Read Maru AMO 9 Bible Online

AMO 9 - Maru bible

AMO 9

¹Ngo wa phan nhae mae ASANG ye; jo; rure the' myao: ra". Yao: wa amyin" khyo" ke' ra". Caung:pa" Yham zang baung: au: re gang" qhi" be, wa, alao" phaui: lhab' geim" laui" nin" li" nae". Aijham re phyo' yu mung: byu qenho: au: lam: jham: dao mae gyo" zag nhao wa,. Dang: ra" byu qere ngoyang mang: zin: jao: mae se' pin" pye' nae". Khag' dayaug re: maqo" phao: loe, genae"- dayaug re: maloe, genae".

²Yao: bam wa movo: mug: khyo dau" vao: gyo" lo" gengadqere: yao: bam re ngoyang khe' taung" yu nae". Yao: bam wa mug: khaung khyo do, lo" gesho' ngadqere: yao: bam re ngo lao" khyo" yu nae".

³Yao: bam wa Khame bam nyaug mae phao: fo' qere: yao: bam re ngo qho: mung: taung" yu nae". Yao: bam wa panglai: tham: kao" mae ngo mae" phao: vho' ngadqere: yao: bam re bin: nae" qhid' mae" panglai: mao jaung re ngo amyin" byid' ke' nae".

⁴Yao: bam re yao: bam: gyevo qeyang taung" lo" gengadqere: yao: bam re aibam: yang se' pye' nae" qhid' mae" ngo amyin" byid: nae". Ngo wa yao: bam re bao" yu nae" mangad: lao" yao: bam re phyo' qheim" pye' nae" myid: phyid' va"- ga: ta" ra".

⁵Qam: so' bo: thao" ra" kho:kham ASANG wa myidgaung re tin" ke' mung: ai wa laui" nan" ra". Aimae na mo, alhab' kaug' ngug: li" genae". mug: myid geim" wa Nila gyaung: we' dakhyo: je" li"- gyo" lo" mung: ra".

⁶ASANG wa yao" nho: yham re mug: khaung mae zhaug' to" ra". myidgaung: atho' mae kam" wa mug:gaung khung" kad' to" ra". Yao: wa panglai: qid re khai: yu mung: myidgaung dao mae vhe' sheim" ra". Yao" nho: mang wa ASANG ngad: ra" lhe"-

⁷ASANG wa - Israel byumyu" qe we"- Ngo wa naonhaung" re myid: beim" ru we' dakhyo: Sudan byumyu" qere re: myid: beim" ra". Ngo wa naonhaung" re Egutu mae" jhui" yu: ru ngad: ru we' dakhyo: Philisti qere Krete mae" we' Ethiopia qere Kira mae" jhui" yu: ru ngad:-

⁸Ngo Qam: so' bo: ra" ASANG wa ce: nho: qobo thau: ra" Israel mung"dan: re lhaug' qu" na mung: myidgaung: dao mae" aire phyo' qheim" pye' nae"- ngadqere: ngo wa Yaku nho: myid:zo: alhab' re kam" maphyo' qheim" pye' nae".

⁹Ngo wa amyin" byid: mung: Israel byumyu" qere khyang" mae gaug ce' cin ce' khyang" ru we' dakhyo: khyang" pye' nae". Yao: bam re byumyu" qe: nho: agaung: mae khyang" pye' mung: aphug' made; ra" mo, re khyin: pye' nae".

¹⁰Mao"So wa dae te' ru ngonhaung jhao" jhao" li" nhao nae" mangad: ga: ta" ko" ra" nga" byumyu" qe: phaung mae" qobo jab qe alhab' wa gye poe mae se' pye' ru qhug' li" genae"- ga: ta" ra".

¹¹ASANG wa- byo; qeim: gyo" lo" va" yham we' dau: ra" Davi nho: mung"dan: re ngo yang dam: tau: to' byid: nae" ba na joe" li" na va". Ai: vogaung: vang jham re ngoyang: dam: nyhang" pho mung: dam: tau: to' to: nae". Ngo wa airu re dam: zhaug' mung: ganhae" gaco' mae" we' dakhyo: kad' nae".

¹²Airumung: Israel byumyu" qe wa ganhae" dalhang- Edom mug: mae boe" qu" va" mung"dan: jham re qo" aung: yu: pye' li" genae"- ga: ceru: boe" nhao nae" ASANG ta" ra".

¹³ASANG wa ai: ba na jham joe" lo: li" nae"- Ailao" gaug zo matho' yad: yu lo: sho' phyad phyad yaug qhang: lo: mung: sabyi qang: maaung: kad' lo: sho' sabyi zaui" li" nae". Bam jham wa sabyi cug qang: yug: sheim mung: bug gaung jham wa airu: yug: gyo" nae".

¹⁴Ngo wa- pyaung" jhui" lo" qhug' ra" nga" byumyu" qere yao: bam: mug: khyo jhui" tug' yu nae". Yao: bam wa byo; qeim: jo, ra" yao: bam: vomo" jham re dam: zhaug' te: mung: aimae na: li" genae". Yao: bam wa sabyi khyae kad' mung: sabyi qang: shaug' li" genae". Yao: bam wa qhovo: khyae kad' mung:- yao: bam qho" rumae" zo" na: li" genae".

¹⁵Ngo wa nga" nho: byumyu" qere yao: bam yao: re byid' to" ra" mug:myid mae qho: nae". Aimung: yao: bam re maqo" dam: phan" pye' genae" ga:- naonhaung" nho: Mao"So ASANG ta" to: ra".