Read Maru AMO 1 Bible Online

AMO 1 - Maru bible

AMO 1

¹Cejham wa Tekoa vogaung: mae" yao zaung" yaug Amo nho: dao: jham ngad: ra". Yuda mung" mae Uzia kho:kham boe" mung: Yosha nho: yao: zo: Yeroboam wa Israel mung" mae kho:kham kad' na: au: myid lab: lab nae" shid' zin ca" shi" au: re Mao"So wa Israel we' sin: yang: cegu: alhab' Amo re qhu" byid' ra".

²Amo ta" ru wa- ASANG wa Ziun bam mae" zag: hug' ke' ra". Yao" nho: thoe wa Yerusalem mae" thug' li" ra". Mhin: gyo, jao: jham wa kyaug byaug' mung: Khame bam mae" vohau: jham wa kyaug' ma" byaug: ra"- ga: ta" ra".

³ASANG wa Damasku mae" byu qe wa paug' yang: paug' yang: qobo kad' ako". Aimung: yao: bam re ngo dang za: qobo dae byid: nae". Yao: bam wa Gilead mae" byu qere se' da: be, khyad' kad' ako".

⁴Aimung: ngo wa- Hazae kho:kham: yang zhaug' to" ra" kho:kham kho" re myi: nhao: ke' byid: nae". Benhadad kho:kham nho: gyetab vogaung: jham rere: ngo ngha" pye' byid: nae".

⁵Damasku vogaung: kham: mo" jham rere: ngoyang phyo' sin" pye' byid: mung: Aven Lao: Khaung: mae" mang: byu qe we' Betheden mang: mae" zug: kho:kham re yu: pye' nae". Suri byu qe wa Kira mung" khyo kyam: byu qekhyo" jhui" yu: pye' ru qhug' genae"- ga: ta" ra".

⁶ASANG wa- Gaza mae" byu qe wa paug' yang: yang: qobo shad' ako". Ceru: mung: yao: bam re ngo wa dang za: yao: bam re qobo dae byid: nae". Yao: bam wa byumyu" damyu" geim" re jhui" yu mung: Edom mung" mae" byu: lo, khyo jeim khyo" aung: byid' pye' qhug' ako".

⁷Aimung: ngo wa- Gaza vogaung: vang re myi" yang phyo' qheim" pye' nhao mung: yao" nho: gyetab vogaung: jham re ngha" khyo" pye' nae".

⁸Ngo wa- Ashdod we' Ashkelon jham mae" zug: kho:kham jham re yu: pye' nae". Ekron vogaung: mo" re ngo: yang qobo dae byid: nae". Aimung: na: dang: jo; ra" Philisti byu alhab' mo, wa shid: li" genae"- ga: ta" ra".

⁹ASANG wa- Ture vobyu qe wa paug' yang: yang: qobo shad' ako". Ceru: mung: yao: bam re ngo dang za: qobo dae byid: nae". Yao: bam wa byu damyu" geim" re taung" yu mung: Edom mung" mae lo" pyaung" nha: to" ako". Airumung: yao: bam to" ra" myid vang" thao: ce' re macao" ngad: ako".

¹⁰Aimung: ngo wa- Ture vogaung: vang jham re myi" khyo" ke' byid: mung: yao" nho: gyetab vogaung: jham re ngha" khyo" pye' nae"- ga: ta" ra".

¹¹ASANG wa Edom mae" byu qe wa paug' yang: yang: qobo shad' ako". Cerumung: ngo wa yao: bam re ngo dang za: yao: qobo dae byid: nae". Yao: bam wa yao: bam: mao:nhaung: Israel qere khe' zin: mung: yao: bam re nhag' khyag' myid maqhu" byid: ngad: ako". Yao: bam nhag' yo" ru wa thao" ga" ru majo, aimung: khonhae" re: nhag' mashid qad ngad: ako".

¹²Ngo wa- Teman vogaung: dao mae myi: khyo" ke' mung: Bozra nho: gyetab vogaung: jham re ngha" khyo" pye' nae"- ga: ta" ra".

¹³ASANG wa- Amon byu qe wa paug' yang: yang: qobo shad' ako". Ceru: mung: yao: bam re dang za: ngo qobo dae byid: nae". Yao: bam wa mug:myid cae" yu nae" qhid' mae" gye khe' mung: Gilead mae" gaung la" ra" myiqe: qenho: vae: dug: jham re lhai" kho' pye' ako".

¹⁴Aimung: ngo wa- Raba vogaung: mo" vang re myi" yang phyo' pye' mung: yao: bam: gyetab vogaung: jham re ngha" khyo" pye' nae". Aimung: gye khe' ra" ba na mae" hug' thoe thug' mung: la qam" ru" ru mang: zin: thoe myang: li" li" nae".

¹⁵Kho:kham we' yao" nho: zug: ade, qe wa gamang: khyo zaug byaung" phao: lo" ca" genae"- ga: ta" ra".