Read Maru YONA 4 Bible Online

YONA 4 - Maru bible

YONA 4

¹Ceru: mung: rure Yona gyai manug: qu" mung: nhag' yo" na: ra".

²Aimung: yao: wa ASANG we"- nao wa ceru: yao: kad' li" naeva" ein: nga" yham mae ngo na: jo, shi" au: mae" mata" shila,- aimung: ngo wa Spain mung" khyo gai: boe" thao" mae" ye: nae" seim" va" nao wa jhid'de; nhag' lam: we' nhag' khyag' shogu: myid bo: ra" Mao"So ngad mung: khonhae" re: nhag' lam: qhang khonhae" re: nhag' myan"- khonhae" ngadqere: nhag' lam: dam: lhai: nae" jin" jin" ngad mung: qobo mabyid: nae" ga" rure ngo ba: to: va".

³ASANG we" ana" ngore shid nhao la, se,- daui: na nae tho' shid: byaug: re aje: gai lo nae ga: mho' yao: ra".

⁴ASANG wa nao airu: nhag' yo: nae" pe" akho: akhang" qo" i?- ga: phaug' tau" ra".

⁵Yona wa vogaung: mae" ba thug' shad' khyo phao: thug' ye: mung: yezaung: jo; ra". Yao: wa ba sham zaung dalam: kad' yu mung: ai: ba sham khug mae zaung: jo, yang: Nineve vogaung: pe" boe" li" nae" rure lhaug' qu" na: ra".

⁶Ai: au: Mao"So wa mhin: zo: dagae re yaug: thug' li" nhao mung: qug: khai: dajhid' yo lo" nae" qhid' mae" Yona dao mae ba sham qab byid' na: ra". Yona kam" wa ai: mhin: zo: gae: ra" mathao mae xo sho' ngaui bau" na: ra".

⁷Ngadqere: thao: ba mug: bo" zo" re Mao"So: mungdao: khyo" li" ra" bathaung dadau" yang ai: mhin: zo: re bin" se' pye' byid' ra".

⁸Ba thug' li" thao re Mao"So wa ba thug' shad' mae" la laung hug' nhao: ke' ra". Aimung: Yona wa yao" au: tho' mae ba laung te' te' zao" mung: so' kho' na: ra". Aimung: yao: wa shid nug nug: byaug: ra". Yao: wa ngo wa daui: na nae" tho' shid: byaug: re aje: gai naegya: lhe"- ga: ta" ra".

⁹Ngadqere: Mao"So wa yao: re ai: mhin: zo: gae re nhag' yo: nae" nao pe" akho: akhang" qo" i? ga: ta" ra".

¹⁰ASANG wa yao: re ce: mhin: zo: gae wa damyi re za: yaug: thug' li" mung: thao: ba mae baui" byaug: ra". Ai: mhin: zo: gae re nao qho" rure: mangad: yaug: qi" li" nae" qhid' mae" re: nao pe" makad' ngadqere: ai: qhid' mae" nao wa amyid: avho: mung thoe gyo" ra".

¹¹Airumung: ngo wa Nineve vogaung: mo" qhid' mae" ai: tho' mago" je yang: khonho" amyid: avho: mung: thoe gyo: gai: ra" i? Ai: vogaung: mo" khug mae nhag' mabo shiko" ra" zoshao angai 120,000 we' gug'nyhug' myo: sho' na: ako"- ga: ta" ra".