Read Maru GYAUNG: SU: 17 Bible Online

GYAUNG: SU: 17 - Maru bible

GYAUNG: SU: 17

¹ASANG wa Moshe re-

²Amyu" khao: ngo" nho: au: jhaung dayaug mae" dalam: lam: zaung: bao" daxe: shid' lam: nao re byid: genae" qhid' mae" Israel byu qere ta" wa,- ga: ta" ra".

³Ai: zaung: bao" mae yaug khao: ngo" nho: mang re tung" te' mung:- Levi amyu" qenho: gaung tha" zaung: bao" lam: mae wa Arun nho: mang tung" te' wa,-

⁴Amung: aijham re nga" qhid' kheim: Zaung khyo ciye: mung:- nao re ngo qhug' ra" jo, qo Dao: Thang" Ban" qhid' au: mae yeto: wa,-

⁵Ailao" ngo khyin: san: to" ra" yaug: nho: zaung: bao" wa anyaug thug' li" li" nae"- cekhyo" ce: Israel byu qe ni" shid' yaug re xo' yang: qobo zhaug' nyhung ko" rure ngo tam" pye' nae"- ga: ta" ra".

⁶Airumung: Moshe wa Israel byu qere dao: jhau mung: yao: bam: au: jhaung qe wa amyu" kaung khao: ngo" mae" zaung: bao" dakaung qhid' mae" dalam: lam: alhab' re daxe: shid' lam: yao: re byid' ako". Arun nho: zaung: bao" re: aijham we' daga" to" ako".

⁷Ailao" Moshe wa ai: zaung: bao" alhab' re ASANG: Dao: Thang" Ban" qhid' au: mae yeto" ra".

⁸Thao: ba- Moshe wa Zaung khug khyo vao ye" re- Levi amyu" qenho: gaung tha" byid' to" ra" Arun nho: zaung: bao" wa anyaug tad' jo; rure yao: myao: ra". Ai: zaung: bao" wa abam: bam: mung: abu" bu" jo, yang: batan shi: amhang" zaui" jo; ra".

⁹Moshe wa zaung: bao" alhab' re yu mung:- Israel byu qere qhu" byid' ra". Yao: bam aire myao gelao"- au: jhaung yaug khao: ngo" wa yao: yao" zaung: bao" re dam: tug' yu: ako".

¹⁰ASANG wa Moshe re- Arun nho: zaung: bao" re Dao: Thang" Ban qhid' au: mae yedam: to: wa,- airu wa tau: lhan" ra" Israel byu qere yao: bam: nyhung: ra" khyo mathang: pye' re wa shid: li" genae" ga" rure ta" peim: byid' ra" khyo" zam" to: nae" ngad: ra"- ga: ta" ra".

¹¹Moshe wa ASANG amyin" byid' ru we' dakhyo: kad' ra".

¹²Israel byu qe wa Moshe re- ngonhaung" shid: gan: lo" na va"- khag' ngadqere:- ai: Zaung khyo te' ye: yang: ngad: re- shid ca" ra". Airulao" ngonhaung" alhab' mo, shid: bam zai laug: i? ga: ta" ako".