe" masin: lo: genae". Aimung: ngo wa yao: bam: akyu" mho' dao: re phaug' tau: byid: mung: yao: bam re gun caung byid: nae". Ngo wa khonhae" re: avho' nyug: ra" sag' gae we' dakhyo: yao: bam re ba sham qab byid: nae". Ngo wa yao: bam: shaman" jeju alhab' nho: jhaung qham ngad:.

⁹Pha,jhi" bo mo, wa cemae tung" to" rure ba: gyo" yu mung:- yao: bam: nhag' lam: khug mae xam" yu vageshao:- ASANG: khyo jham wa jo: ra"- aimung: din: man: mo, wa aijham re cao" yang: daui: na: ako". Ngadqere: qobo jab qe kam" wa aijham re pe" xan: masun: geyang: khyid au: thaung: mung: gyang: lang" lo" ako".