Read Maru GYAUNG: SU: 18 Bible Online

GYAUNG: SU: 18 - Maru bible

GYAUNG: SU: 18

¹ASANG wa Levi amyu" qe wa nga" qhid' kheim: Zaung mae caung da" byid' ra" mau" we' xo' ra" qobo aphug' re kham zo: ca" ako". Ngadqere: khinjaung mau" caung da" byid' ra" qobo aphug' jham re wa nao we' ni" yauggai zo: qe za: kham zo: ca" ako".

²Nao we' ni" yauggai zo: qe ai: Zaung mae caung da" byid' na: ko" ra" ayo, gyo: mae naopha: ho' re bao" thaug' byid: nae" we' naopha: ho' we' mau" daga" zaui: nae" qhid' mae" Levi amyu" mae" ngad: ra" ni" amyu" ba nam qere jhui: wa,-

³Yao: bam wa nao re bao" thaug' ra" yao: bam: mau" re zaui" pyang" nae" we' Zaung qhid' mae" vin vo; qo: ra" qo re zaui: genae" ngad: ra". Ngadqere: yao: bam wa ai: Gyang" Lho" Jo, Qo mae jo; ra" gyang" lho" ra" zai jham pe" rere:- phan rere: magai: tin: ngad: ako". Yao: bam tin: gelao" yao: bam we' naopha: ho' alhab' se' pye' ru qhug' li" genae".

⁴Yao: bam wa nao we' daga" mau" zaui: genae" we' ai: Zaung mae kad' ra" caung da" byid' ra" mau" alhab' qhid' mae" yao: bam: qo re zaui: so: genae" ngad: ako". Ngadqere: azhao" mamyhi: ra" yaug khag' re: naopha: ho' we' daga" mau" magai: zaui: ngad: ra".

⁵Nao we' ni" yauggai zo: qe za: phan we' Gyang" Lho" Jo, Qo qhid' mae" vin vo; ra" mau" jham re zaui: ca" ako". Airulao" nga" nhag' yo" ru wa Israel byu qe: dao mae madam: thug' li" nae" ngad: ra".

⁶Ngo wa ni" amyu" ba nam Levi amyu" qere Israel byumyu" phaung mae" jhaung qhu" khyo" nao re khyin: yu byid' ra" yaug ngad: ra". Yao: bam ai: Zaung mae vin vo; ca" ra" yao: bam: mau" re qo" zaui: genae" qhid' mae" yao: bam wa ngore qhaug' byid' to: qhug' mo, ngad: ako".

⁷Ngadqere: nao we' ni" yauggai zo: qe za: phan we' gyang" lho" thao" jo, qo we' sin" ra" khinjaung mau" alhab' re zaui: genae" ngad: ra". Ce: mau" jham wa naonhaung" vin vo; nae" qo ngad: ra" pe"mung:ga"re ngo wa naonhaung" re khinjaung aya: jhaung qhu" byid' to: va". Ai: gyang" lho" ra" zai jham khyo te' li" ra" azhao" mamyhi: ra" yaug khag' ngadqere: se' pye' ru qhug' nae" ngad: ra"- ga: ta" ra".

⁸ASANG wa Arun re- ngaui" xeim: khyo" maphad' ngaui" lo: ngore qhaug' byid' ra" gakai: lai alu: jhaung qhu" alhab' ngo naonhaung" re byid' to" rure myid: beim: wa,- apyad ato naonhaung" re byid' ra" gae bam khyo" aijham re nao we' ni" myid:zo: qere ngo byid' ra".

⁹Gyang" lho" thao" ra" ngaui" xeim: jham mae" phan dao mae maphad' ngaui" ra" xeim: jham ngad: ra" o mae" xeim: jham re: naonhaung" qhid' mae" ngad: ra". Aijham wa- cin ngaui" xeim: jham- qobo khyad' ngaui" xeim: jham- dam: khyug' byid' ra" ngaui" xeim: jham ngad: ra". Gyang" lho" xeim: khyo" ngore qhaug' byid' ra" xeim: ja: khao: ngo" wa nao we' ni" yauggai zo: qe: qhid' mae" ngad: ra".

