Read Maru GYAUNG: SU: 16 Bible Online

GYAUNG: SU: 16 - Maru bible

GYAUNG: SU: 16

¹Levi amyu" Kohad kaung mae" ngad: ra" Izha nho: yauggai zo: Kora wa Moshe au: jhaung kad' ra" khyo re ngag: thaug' mung: tau: lhan" ra". Yao" shad' mae mo,byu phung" yang khyin: san: to" ra" mang qi" ra" Israel au: jhaung 250 yaug- Rubin kaung mae" Eliab nho: yauggai zo: tao ngad ko" ra" Dathan we' Abiram tao- Peled nho: yauggai zo: Ona bam bobo: ako".

³Yao: bam wa Moshe we' Arun tao: qhid' kheim: mae zang" ham: na mung:- ni" shid' tao wa saung" xo: avako"- mo,byu phung: mae bobo: ra" mo, alhab' wa ASANG: yang sang: ra" mo, we' daga" ngad: ra". Airu: ngad: re Moshe we"- ni" shid' tao pe"mung: yang: ASANG: mo,byu phung: qenho: adao mae na ko" i? ga: yao: shid' tao re ta" ako".

⁴Moshe wa ce: dao: re the' gyo: lao" yao: yao" gaung re myid gaung khyo goe; gyo" mung: akyu" mho' ra".

⁵Ai: thao re yao: wa Kora we' yao" thao cao" mo, re- ASANG wa ne, mo" ba khoyaug lam: ASANG ngad: rure ngonhaung" re qhu" byid' li" nae". Yao: wa yao" yang khyin: san: to" ra" yaug ngad: ra" yao" yang sang: ra" yaug re phan mae yao: jhao" te' li" nhao: nae".

⁶Ne, mo" ba: ne, kao nao we' ni" byu qe wa myi: ug' re yu: yu mung:- myi: de; ra" myi:gyoe: ke' mung:- aijham re phan khyo cili" geri:- ailao" ngonhaung" mae" khoyaug re lam: ASANG: yang khyin: yu: to" rure ngonhaung" myao: li" nae". Naonhaung" Levi amyu" qe wa saung" yao: dae xo: ako"- ga: ta" ra".

⁷

⁸Moshe wa Kora re xo' yang:- dao: jhau: ra". Yao: wa Levi byu qe we" tae" gyo: ge,-

⁹Naonhaung" ASANG jhao" cao" te' ye: mung:- ASANG: jamu mae naonhaung" mau" re zaui: yang: mo,byu phung: re qo" caung da" byid: nae" qhid' mae" Israel nho: Mao"So wa dang: ra" mo,byu phung: qemae" naonhaung" re gatau kho' yu mung: khyin: yu: to" ra" khyo re angai athao mau" ru: naonhaung" myid: jho ko" i?

¹⁰ASANG wa nao we' gatau: Levi byu qe alhab' re ce: nga: ye; rure qo" nhao: ava". Ana" naonhaung" wa khinjaung aya: rere: qo" yu nae" seim" na genhaung i?

¹¹Naonhaung" Arun re qobo vhin nyhung gelao"- airu wa nao we' ni" byu qe gaigai: yao: ASANG re qobo vhin tau: lhan" na: ru ngad: ako"- ga: ta" ra".

¹²Ai: thao Moshe wa Dathan we' Abiram re khai nhao: ke' ra". Ngadqere: yao: shid' yaug wa- ngonhaung" mali" nae".

¹³Nao ngonhaung" re ce: din"pyad' yo mae se' pye' nae" qhid' mae" myid xau gai: ra" Egutu mung" mae" ngonhaung" re jhui" thug' lo va" ru za: maga" shi: i? Ngonhaung" dao mae re: nao zug: kad' shinae" i?

¹⁴Nao wa gaigai: yao: ngonhaung" re myid xau gai: ra" mung" khyo re:- ngonhaung" jo,nho" khyo" yo we' sabyi shi: khyae jham rere: mabyid' to: ngad: ra". Ana" nao wa ngonhaung" re mhug' pyag' zo: nae" seim" na: ra". Ngonhaung" wa mali" nae" ga: ta" ako".

¹⁵Moshe wa nhag' yo: mung: ASANG re- aibam cili" ra" xeim: jham pe" rere: dakhae: yu wa,- ngo wa yao: bam re pe" re: mashad'- ngo wa yao: bam: loze jham mae" dadau: rere: mayu byid:- ga: ta" ra".

