Read Maru GYAUNG: SU: 15 Bible Online

GYAUNG: SU: 15 - Maru bible

GYAUNG: SU: 15

¹ASANG wa Moshe re-

²Israel byu qere yao: byid: nae" ngad: ra" mung" mae yephug' cao" na genae" qhid' mae" o mae" thung" tarha" jham Israel byu qe: qhid' mae" byid' ra".

³ASANG re phad' ngaui" byid' ra" ngaui" xeim: khyo" re:- thao: ce' zaui" pyang" ra" xeim: khyo" re:- myid: bug: yang: byid' ra" xeim: khyo" re: man: man: kad' ra" naonhaung" caung:pa" thung" poe mae qhaug' byid' ra" xeim: khyo" re:- nung: jaung lo:- yao lo:- yao mangad: lao" cad' be, jham re gai: qhaug' byid' ra". Ce: zo:ve ngaui" xeim: jham: meim sheim wa ASANG re ngaui nhao nae" ngad: ra".

⁴ASANG re phad' ngaui" byid' ra" xeim: khyo" yao mangad: lao"- cad' be, re qhaug' byid' ra" yaug khag' ngadqere: cin ngaui" xeim: khyo" gug'nyhug' dau: khao: ngo" we' daga" zhanlun xau dajoe: we' lhag' to" ra" cin man" phaui: shid' kaug'- sabyi qang: shid' soe: daphag' ciye: nae" ngad: ra".

⁶Yao lo: re qhaug' byid: lao" cin ngaui" xeim: khyo" zhanlun xau dajoe: je we' lhag' to" ra" cin man" phaui: byid kaug'- sabyi qang: sam soe: we' daga" ciye: nae" ngad: ra". Ce: ngaui" xeim: jham: nho: meim sheim wa ASANG re ngaui nhao nae" ngad: ra".

⁸Nung: jaung lo: re phad' ngaui" byid' ra" xeim: khyo" re:- thao: ce' zaui" pyang" ra" ngaui" xeim: khyo" re:- zam" khug: ra" xeim: khyo" re:- ASANG re qhaug' byid: lao"-

⁹Cin ngaui" xeim: kad' nae" zhanlun xau shid' joe: we' lhag' to" ra" cin man" phaui: khyaug' kaug' we' daga"-

¹⁰sabyi qang: ngo" soe: re qhaug' byid: nae" ngad: ra". Ce: ngaui" xeim" nho: meim sheim wa ASANG re ngaui nhao nae" ngad: ra".

¹¹Ceru wa nung: jaung lo:- yao lo:- yao- cad' be, dau: khao: ngo" we' daga" qhaug' byid: nae" ru ngad: ra".

¹²Gug'nyhug' dadau: tho' je yang: qhaug' byid: nae" ngad lao"- boqhaug' ra" xeim: jham re dau dau vang" vang" khyo" to: yang: ke' nae" ngad: ra".

¹³Israel mung" byu yaug khao: ngo" wa zo:ve xeim: re yao: qhaug' byid' lao"- ceru: kad' nae" ngad: ra". Ai: meim sheim wa ASANG re ngaui nhao nae" ngad: ra".

¹⁴Amung: naonhaung" phaung mae na: ra" taung bug byu- dazab daso' na yaug ngad: re ngad- gyag maqui: na: jo, yaug ngad: re ngad- ASANG ngaui: ra" meim sheim zo:ve xeim: re qhaug' byid: yang: ngad: re yao: wa ai: thung" tarha" jham re yao: phug' cao" nae" ngad: ra".

¹⁵Joe" lo nae" ayo, alhab' mae ai: thung" tarha" jham wa naonhaung" dao mae we' naonhaung" phaung mae na: ra" taung bug byu qe: dao mae dakhyo: za: ngad: jo, nae" ngad: ra". Naonhaung" we' yao: bam wa ASANG qhid' kheim: mae dakhyo: za: ngad: ra".

¹⁶Tarha" jham we' thung" li jham wa naonhaung" dao mae we' yao: bam: dao mae dakhyo: za: ngad nae" ngad: ra".

¹⁷ASANG wa Moshe re-

¹⁸Israel byu qere yao: byid: nae" ngad: ra" mung" mae yephug' cao" na genae" qhid' mae" o mae" thung" tarha" jham Israel byu qe: qhid' mae" byid' ra".

¹⁹Aimung" mae" thug' ra" zo:ve re naonhaung" zo: gelao" ai: mae" daqhae: re ASANG re byid' ra" gakai: lai alu: jhaung qhu" khyo" gatau kho' to: nae" ngad: ra".

²⁰Naonhaung" mug kad' gelao"- gaug sag' yang kad' ra" sao qhid' mae" mug khai" re- gakai: lai alu: jhaung qhu" khyo" ASANG re qhaug' byid: nae" ngad: ako". Ceru re- naonhaung" nao" yu: ra" gaug mae" gakai: lai alu: jhaung qhu" khyo"- qhaug' byid' ru we' dakhyo: yao: qhaug' byid: nae" ngad: ra".

²¹Joe" lo nae" ayo, alhab' geim" mae naonhaung" kad' ra" mug mae" ce: gakai: lai jhaung qhu" ASANG re byid: genae" ngad: ra".

