Read Maru AMO 8 Bible Online

AMO 8 - Maru bible

AMO 8

¹Ngo wa kho:kham ASANG mae" qhu" lho gatau dalam: the' myao va". Ai: rumae shi: dagyan re ngo myao: ra".

²ASANG wa- Amo we"- Nao pe" the' myao: i?- ga: myid' ra". Ngo wa- shi: gyan dagyan re myao:- ein: tau: va". ASANG wa ngore- Nga" byumyu" Israel qenho: athao" wa joe" lo va" ra". Yao: bam re qobo dae byid: nae" ngo myid: yaung: to" rure madam: lhai: lo nae".

³Ai: ba na re kho:kham kho" mae" nghaui" caung: jham wa kaug' ngug thoe jham boe" lo" nae". Khyi" khao: ngo" mae Sushid mao jham jo; bam: li" nae". Aijham re sae za: shapye' li" genae"- ga: ta" ra".

⁴Maqo" mo, re zab: nhe: mung: ai: mug:myid mae" myaung sho: mo, re phyo' qheim" pye' ra" mo, we"- ceru re tae" gyo: ge,.

⁵Naonhaung" wa naonhaung" yao: re- ngonhaung" nho: gaug zo jham re aung: nae" qhid' mae" Dugno: Ba na jham re lao" ngau" bam va" lhe"- Dugno: Ba khonhae" gan: lo" nae" laug i? Airu: lao" ngonhaung" wa zai gau to' mung: maman" ra" jo lag we' jao: laug: re ci mung: zai vai mo, re mhug' vhan" zo: nae" ru wo".

⁶Mamo: ra" gaug re gau cao: cao: za: ngonhaung" qo" aung: zo: nae"- ngonhaung" wa khyid zhaung: dazam" phug' lhao" yao" jhin maqo" xe' ra" myaung yaug re qho: yu mung: jeim khyo" vai: yu nae" ru wo"- ga: ta" na: ako".

⁷Israel nho: Mao"So ASANG wa nhang: kheim: ke' va"- Ngo wa yao: bam: makhyang: mashab: mau" re khonhae" re: mato" myhid' pye' nae".

⁸Aimung: myidgaung wa myid lab: lab: nae". Aimung: mung"dan: khug mae na: ra" yaug khao: ngo" wa sang: kho: genae". Damung" geim" qhad qhad ga: laui: mung:- aiwa Nila gyaung: je" li"- gyo" lo" ru we' dakhyo: ngad nae".

⁹Ngoyang ba re ba khaung tau: ra" au: vao lo" nhao mung: myidgaung wa na" ayo, re cad' no; lo" nae" ayo, joe" lo: li" nae"- ein: kho:kham ASANG ngo ta" to: va".

¹⁰Ngo wa naonhaung" nho: pyo: poe jham re sushid poe boe" byaug nhao mung: naonhaung" nho: nghaui" caung: jham rere: kaug' ngug thoe jham boe" pye' nhao nae". Ngo wa naonhaung" nho: au: re qaug: jhad' pye' nhao mung: jid: mo" mai bau: ve, nhao nae". Amung: naonhaung" wa yauggai zo: zote: mathao mae kaug' ngug: ra" yao: myhi"- yao: pho" tao ru: boe" genae". Ai: ba na wa lo" thao" joe" sho' qug: khai: nae" ngad: ra".

¹¹Ai: mug: mae ngo: yang bao" khug khug' nhao: ke' nae" ayo, wa joe" li" na va". Mung" byu qe wa moe, phau" li" genae"- ngadqere: aiwa mug mangad: nae". Yao: bam wa qid shab' li" genae"- ngadqere: shaug' qid re: mangad: nae". Yao: bam wa ASANG mae" mungdao: re moe; shab' li" genae"- ein: ngo kho:kham ASANG ta" va".

¹²Mung" byu qe wa xo: tham: mae" Mug:gaung: panglai: joe" sho' na: lae" qin" li" genae". Aimung: mug: am: shad' mae" ba thug' shad' joe" sho' su" gam" qin" li" genae". Yao: bam wa khyi" khao: ngo" mae ASANG mae" mungdao: re cao" qho: qin" li" genae". Ngadqere: aire qhug' genae" mangad:.

¹³Ai: ba na mae qao" zin" ra" zolau: qe we' zomyi: qe lhao" re: qid shab' mung: gyang: lang" lo" li" genae".

¹⁴Samari solho jham: mang mae lao: yang: nhang: mo,- Dan so mang re lao: yang: nhang: mo, mangad: lao" Bersheba so mang re lao: yang: nhang: mo, ngad ko" ra" ai: byu qe wa gyang: lang" lo" li" genae". Ai: byu qe gyang: lang" lo" mung: madam: qo" to" genae".