Read Maru GYAUNG: SU: 14 Bible Online

GYAUNG: SU: 14 - Maru bible

GYAUNG: SU: 14

¹Amyu" byu qe wa nhag' lam: thao" yang damyi geim" hug' bo" ako".

²Yao: bam wa Moshe we' Arun tao re nyhung mung:- Egutu mung" mae shid va" ngad: re je: gai: ra"- mangad: lao" ce: din"pyad' yo mae shid: re je: gai va".

³ASANG wa ce: mung" khyo ngonhaung" re pe"mung: jhui" lo: ra" i? Ngonhaung" wa gyekhe' poe mae se' pye' ru qhug' mung:- ngonhaung" yham sang myhi" qe we' zoshao qe wa taung" yu: ru qhug' li" genae". Egutu mung" khyo dam: tug' lo" re je: magai nae" i? ga: ta" ako".

⁴Airumung: yao: bam wa au: jhaung dayaug khyin: yu mung: Egutu mung" khyo dam: tug' lo" gelang: ga: yao: cao: jho" ta" ako".

⁵Ailao"- Moshe we' Arun shid' tao wa amyu" byu qe alhab' mo; qhid' kheim: mae myid gaung khyo goe; gyo" ako".

⁶Jin" byu qe mae" shid' yaug ngad ko" ra" Nun nho: yauggai zo: Yoshu we' Khaleb wa nhag' kaug' ru we' yao: shid' yaug: nho: mai bau: jham re lao" cad' pye' mung:-

⁷Amyu" byu qere- ngonhaung" yejo" qu" ra" mung" wa gyai gai: ra" mung" ngad: ra". ASANG ngonhaung" re o ngaui yang: ngad: re yao: wa ngonhaung" re ai: khyo jhui" ye" li" nae". Ai: mug: gai we' myid xau bo: ra" mung" ngonhaung" re byid' li" nae".

⁸

⁹ASANG re datau: lhan: ge,- ai: mae na: ra" byu qere dagyaug ge,- ngonhaung" yao: bam re laui laui za: aung: pye' li" nae". ASANG wa ngonhaung" we' daga" ngad mung:- yao: bam re gug: gam byid' ra" so jham re aung: pye' ava". Airumung: dagyaug ge,- ga: ta" ako".

¹⁰Byu phung: geim" wa yao: shid' yaug re laug baui: yang pye' se' pye' nae" kyaug' nhin" na: ako". Ngadqere: amyu" byu qe wa nyag din taung" Zaung tho' mae ASANG: qhid' kheim: mae" bao qhui: ra" bo" bao re the' myao: ako".

¹¹ASANG wa Moshe re- ce: amyu" byu qe wa yao: bam: phaung gaung: mae mug' pho: mau" gyai myo: sho' ngo kad' qhu" sho' ngadqere:- ce: amyu" byu qe wa khomyhao" joe" sho' ngore ngag: pye' na genae" laug i? Khomyhao" joe" sho' ngore malam khug lo: yao: bam na genae" laug i?

¹²Ngo wa yao: bam jhao" qam" nhao: ke' mung: yao: bam re se' tam" pye' nae". Ngadqere: nao re wa yao: bam tho' je: qi" ru we' qam: je: bo: ra" byumyu" damyu" nho: yao: pho" boe" nhao nae"- ga: ta" ra".

¹³Moshe wa ASANG re- nao wa ce: amyu" byu qere ni" qam: so' yang Egutu mung" mae" jhui" thug' lo: ra". Ni" amyu" byu qe: dao mae nao kad' ra" khyo re Egutu byu qe the' gyo: gelao"-

¹⁴Yao: bam wa ce: mung" mae na ko" ra" byu qere ai: khyo ta" kyo" li" genae". Nao ASANG wa ngonhaung" we' daga" na mung:- ni" jham thaui: ngonhaung" au: tho' mae thang: jo, lao"- myao jao: mae de: de: za: nao na: qhu" byid' ra" khyo we'- na" mae nao wa ngonhaung" qhid' au: khyo jham thaui: zang baung: mae ye" lo" mung: myi" re ngad lao" wa myi: zang bao mae ye" lo" ra"- ga" rure ai: byu qe the' gyo" to: gau ngad: ako".