¹⁶Aimung: Moshe wa Kora re- ne, mo" ba nao we' ni" byu 250 wa ASANG: qhid' kheim: Zaung khyo li" ca" genae" ngad: ra". Arun re: aimae na: li" nae".

¹⁷Naonhaung" yaug khao: ngo" wa yao: yao" myi: ug' re yu mung: aimae sheim nae pyo: ja: ke' yang: aire phan mae ye qhaug' byid: ge,- ga: ta" ra".

¹⁸Airumung: yauggai yaug khao: ngo" yao: yao" myi: ug' re yu: yu mung: myi: de; ra" myi:gyoe: ke' yang: ai: dao mae sheim nae pyo: ja: ke' mung: Zaung kham: dung: mae Moshe we' Arun we' daga" ye; jo; ako".

¹⁹Ai: thao Kora wa mo, byu phung: geim" re zhang" yu mung: yao: bam wa Moshe we' Arun re myo, nho qang yang: Zaung kham: dung: mae ye; jo; ako". nyag din taung" mo,byu phung: geim" mae ASANG: qhid' kheim: mae" bao qhui: ra" bo" bao bao: thug' li" mung:-

²⁰ASANG wa Moshe we' Arun tao re-

²¹Ce: byu qemae" phao: qui: ge,- ana" jao" yao: ngo yao: bam re se' pye' nae"- ga: ta" ra".

²²Ngadqere: Moshe we' Arun tao wa yao: shid' tao: myo, khung: re myid gaung khyo goe; gyo" mung: O" Mao"So we"- nao wa kao so' alhab' nho: ajhaung ngad: ra". Dayaug za: qobo shad' re- mo,byu phung: geim" re nhag' yo" i? ga: ta" ako".

²³ASANG wa Moshe re-

²⁴Mo,byu qere Kora- Dathan- Abiram bam: zaung jham mae" phao: qui: genae" qhid' mae" ta" wa,- ga: ta" ra".

²⁵Ailao" Moshe wa Israel au: jhaung qe we' daga" Dathan we' Abiram shid' yaug jhao" ye" ra".

²⁶Yao: wa mo,byu qere- ce: makhyang" ra" byu qe: Zaung mae" phao ge,- amung: yao: bam sang: ra" ja: pe" rere: datin: ge,. Airu: mangad: re- naonhaung" re: yao: bam we' daga" se' pye' ru qhug' li" genae"- ga: ta" ra".

²⁷Airumung: yao: bam wa Kora- Dathan- Abiram bam: zaung mae" phao: qui" ako". Dathan we' Abiram wa thug' li" mung: yao: bam: yham sang myhi" qe we' zoshao qe we' daga" ye; jo; ako".

²⁸Ailao" Moshe wa amyu" byu qere- ngo wa ce: mau" alhab' re zaui: nae" qhid' mae" ASANG: yang nhao: to: yaug ngad: ru we' ai: mau" jham re ngoyao" myid khyo" kad' ru mangad' rure ceru: khyo" naonhaung" ba: li" genae".

²⁹Ce: byu qe Mao"So: qobo dae byid' ru mabo lo: boe" jo; ra" akhyo khyo" shid ko" re wa- ngo wa ASANG: yang nhao: ke' yaug mangad: ngad: ra".

³⁰Ngadqere: ASANG wa gakai: lai kad' mung: myid gaung bung" li" ru we' yao: bam wa shid: ra" movo: mug: khyo adaui phe, phe, gyo" lo" genae" qhid' mae" yao: bam qo" gu: alhab' we' daga" myug: pye' yang: ngad: re- ce: byu qe wa ASANG re ngag: ha: pye' mo, ngad ko" rure naonhaung" ba: li" genae"- ga: ta" ra".

³¹Yao: dao: bin: jhau we' Dathan we' Abiram shid' yaug: khyid qao: mae" myid gaung bag: go; li" mung:-

³²Yao: shid' yaug re we' yao: shid' yaug: yham byu qe- Kora nho: thao cao" mo, we' yao: bam: jo,nho" jham alhab' re myug: pye' ra".

³³Airumung: yao: bam wa yao: bam: jo,nho" jham we' daga" adaui phe, phe, shid: ra" movo: mug: khyo gyo" lo" ako". Myid gaung wa yao: bam: dao mae dam: nghoe' lo" mung: yao: bam byaug: lo" ako".

³⁴Aitau mae na ko" ra" Israel byu qe alhab' wa ai bam: gyi: hug' thoe re the' gyo: gelao"- tao" phao: ako". Yao: bam wa- tao" phao ge, myid gaung wa ngonhaung" rere: myug: pye' maba ga: zag: hug' ako".

