Read Maru HOSEA 5 Bible Online

HOSEA 5 - Maru bible

HOSEA 5

¹Khinjaung qe naonhaung" we"- cere tae" gyo: ge,. Israel byumyu" we" nyang" za: gyo" yu ge,. Kho:kham ug' khug' dinkhu: mae bobo mo, naonhaung" we"- tae" gyo: ge,. Naonhaung" wa tarha" din: nyang: ru yang dao: phyid' ca" nae" ang: ako". Aimung: dao: kho' ru wa- naonhaung" dao mae gyo" zao" li" nae". Naonhaung" wa Mizpa mae" lha" boe" lo vako" ra" Tabo bam mae khae: to" ra" myho boe" byaug va".

²Akakia vomo" mae no; ra" dung: khung: boe" lo: avako". Aimung: ngo wa naonhaung" alhab' re qobo dae byid: nae".

³Israel byumyu" qe pe" we' dau: rure ngo ba:- yao: wa ngo mae" maqo" phao: vho' ngad: ra". Yao: wa jhaug' mazaug lo mung:- yao" byumyu" qe wa ngore caung:pa" nae" maman: qi" ngad: ako".

⁴Ai: byumyu" kad' ra" makhyang: mashab: mau" wa yao: bam re Mao"So jhao" maqo" lhang: phaug' lo nae" khyo: tam" pye' byid' ra". Solho re caung:pa" ra" lalam lakhug wa yao: bam re tang za: zaui" ci: ava". Aimung: yao: bam wa ASANG re malhang: yu ngad: ako".

⁵Israel byumyu" nho: ngad beim" myid wa yao: bam re gye kad' yang: hug' yao: ra". Yao: bam: qobo jham wa yao: bam re khyid au: thaung: mung: lang" lo" nhao: ako". Aimung: Yuda mung" byu qere: yao: bam we' daga" gyang: lang" lo" ako".

⁶Yao: bam wa ASANG re xeim: ngaui" byid: nae" qhid' mae" yao: bam: yao jham we' nung: jham re ciye" ako". Ngadqere: ai jham wa yao: bam re pe" akyu" mabyid: ngad: ako". Yao: bam wa yao: re maqhug' qho: myao ngad: ako". Pe"mung:ga"re yao: wa yao: bam re to: co' ava".

⁷Yao: bam wa ASANG re jhaug' mazaug kad' lo: avako". Yao: bam: myid:zo: qe wa yao" yang masang - aimung: ana" wa yao: bam we' yao: bam: mug:myid re mamyao" re phyo' pye' naeva".

⁸Gibea mae gyekhe' nae" labo" mad: ke' ge, Rama mae gye peim" ra" thoe kyo" ke' ge,. Bedaven mae mang: zin: nae" hug' thoe kyo" ke' ge,- Benyamin kaung mae" yauggai qe we"- gyekhe' ye: ge,.

⁹Qobo dae byid: nae" ba na wa joe" li" na: ava". Aimung: Israel wa byo qeim" lo" li" nae". Israel byumyu" qe we" ceru wa dang dang yao: boe" lo: li" nae".

¹⁰ASANG wa- Yuda zug: ade qe wa Israel re mug: jhin: jhin" vao ye: mung: yao: mae" mug:myid re khug' yu: pye' byid: vako" ru yang ngo nhag' yo" na:- aimung: ngo wa yao: bam: dao mae qid je" li" ru we' dakhyo: qobo dae vhe' sheim: byid: nae".

¹¹Israel wa deim" zag zo" ru dayin dayo: de, zo" na: ra". Yao: sang: ra" mug:myid re yao: ci phyaug' pye' ava". Pe"mung:ga"re- yao: wa yao: re byid: nae" pe" maqo" mo, jhao" bao" thaug' ru qo" yu nae" qhid' mae" maqad maqui" jhan" ra".

¹²Ngo wa Israel dao mae byo; qeim: ru ciye: byid: mung: Yuda mung" byu qe: dao mae byo; qeim: ru ciye: byid: nae"- ga: ta" ra".

¹³Israel wa yao: khoqhi" no: na: rure the' myao mung: Yuda wa yao: yao" dae khu re the' myao lao"- Israel wa Asuri jhao" ye: mung: qi" qhang: ra" khosin" mo" re bao" thaug' nae" mho' ra". Ngadqere: yao: wa yao: bam re no maqo" ya: gai byid:- yao: bam: dae khu re maqo" gai nhao ngad: ra".

¹⁴Ngo wa Israel we' Yuda byu qere khang khyi dadau: we' dakhyo: khe' zin: nae". Yao: shid' zo: re ngo yao" yang yao: adau dau lao" cad' pye' mung: yao: bam re to: co' nae". Yao: bam re ngo: yang she: khyad' lo" re khag' yang maqo" khyad' yu: li" genae".

¹⁵Ngo wa nga" byumyu" re- yao: bam yao" qobo: mathao mae ngang" sho' qobo dae dayin dayo: leim: zo: mung: ngore qho ko" ra" ayo, joe" sho' shapye' to: nae". Yao: bam: dayin dayo: qug khai: mae ngore qho: lo ko" maba ga: ta" ra".