¹⁵Ana" nao wa ni" amyu" byu qere se' pye' yang: ngad: re ni" lahau: mang qi" ra" thoe re the' gyo" ra" mo, wa-

¹⁶Yao: bam re byid: nae" ga: nao dao:so: byid' to" ra" mung" khyo yao: bam re nao maqo" jhui" ye: yang: ni" amyu" byu qere din"pyad' yo mae se' pye' ra" ga: ta" li" genae".

¹⁷Airumung: ana"- ASANG we"- ngonhaung" re qam: so' qhu" byid: mung:- ngo ASANG wa nhag' yo: laui yaug mangad: ngo wa qi" qhang: ra" jhid'de; myid qhu" byid: mung: jhaug' zaug: ru we' qobo we' tau: lhan" rure qobo khyad' byid: yaug ngad:- ngadqere: ngo wa yao: bam: myhi" pho" qenho: qobo qhid' mae" yao: zo:- yao: myid: qere byu sam qae: byid qe: joe" sho' qobo dae byid: nae" malhai" pye' yaug ngad: ga: nao dao:so: to" au: ta" rure kad' wa,- ngo akyu" mho' ra".

¹⁸

¹⁹ASANG we"- ana" qi" qhang: ra" ai: nho: matha" malhai" ra" jhid'de; myid cao" yang: Egutu mung" mae" yao: bam thug' lo: ra" ayo, mae" yao: bam: qobo re khyad' byid' lo: ru we' dakhyo:- ce: amyu" byu qe: qobo re khyad' byid: nae" qhid' mae" ngo akyu" mho' ra"- ga: ta" ra".

²⁰ASANG wa- nao mho' ru we' dakhyo: yao: bam re ngo qobo khyad' byid: nae".

²¹Ngadqere: ngo daui: na: ru we' dakhyo: myid gaung dao mae ngo byang" jo; ru we' dakhyo:-

²²Ce: amyu" byu qemae" dayaug re: ai: mung" khyo qo" vao ye: genae" mangad: ein: ngo dao:so: to" ra". Yao: bam wa nga" qhid' kheim: mae" bao qhui: ra" bo" bao rere: Egutu mae we' din"pyad' yo mae kad' qhu" ra" mug' pho: ve, lho jham rere: the' myao: avako". Ngadqere: yao: bam wa nga" nhag' lam: qhang zang: kham: rure paug' yang: yang: jham" qu" mung:- nga" mho dao: re matae" gyo: ko" ngad: ra".

²³Yao: bam wa ngoyang yao: bam: phug' pho" qere dao:so: byid' to" ra" mung" khyo khonhae" re: maqo" vao ye: genae". Ngo re ngag: ha: pye' ra" mo, mae" dayaug re: ai: khyo maqo" vao ye: genae".

²⁴Ngadqere: nga" daui daui yaug Khaleb wa yao" myid ave, gatau we' shai" ru we' ngore xo' yang: jhaug' zaug: na: jo; ruyang yao: yejo" qu" ra" mung" khyo yao: re ngo jhui" vao ye: nae". Amung: yao" myid:zo: qe wa- ana" Khanan byu qe we' Amaleg byuqe na: jo, ko" ra" lao: khaung: mug: re sang: li" genae". Ne, kao dam: tug' mung:- Tham: Ne khyo ye" lo" ra" din"pyad' yo khyo ye" lo" ge,- ga: ta" ra".

²⁵

²⁶ASANG wa Moshe we' Arun tao re-

²⁷Ce: makhyang" ra" amyu" byu qe wa khomyhao" joe" sho' ngore qobo vhin nyhung: na genae" laug i? Ce: nyhung thoe re ngo gyo" nghang: va".

²⁸Ana"- yao: bam re ce: dao: phyid phyid wa,- ngo daui: na: ru we' dakhyo:- ngo wa naonhaung" mho' vako" ru we' dakhyo: naonhaung" re kad' nae" ein: jham tang" ra". Ngo ASANG ta" to: va".

²⁹Naonhaung" shid: li" genae" naonhaung" mao gaung jham wa ce: din"pyad' yo mae sin" jo; li" nae". Naonhaung" ngore qobo vhin nyhung ko" ruyang naonhaung" mae" shid' xe zin je: ra" mo, dayaug re: ai: mung" khyo maqo" vao ye: genae".

