Read Maru HOSEA 4 Bible Online

HOSEA 4 - Maru bible

HOSEA 4

¹ASANG wa ce: mug:myid mae na: ra" Israel byumyu" qere gye kad' nae" qobo zhaug' ava". Israel we"- tae" gyo: wa,- Ce: mug:myid mae jhaug' zaug: ru majo,- aimung: ai: byumyu" qere: ngore Mao"So khyo" malhang: yu ngad: ako".

²Yao: bam wa dao:so: to: re lhoe" pye' mung: kad' ako". Yao: bam wa- mhug' dao: ta" ako"- byuse' khug' ru we' myi: lao shad' ako". Yug: mau" je: myo" laug: li" mung: byuse' mau" dalam: bin dalam: kad' thug' ako".

³Aimung: ai: mug:myid wa kyaug' ho: byaug: li" nae"- aimung: ai: mug:myid dao mae daui: nam alhab' shid: shao" byaug: li" genae". Gug'nyhug' alhab'- ngho' alhab' we' ngo: jham lhao" re: shid: byaug: li" genae".

⁴ASANG wa- ai: byumyu" qere khag' yang qobo maqo" zhaug' genae". Yao: bam re qeim re: khag' maqo" qeim: li" genae". Naonhaung" nho: khinjaung qe: dao mae ngo qobo vhin: ra".

⁵Naonhaung" wa myi" re: na" re: paui mung: lhad' zo: lhad' shaug' ako". Lapa qere: naonhaung" tho' pe" maje: gai ngad: ako". Ngo wa naonhaung" nho: yao: myhi" Israel re phyo' qheim" pye' naeva".

⁶Nga" byumyu" qe wa jeim" lo" avako". Pe"mung:ga"re yao: bam wa ngore- malhang: yu ngad: ako". Khinjaung qe naonhaung" wa- Ngo re lhang: yu nae" ha: pye' mung: nga" mho" shid' khyo re ngag: avako". Airumung:- ngo wa naonhaung" re ngag: lhaui" pye' mung:- naonhaung" nho: yauggai zo: qere: re: nga" nho: khinjaung qekhyo" malhang: yu nae".

⁷Naonhaung" khinjaung qe je: myo: lao" je yang: naonhaung" wa ngore je yang: qobo je: shad' ako". Aimung: ngo wa naonhaung" nho: nga: ye, khyo re phoe: lo" nhao nae".

⁸Naonhaung" wa nga" byumyu" qenho: qobo mathao mae jo,nho" qo" lo: ako". Aimung: naonhaung" wa yao: bam re je yang: qobo xo' kad' nhao nug: ako".

⁹Ai: byumyu" we' dakhyo: naonhaung" re: qobo dae leim zo" li" genae". Ngo wa naonhaung" re qobo dae byid: mung:- naonhaung" shad' nghung" ra" qobo: nhao: mathao mae aphug' khyug' ca" genae".

¹⁰Naonhaung" wa naonhaung" nho: ngaui" xeim: jham mae" gae bam jham re zo: gengadqere: vae: amoe' na: shi: genae". Naonhaung" wa myhung: je" li" nae" so jham re caung:pa" ngadqere: bug daung: ngad: jo, shi: genae". Pe"mung:ga"re naonhaung" wa ngo mae" phaug' lo" mung: so gatau jhao" cao" lo" ako"- ga: ta" ra".

¹¹ASANG wa- sabyi qang: axug' we' asag' wa nga" byumyu" qenho: laba lajhao ba: myid: kho" nae" rure lhad' pye' ava".

¹²Yao: bam wa thao: je; mae" qhu" lho re mho' ako". Yao: bam ba nug: rure thao: khyaung" yang ta" kyo" ra". Yao: bam wa ngore to: co' avako". Shava myhi" boe" lo" ra" myiqe: dayaug we' dakhyo: yao: bam wa yao: bam: gaung re gatau: so jhao" byid' pye' avako".

¹³Yao: bam wa bam nyaug dao mae" gyang"lho" jo, qo jham mae ngaui" xeim: ngaui" byid: mung:- yao: bam wa bug gaung dao jham mae yaug ra" myhao mung: avho' maung" ra" sag' gae jham: qao: mae nae pyo: sheim phad' ngaui" ako". Pe"mung:ga"re ai: tau mae ba sham gyai pyo" ra". Ai: mathao khyo"- naonhaung" nho: myiqe: zo: qe wa shava myhi" khyo" caung: da" ako". Aimung: naonhaung" nho: dau mo" qe wa myi:-lao shad' ako".

¹⁴Ngadqere: ngo wa yao: bam re ce: mathao mae qobo dae mabyid: nae"- pe"mung:ga"re naonhaung" yao: re: caung:pa" yham mae" shava myhi" we' zam" qin" ako". Aimung: naonhaung" wa yao: bam we' daga" taung bug: so jham re xeim: ngaui" byid' ako". Dao: khyo: jo, ru we' dakhyo: qhid' khyo thao khyo maba: myid: ra" byumyu" wa byo; qeim: lo" nae".

¹⁵Israel byumyu" naonhaung" wa ngo mae jhaug' mazaug gengadqere:- Yuda wa ai we' dakhyo: qobo maqo" vashao:- Gilgala mae re: Bedaven mae re: ai: jo, qo mae daui: na: ra" ASANG: mang re dao:so: dato: ge,.

¹⁶Israel byumyu" qe wa loze jham we' dakhyo: nhag' lam: qao: ako". Ngo wa yao: bam re khoru: kad' mung: yao jham re we' dakhyo: mhin: yo mae qo" zho: nae" i?

¹⁷Israel byumyu" qe wa- solho jham: yang vha" mung: maung: to" ru qhug' ako". Yao: bam yao" khyo khyo ye" lo" vageshao:-

¹⁸sabyi qang: myo: sho' phin" shaug' thao yao: bam wa yao: bam: shava myhi" shava pho" mau" mae pyo" na: ako". Yao: bam wa- nga: qo" ru tho' nga: yeim: rure je: o: ako".

¹⁹Yao: bam wa la hug' yang hug' tao" ke' ruru: jhui" yu: pye' ru qhug' li" genae". Aimung: yao: bam wa- yao: bam: taung bug: so re xeim: ngaui" byid' ra" mau" zo" mathao mae qho' phau" li" genae".