Read Maru GYAUNG: SU: 12 Bible Online

GYAUNG: SU: 12 - Maru bible

GYAUNG: SU: 12

¹Moshe wa Kusha myiqe: dayaug we' lo, xo' yu: ra". Miriam we' Arun tao wa ai: mathao mae yao: re qobo vhin dao: jhau: ako".

²Yao: shid' tao wa- ASANG wa Moshe khyo" za: dao: jhau: ra" i? Yao: wa nga" shid' tao khyo" yang re: dao: majhau ngad: ra" i? ga: ta" ako". ASANG wa yao: shid' tao ta" rure the' gyo" ra".

³(Moshe wa nhag' lam: nyham: khyo" yaug ngad: ra". Myid gaung: dao mae gatau qe tho' jeyang: nhag' lam: nyham: khyo" yaug ngad: ra".)

⁴ASANG wa nyag din taung" Moshe- Arun we' Miriam bam re- naonhaung" sam yaug nga" qhid' kheim: Zaung khyo li" genae" rure ngo o: ra"- ga: ta" ra". Yao: bam re: ye" ako".

⁵ASANG wa jham thaui: zang baung: mae gyo" li" mung:-Zaung kham: mae li" ye; jo, yang:- Arun we"- Miriam we"- ga: khai: ke' ra". Yao: shid' tao wa qhid' khyo ye" ako".

⁶Ailao" ASANG wa- ana" ngo ta" nae" dao: re tae" gyo: ge,. Naonhaung" phaung gaung: mae lapa qe na gelao" wa ngo wa yao: bam re qhu" lho mae ngoyao" gaung re qhu" byid: nae"- yab mo, mae yao: bam re dao: jhau nae".

⁷Nga" daui daui yaug Moshe we' ngo dao: jho" jhau: ru wa gatau we' jho" shai" ra". Ngo wa yao: re nga" byumyu" Israel alhab' re au: she nae" au: jhaung kad' nhao: to" ru ngad:-

⁸Aimung: ngo wa yao: re myo, nho jho" zam" zaung yang: de: de: za: dao: jhau: ra". Vai: sham" khyo" majhau- yao: wa nga" akhyao re lhao" re: myao va" yaug ngad: ra". Ni" shid' tao wa nga" daui daui yaug Moshe re khoru: mung: gaui mho yang: qobo vae" vhin ko" i? ga: ta" ra".

⁹ASANG wa yao: tao re nhag' yo" ra". Alao" yao: to" lo" mung:-

¹⁰Jham thaui: ai: Zaung mae" to" lo" au:- nyag din taung" Miriam nho: shoqid wa mao gae: de; li" mung:- gyu: ru: phyu: lo" byaug: ra". Arun wa yao: re qu" mung: Miriam wa ye,bab no de; byaug va" rure myao: ra".

¹¹Ailao" Arun wa Moshe re- nhag bo we" jeju khyo"- nga" shid' tao: nho: go: joe; ra" qobo mathao mae ce: qobo dae re nga" shid' tao re dakham zo: nhao la,-

¹²Yao" gaung sho: agaung: daqi" zo" pye' yang: ashid khau: ra" yaug we' dakhyo: yao: re daboe" li" nhao- ga: ta" ra".

¹³Moshe wa o" Mao"So we"- yao: re gai byid: la, wo"- ga: ASANG re mho' yao: ra".

¹⁴Ailao" ASANG wa- yao: pho" yang yao" myo, khung: re khata: phoe" sheim: yang: ngad: re yao: wa yao" qho' phau" rure dala ban kham zo: qo: ra". Airumung: yao: re jamu taung gaung shad' khyo yena: jo, nhao wa,- ai:thao yao: re yegai: jhui" tug' yu: ra" ga: phaug' tau" ra".

¹⁵Miriam wa jamu taung gaung khyo nhad' ba yenha: to" ru qhug' ra". Miriam re maye: jhui" vhao" yu yu wa- amyu" byu qe mato" ko" ngad: ra".

¹⁶Ai: thao re yao: bam wa Hazerod mae" to" mung: Paran din"pyad' yo mae jamu kad' ako".