¹⁰Naonhaung" wa cejham re gyang" lho" jo, qo mae zo: ca" ako". Aijham re yauggai qe za: zo: ge,- aijham re gyang" lho" ra" ja: khyo" myid: jho ge,.

¹¹Ai: tho' mago" Israel byu qe ngore qhaug' byid: ko" ra" gatau gakai: lai byid' ra" alu: jhaung qhu" pe" ja: re: naonhaung" qhid' mae" ngad: li" nae". Joe" lo nae" ayo, alhab' mae aijham re nao we' ni yauggai- myiqe: zo: qere ngo byid' ra". caung:pa" thung" khyo" san sin" ra" ni" yham byu yaug khao: ngo" wa aijham re gai: zo" ra".

¹²Israel byu qe ngore zin khao: ngo" byid: ko" ra" sao qhid' mhang" ra" gai: thao" ra" zhanlun xau- sabyi qang:- gaug zo alhab' ngo naonhaung" re byid' ra".

¹³Aigu: alhab' wa ni" qhid' mae" ngad: ra" caung:pa" thung" khyo" san sin" ra" ni" nho: yham byu yaug khao: ngo" aire gai: zo" ra".

¹⁴Israel byu qe athao malao: lo: ngore qhaug' byid: ko" ra" ja: khao: ngo" ni" qhid' mae" ngad: ra".

¹⁵Israel byu qeyang ngore qhaug' byid: ko" ra" zoqhid' we' sao qhid' xao" ra" gug'nyhug' re: ni" qhid' mae" ngad: ra". Ngadqere: zoqhid' yaug khao: ngo" re dam: tug' vai: yu: ra" aphug' re nao khae: yu ca" ra". Amung: caung:pa" thung" khyo" masan masin" ra" sao qhid' xao" ra" gug'nyhug' dau: khao: ngo" re dam: tug' vai: yu: ra" aphug' rere: khae: yu ca" ra".

¹⁶Zoshao re wa tarha" vao: ra" azhao" re cao" yang: gau jho mhai" to" ra" ngaui thang: the: ngo" kye' yang apyad lho" dakhye' mae dam: tug' vai: yu nae" ngad: ra".

¹⁷Ngadqere: sao qhid' xao" ra" nung: jham- yao jham- cad' be, jham re wa magai: tug' vai: yu ngad: ra". Aijham wa bin sho' nga" qhid' mae" ngad mung: ngaui" xeim: ngaui" byid: nae" ru ngad: ra". Ai: gug'nyhug' jham: sa: re phan mae pyi" sheim: mung: xau jham re zo:ve ngaui" xeim: khyo" phad' ngaui" ge,- ai: meim sheim wa ngore ngaui nhao: ra".

¹⁸Aijham mae" qao mhaung" we' gakai: lai ngaui" xeim: mae" lo, yo paung sin ru" ra" sho: wa ni" qhid' mae" ngad: ra".

¹⁹Israel byu qeyang ngore qhaug' byid: ko" ra" gakai: lai alu: jhaung qhu" alhab' re nao we' ni" yauggai- myiqe: zo: qere joe" lo nae" ayo, alhab' mae ngo byid' ra". Ceru wa nao we' ni" myid:zo: qe we' ngo to" ra" magai: byo; qeim: ra" dao: thang" ngad: ra"- ga: ta" ra".

²⁰ASANG wa Arun re maqo" sang: yu nae" ra" jo,nho" pe" re: nao maqhug' khae: yu nae". Amung: Israel mung" mae" khojo, qo rere: nao re makho' byid: nae". Ngo ASANG wa nao qo ca" gu: alhab' ngad: ra".