³⁰Ngo wa naonhaung" re ai: mae yena nhao nae" dao:so: byid' to" ra". Ngadqere: Khaleb we' Yoshu mae" lai yang: naonhaung" khag' re: maqo" yena genae".

³¹Naonhaung" yao: zo: qe taung" yu qhug' li" genae" ga: naonhaung" ta" ako". Ngadqere: naonhaung" ha: pye' ra" mung" khyo yao: bam re ngo jhui" ye: nae". Ai: mung" wa yao: bam: yham ngad: li" nae".

³²Naonhaung" wa ce: din"pyad' yo cetau mae shid: li" genae".

³³Naonhaung" nho: zoshao qe wa naonhaung" mae" na: thao" yaug shid sho'- naonhaung" jhaug' mazaug: ru qhid' mae" qug: khai: kham zo: mung: ce: din"pyad' yo mae byid xe zin du" lae" lhau: li" genae".

³⁴Naonhaung" wa naonhaung" qobo aphug' qhid' mae" ai: mung" re naonhaung" yejo" qu" ko" ra" byid xe ba: qhid' mae" daba re dazin khyo"- byid xe zin qug: khai: kham zo" li" genae". Ngo naonhaung" re gye kad' nae" ngad: ra" au: mae" lajheim: re naonhaung" ba: li" genae".

³⁵Daga" zang" ham yang: ngore gye kad' ko" ra" mo, ngad ko" ra" ce: makhyang" ra" amyu" byu qe naonhaung" re ngo ceru: kad' nae" ein: jham tang" ra". Naonhaung" mae" yaug khao: ngo" ce: din"pyad' yo mae shid: li" genae" ngo- ASANG ta" va"- ga: ta" ra" ein: ta" wa,- ga: ta" ra".

³⁶Ai: mung" re yejo" qu" genae" qhid' mae" Moshe yang nhao: ke' ra" mo, wa amyu" byu qe ASANG re qobo vhin nyhung nae" boe" nhao: ra" majo: ra" mhug' pyag' ra" lau thoe re vin: lo: ako". Aimung: ASANG wa yao: bam re no boe" nhao mung: shid: lo" ako".

³⁷

³⁸Jin" byu daxe: shid' yaug mae" Yoshu we' Khaleb shid' yaug za: mashid na: dang: ako".

³⁹ASANG ta" ra" dao: Israel byu qere Moshe ta" kyo: lao"- yao: bam wa alo kho: sho' kaug' ngug: ako".

⁴⁰Bam mug: khaung: khyo jhin" vao ye: nae" qhid' mae" yao: bam thao: ba ne, seim no' mae" to" mung:- ASANG: yang ngonhaung" re ta" kyo" to" ra" jo, qo khyo ye: nae" qhid' mae" ana"- ngonhaung" jin" jin" ngad va". Ngonhaung" qobo shad' va" rure ngonhaung" lhang: yu va" ga: ta" zo" re" to" ye" lo" ako".

⁴¹Ngadqere: Moshe wa- airu: ngad: re- ana" naonhaung" pe"mung: ASANG re mho dao: magyo: ko" i? Naonhaung" aung doe, genae" mangad:.

⁴²Daye: ge,- ASANG wa naonhaung" we' daga" mangad: ngad: ra". Amung: naonhaung" gyevo qe wa naonhaung" re aung: pye' li" genae".

⁴³Amaleg byu qe we' Khanan byu qe we' naonhaung" jho" thaung" qhug' gelao"- gyekhe' poe mae naonhaung" shid: li" genae". ASANG wa naonhaung" we' daga" mangad: nae". Pe"mung:ga"re naonhaung" wa yao" mho dao: re phug' cao" nae" ha: pye' ako"- ga: ta" ra".

⁴⁴ASANG: Dao: Thang" Ban" we' Moshe ai: jamu mae" mato" gesho' ngadqere: yao: bam wa- ai: bam mug: khaung: khyo do, ye: nae" vae" ashiko".

⁴⁵Ai: thao ai: mug: mae na ko" ra" Amaleg byu qe we' Khanan byu qe wa yao: bam re gyelham: zin: mung: aung: pye' ako". Horma joe" sho' yao: bam re cao" khe' li" ako".