Read Maru AMO 3 Bible Online

AMO 3 - Maru bible

AMO 3

¹Israel byumyu" qe we"- Egutu mae" jhui" thug' lo: ra" byumyu" damyu" geim" ra" mo, naonhaung" we' sin: yang ASANG ta" ra" ce: mungdao: re tae" gyo: ge,.

²Myidgaung: dao mae" byumyu" alhab' tho' mae naonhaung" re za: ngo: yang ba mung: gun caung: lo: ru ngad:- ceru: mung: yang: naonhaung" qobo wa gyai qu" gyaug qu" lhaung sho' ngad: ra". Amung: ai: qobo jham: ra" mathao mae naonhaung" re ngo qobo dae byid: ca" ra".

³Byu shid' yaug wa jho" qhug' nae" qhid' mae" maqham: to: lo: daga" za: gyaung: lhaung" su" i?

⁴Khang khyi wa seyo mae zo: sho: dadau: re: mamyao: to: lo: lhaung" kyid' ra" i? Khang khyi nau" wa yao" khang khyi khyaung mae daja: ja: re mathe' taung" to: lo: lhaung" myang: i?

⁵Lha" mae nhozo mate' to: re ngho' li" gai: myi" ra" i? Daja ja" yang mazai" phag' ke' re lha" wa gai: bag: lo" nae" i?

⁶Vogaung: byu qere magyaug: din: nhao lo: vomo" khug mae gye poe labo" lhaung" mad: ke' ako" i? ASANG: yang manhao: ke' re vomo" mae qug: khai: kyi" khyag' qo" joe" li" nae" i?

⁷Qam: so' bo: thao" ra" kho:kham ASANG wa yao" daui nhao o: kaung lapa jham re yao" myid: yaung: to" ru maqhu" byid: lo: daja: ja: lhaung" kad' thug' ke' ra" i?

⁸Khang khyi kyid' ke' re magyaug khag' na nae" i?- Qam: so' bo: thao" ra" kho:kham ASANG jau: ke' re yao" mungdao: re mata" hau" kyo: lo: khag' qo" jao" na nae" i?

⁹Egutu we' Ashdod kho:kham yham mae na mo, re ta" hau" kyo: wa,- Samari bam khaung: mae phaung: ham mung: aimae abyo, asin: mung: jo; ru we' yug: qobo mau" jham shad' lhoe" na: rure qu" ge,.

¹⁰ASANG wa- Ce: byumyu" qe wa yug: mau" we' aqan alan mau" khyo" lhad' yu: ra" ruyang yao: bam: yham mo" jham mae ke' pyang" to" ako". Yao: bam wa khoru: din:man: nae" ru lhao" re: maba ngad: ako".

¹¹Aimung:- gyevo daboe: wa yao: bam: mug: re li" lhang" kham" to: mung: yao: bam: gyelham jao: jham re phyo' qheim" pye' ru we' yao: bam: yham mo" jham re paui: yu: pye' byid' li" genae"- ga: ta" ra".

¹²ASANG wa- yao zaung" yaug wa khang khyi: yang zo" tang" to" ra" yao khyid shid' khyid we' nokhye' dalam: za: dam: qo" yu: ru we' dakhyo:- ana" au: langa: bo: ra" jaung: jham mae lang" jo; ra". Samari byu qemae" dajhid' za: mashid na dang: li" genae".

¹³Ana" tae" gyo: mung:- Yaku nho: myid:zo: qere ta" peim: wa,- ga: qam: so' bo: thao" ra" ASANG ta" ra".

¹⁴Israel byumyu" qere yao: bam yao" nho: qobo jham: mathao mae ngo qobo dae byid' ra" ba na re Bethela mae" phan jham re ngo phyo' qheim" pye' nae". Phan khao: ngo" mae" akhyug jham wa gyug' lo" mung: myidgaung khyo gyoe; gyo" lo" li" genae".

¹⁵Gyo, yo, laung" ra" yham jham we' xaung: gaung laung yo, laung" ra" yham jham re ngo phyo' qheim" pye' byid: nae". Xao zaui: jham: yang qu" yaung" taung" shaung: yhaung" to" ra" yham jham wa gyoe; gyo" byaug mung: yham qi: jham yham khao: ngo" re phyo' qheim" pye' ru qhug' li" genae"- ga: ta" ra".