²¹ASANG wa Israel byu qe ngore qhaug' byid: ko" ra" daxe bam mae" dabam alhab' wa Levi amyu" qere ngo byid' to: va". Ceru wa nga" qhid' kheim: Zaung mae gun caung byid' ra" yao: bam: caung da" mau" qhid' mae" aphug' jhaung qhu" ngad: ra".

²²Israel byu gatau qe wa ai: Zaung khyo magai: te' ye: lo: genae". Airu: te' ye" re yao" shid khyo yao: qho: ru ngad: ra".

²³Ana" mae" thoegu: Levi amyu" qe za: ai: Zaung re gun caung: ra" mau" kad' mung: ai: qhid' mae" qo re jab sho' vin vo; li" genae". Ceru wa ni" myid:zo: qere phug' cao" genae" ra" thung" tarha" ngad: ra". Levi byu qe wa Israel mung" mae gyag maqui" ra" jo,nho" qo" yu genae" mangad:-

²⁴Pe"mung:ga"re Israel byu qe gakai: lai alu: jhaung qhu" khyo" ngore qhaug' byid: ko" ra" daxe bam mae" dabam re yao: bam: ma jo,nho" khyo" yao: bam re ngo byid' to: va". Ai: ruyang yao: bam Israel mung" mae gyag maqui" ra" jo,nho" maqo" genae" ein: yao: bam re ngo ta" ru ngad:- ga: ta" ra".

²⁵ASANG wa Moshe re- Levi amyu" qere naonhaung" jo,nho" Israel byu qemae" daxe bam mae" dabam re qo" khae: yu gelao"- ASANG re byid' ra" gakai: lai alu: jhaung qhu" khyo" daxe bam mae" dabam re naonhaung" qhaug' byid: ca" ako".

²⁶Ce: gakai: lai alu: jhaung qhu" re- yo kad' zo: yaug- gaug sag' we' sabyi qang: asag' re qhaug' byid' ra" ngaui" xeim: we' dau: ra" khyo" myid: jho: yu byid' ru qhug' li" nae".

²⁸Ceru: Israel byu qemae" naonhaung" qo" khae: yu ko" ra" daxe bam mae" dabam alhab' mae" naonhaung" qhaug' byid: genae" ngad: ra" gakai: lai alu: jhaung qhu" re: ASANG: qhid' mae" ngad: ra". ASANG: qhid' mae" naonhaung" byid' ra" ce: gakai: lai alu: jhaung qhu" re khinjaung Arun re naonhaung" byid: nae" ngad: ako".

²⁹Naonhaung" qo" khae: yu: ra" gu: mae" gai: thao" rure byid: ge,.

³⁰Yo kad' zo: yaug yao" ngaui" xeim: re bin: kad' thao dang: ra" gu: re zam" to" ru we' dakhyo: gai: thao" ra" dau re naonhaung" bin: qhaug' byid: gethao re dang: ra" gu: re naonhaung" gai: zam" to" ako".

³¹Dang: ra" gu: re wa khai: mae ngad ngad nao we' ni" yham byu qe gai: zo" ako". Pe"mung:ga"re airu wa Zaung mae naonhaung" vin vo; caung da" byid' ru qhid' mae" aphug' ngad: ra".

³²Aimae" gai: thao" ru ASANG re naonhaung" qhaug' byid' na: ra" ayo, gu: mae aire zo: geyang: qobo qo" mo, maboe" genae". Ngadqere: gai: thao" ra" dau gu: re maqhaug' byid: shire- ai: jhaung qhu" jham mae" daja: ja: re zo" ra" khyo" yang Israel byu qenho: gyang" lho" ra" jhaung qhu" jham re maca' majhad' makad' nae" qhid' mae" lha" ge,. Naonhaung" airu: kad' gelao"- naonhaung" wa se' pye' ru qhug' li" genae" ein: ta" kyo: wa,- ga: amyin" byid' ra".