²²Ngadqere: dayaug yaug wa ASANG: yang Moshe re byid' to" ra" ai: thung" tarha" jham re thaug mangad: lo: phug' cao" nae" zai" lhai: pye' ein gelang:-

²³Amung: joe" lo nae" ayo, mae mo,byu phung: wa Moshe khyo" ASANG: yang amyin" byid' to" ra" ja: khao: ngo" re zai" lhai: pye' ein gelang:-

²⁴Mo,byu phung" yang mabeim: maso: boe" yang: zai" shad' ngad: re- yao: bam wa gaug zo ngaui" xeim: we' sabyi qang: ngaui" xeim: we' daga" meim sheim ASANG re ngaui nhao: ra" phad' ngaui" byid' ra" ngaui" xeim: khyo" nung: jaung lo: dadau: re phad' ngaui" byid: genae" ngad: ako". Aitho' mago"- yao: bam wa qobo khyad' ngaui" xeim: khyo" cad' be, lo: dadau: rere: ngaui" byid: genae" ngad: ra".

²⁵Khinjaung pho" wa ai: mo,byu phung" qhid' mae" caung:pa" thung" we' sin" ra" kyang" san byid' ra" khyo re kad' nae" ngad: ra". Ailao" yao: bam wa qobo khyad' pye' byid' ru qhug' li" genae" pe"mung:ga"re ai: shad' nghung" ru wa thaug kad' ru mangad' ru we' yao: bam wa yao: bam: qobo ngaui" xeim: re cili" mung: zo:ve ngaui" xeim: khyo" ASANG re qhaug' byid: geyang: ngad: ako".

²⁶Yaug khao: ngo" wa ai: shad' nghung" rumae bobo vageyang:- Israel mo,byu phung: geim" we' yao: bam: phaung mae na: jo, ko" ra" taung bug qe wa qobo khyad' pye' byid' ru qhug' li" genae".

²⁷Gaung dau: nge, thaug makad' lo: qobo shad' ngad: re yao: wa qobo khyad' ngaui" xeim: khyo" dazin byang" ra" cad' be, mo" dadau: ngaui" byid: nae" ngad: ra".

²⁸Khinjaung pho" wa- byu aiyaug: nho: qobo re kyang" san: pye' byid: nae" qhid' mae" phan mae caung:pa" thung" we' sin: yang: kyang" san: pye' khyo re kad' nae" ngad: ra". Ailao" yao: wa qobo khyad' pye' byid' ru qhug' li" nae".

²⁹Israel mung"dan: byu ngad ngad- na: jo; ra" taung bug byu ngad ngad- thaug makad' lo: qobo shad' ra" mo, yaug khao: ngo" wa thung" tarha" re dakhyo: za: ci nae" ngad: ra".

³⁰Ngadqere:- yao: wa mung"dan: byu ngad ngad- taung bug byu ngad ngad- thaug kad' yang: qobo kad' ra" yaug khag' ngadqere:- ASANG re maphug' makhyad' kad' ra" qobo qo" yaug ngad: ra". Aimung: yao: wa se' pye' ru qhug' nae" ngad: ra".

³¹Pe"mung:ga"re yao: wa ASANG: dao: re ngag: pye' mung:- yao" amyin" dao: jham mae" dakheim: re thaug kad' yang: shad' lhoe" pye' va" ruyang ngad: ra". Yao: wa yao: yao: shid: ru qhid' mae" qobo yang ngad: ra".

³²Dalhang mae- Israel byu qe wa din"pyad' yo mae na: jo, shiko" au: byu dayaug Dugno: Ba mae thao: qho: na: rure the' myao: ako".

³³Yao: wa Moshe- Arun we' mo,byu phung: geim" khyo jhui" ye" ru qhug' mung:-

³⁴Zaung" qu" na: ru qhug' ra". Pe"mung:ga"re yao: re pe" ru: kad' nae" rure sho' sho' maba geyang: ngad: ako".

³⁵Ailao" ASANG wa Moshe re- aiyaug re se' pye' ca" ra". Mo,byu phung: geim" wa yao: re jamu taung gaung shad' mae laug baui: yang yepye' se' genae" ngad: ra"- ga: ta" ra".

³⁶Airumung: mo,byu phung: wa aiyaug re jamu taung gaung shad' khyo jhui" ye: mung: ASANG amyin" byid' ru we' dakhyo:- yao: re laug baui: yang pye' se' pye' ako".

³⁷ASANG wa Moshe re- Israel byu qere-

³⁸Naonhaung" bau: thao mae ban byau: kad' te' ge,- ai: ban byau: khao: ngo" re taui: anyug te' ge,- naonhaung" wa ceru re joe" lo nae" ayo, alhab' mae kad' genae" ngad: ra".

³⁹Ai: ban byau: wa ta" peim: byid' ra" zai khyo" naonhaung" re kad' li" nae". Naonhaung" ai: ban byau: jham re myao khao: ngo" nga" amyin" dao: jham re myid: beim" li" mung: phug' cao" li" genae". Airulao" naonhaung" wa ngo mae" maphaug' lo" byaug mung:- naonhaung" yao" o ngaui kao bau: ra" shad' khyo macao" ye: genae" ngad: ra".

⁴⁰Ai: ban byau: wa nga" amyin" dao: jham alhab' re phug' cao" nae" qhid' mae" naonhaung" re peim: byid' li" nae". Aimung: naonhaung" wa ngoyang bin sho' sang: ra" mo, ngad: li" genae".

⁴¹Ngo wa naonhaung" Mao"So ASANG ngad:- ngo wa naonhaung" Mao"So boe" nae" qhid' mae" naonhaung" re Egutu mung" mae" jhui" thug' lo: ru ngad: ra". Ngo wa ASANG ngad:- ga: ta" ra".