³⁵Ai: thao re ASANG wa myishae re nhao: ke' yang: nae pyo: ja: re qhaug' byid: ko" ra" byu 250 yaug re ngha" pye' ra".

³⁶ASANG wa Moshe re-

³⁷Ai: myi: ug' jham wa gyang" lho" ruyang myi" yang ngha" pye' qhug' ko" mo; gyid: myi: ug' jham re we' gatau mae abyi asin: boe" jo; ra" myi:gyoe: jham re yegaug: zhang: yu: pye' nae" qhid' mae" Arun nho: yauggai zo: Eleaza re ta" wa,-

³⁸Aijham wa ASANG: phan mae qhaug' byid: qhug' gelao" gyang" lho" lo: ako". Airumung: yao: bam: qobo mathao mae se' pye' qhug' ko" ra" ai: byu qenho: myi: ug' jham re yu: yu mung: po: po: mung: be; pye" pye' yang:- phan qhid' mae" anghoe' kad' ge,. Airu wa Israel byu qere ta" peim: byid' ru ngad: li" nae"- ga: ta" ra".

³⁹Airumung: khinjaung Eleaza wa ai: myi: ug' jham re yu mung: phan anghoe' kad' nae" qhid' mae" aijham re po: po: mung: be; pye" pye' nhao: ra".

⁴⁰Ceru wa Arun nho: myid:zo: qemae" mangad' ra" yaug khag' ngadqere: ASANG: qhid' mae" nae pyo: ja: phad' ngaui" nae" phan khyo mali" genae" rure Israel byu qere ta" peim: byid' ru ngad: ra". Airu: mangad: re- ASANG wa Kora we' yao" byu qere we' dakhyo: se' pye' li" nae". Ceru alhab' re ASANG: yang Moshe khyo" Eleaza re amyin" byid' ru we' dakhyo: kad' ru ngad: ra".

⁴¹Ai: thao: ba re mo,byu phung: geim" wa Moshe we' Arun tao re qobo vhin nyhung mung:- ni" shid' tao wa ASANG: byu damyo" re se' pye' avako"- ga: ta" ako".

⁴²Yao: bam Moshe we' Arun re ngag: ha nae" alhab' mo, bin: zang" ham gethao- yao: bam ai: Zaung shad' khyo phaug lo: ako". Jham thaui: wa ai: Zaung re nghoe' to: mung: ASANG: qhid' kheim: mae" bao qhui: ra" bo" bao wa thug' jo; rure yao: bam myao: ako".

⁴³Moshe we' Arun tao wa ye" lo" mung:- Zaung qhid' au: mae ye; jo; ako".

⁴⁴Ailao" ASANG wa Moshe re-

⁴⁵Ce: mo, byu qemae" phao: qhui: ge,- yao: bam re ana" yao: se' pye' nae"- ga: ta" ra". Yao: shid' yaug geim" myo, nho myid gaung khyo goe; gyo" mung:-

⁴⁶Moshe wa Arun re- ni" myi: ug' re yu: mung: phan dao mae" myi:gyoe: yu ke' yang: ai: myi gyoe: dao mae nae pyo: ja: ke' wa,- aimung: airu we' amyu" byu qejhao" phyad phyad ye: mung: yao: bam: qhid' mae" caung:pa" thung" khyo" kyang" san: pye' ru yekad' wa,- phyad wa,- ASANG: nhag' jam: yo" ru wa baug: go; li" mung:- qam" no wa boe" ava"- ga: ta" ra".

⁴⁷Arun wa mho dao: gyo: mung: yao" myi: ug' re ci yang: mo, phaung gaung: khyo tao" vao ye" ra". Qam" no boe" jo, va" rure yao: myao lao" yao: wa myi: ug' mae" myi:gyoe: dao mae sheim nae pyo: ja: ke' mung: ai: mo,byu qe:qhid' mae" caung:pa" thung" khyo" kyang" san: pye' ru kad' ra".

⁴⁸Ceru wa qam" no re tam" pye' ra". Amung: yao: wa shid: ra" mo, we' daui: ra" mo; agyo: mae ye; jo; ra".

⁴⁹Kora nho: tau: lhan" rumae shid: ra" mo, re mabo: nghe' lo: shid: lo" ra" mo, wa 14700 yaug ngad: ako".

⁵⁰Ai: qam" gyo" ru wa baui" lo" byaug lao" Arun wa Zaung kham: dung: khyo Moshe jhao" dam: tug' lo: ra".