Read Maru HOSEA 8 Bible Online

HOSEA 8 - Maru bible

HOSEA 8

¹ASANG wa- gye peim: thoe myhang" ke' ge,- gyevo qe wa zeim baung: we' dakhyo: nga" mug:myid khyo dao" lhu: gyo" li" na: ako". Nga" byumyu" qe wa ngoyang yao: bam we' kad' to" ra" dao: thang" re phyo' qheim" pye' mung: nga" mho" shid' rure gye kad' tau: lhan" pye' avako".

²Yao: bam wa ngore yao: bam: Mao"So ga: mhang" mung:- yao: bam yao: wa nga" byumyu" ngad: yao: bam ngore ba: ga: ta" ngadqere:-

³Yao: bam wa gai: rure ngag: lhaui" pye' avako". Ce: ra" mathao mae yao: bam: gyevo qe wa yao: bam re cao" khe' li" genae".

⁴Nga" byumyu" qe wa kho:kham qere khyin gengadqere: yao: bam myid o: ra" khyo" kad' ako". Yao: bam wa zug: ade, au: jhaung qere jaung: san: to: gengadqere:- nga" myid vang" ru mabo ngad: ra". Yao: bam wa yao: bam: ngaui we' qhang re yu mung: solho kad' ako". Aiwa yao: bam yao" nho: byo; qeim khyo ngad: ra".

⁵Samari vobyu qeyang- caung:pa" ra" qhang nung: jaung lho re ngo nghang" ra". Ngo wa yao: bam re nhag' jam: yo" ra". Khomyhao" myao" re she, yao: bam wa solho re caung:pa" ru to" pye' genae" laug i?

⁶Israel lagsama dayaug wa solho re kad' to" ra". Aimung: aiwa so yao: mangad: ngad: ra". Samari mae caung:pa" ra" qhang nung: jaung lho wa aje, aman" be; khyoe' pye' ru qhug' nae".

⁷Yao: bam wa la re qho" ke' re- la qam" re qo" yad: yu: li" genae". Maqao" ra" khaung: yo wa khonhae" re: mug dakhye' qo" boe" nhao nae" mangad:- airu mug boe" sho' ngadqere: aire taung bug: byu qeyang zo" pye' byid' li" genae".

⁸Israel wa gaje: byumyu" qeru: boe" byaug mung: go; byaug: ra" ug' we' dakhyo: pe" akyu" mabo ngad: ra".

⁹Israel byumyu" qe wa loze: lae" we' dakhyo: no: gyi: zag mung: yao: bam o: ra" khyo ye" lo" ako". Yao: bam wa Asuri mae" bao" thaug' yu: ru qo" nae" qhid' mae" jhin" ye" lo" ako". Aimung: yao: bam re gug:gam byid: nae" qhid' mae" gaje: byumyu" qere ngaui byid' ako".

¹⁰Ngadqere: ana" wa ngoyang yao: bam re sham" zhang: to: mung: qobo dae byid: naeva". Khomyhao" makyo re yao: bam wa Asuri kho sin" yang yao: bam re deim" zag zo: lao" dae no mung: lao" thin: na: li" genae".

¹¹Israel qe wa qobo jham re yu: pye' nae" qhid' mae" phan myo: sho' je: zhaug' lao" qobo kad' nae" jo, qo je: myo: sho' qo" ako".

¹²Ngo wa ai: byumyu" qhid' mae" matho' nghe' losho' ngad: ra" mho" shid' dao: jham re tung" byid: ngadqere:- yao: bam wa aijham re mamyao qu" ra" byumyu" taung bug we' dakhyo: ngag: lhaui" pye' ako".

¹³Yao: bam wa ngore xeim: ngaui" byid: mung: ai: xeim: jham mae" sho: re zo" ako". Ngadqere: ngo ASANG wa aire mangaui byid:- aimung: ana" ngo wa yao: bam: qobo re xam" ci: ru we'- ai: mathao mae yao: bam re qobo dae byid: nae". Ngo wa yao: bam re Egutu khyo dam: tug' nhao: ke' nae" wo".

¹⁴Israel byumyu" qe wa kho:kham kho" jham re zhaug' to" ako". Ngadqere: yao: bam wa yao: bam re Kad' To: Yaug re to" myhid' pye' avako". Yuda byumyu" qe wa gyetab vang gyag ga" ra" vomo" jham re te" to" ako". Ngo wa yao: bam: kho:kham kho" jham we' vomo" jham re nga" jeim" pye" nae" myi: re nhao: khyo" ke' nae".