Read Maru GYAUNG: SU: 19 Bible Online

GYAUNG: SU: 19 - Maru bible

GYAUNG: SU: 19

¹ASANG wa Moshe we' Arun tao re- o mae tung" to" ra" thung" tarha" jham Israel byu qere byid: genae" qhid' mae" amyin" byid' ra". Aiwa- pe" qo mabo: ru we' khonhae" re: mau" mazaui" qu" ra" nung: jaung mo" ane dadau: re Moshe we' Arun tao jhao" she: li" ge,.

³Yao: shid' tao wa aire khinjaung pho" Eleaza re byid' li" genae". Aire jamu taung gaung shad' khyo she: thug' ye: mung: yao" qhid' kheim: mae se' nae" ngad: ra".

⁴Ailao" Eleaza wa aimae" sa: daqhae: re yu mung: yao" lo, nyhug' yang Zaung shad' khyo nhad' lhang pyi" sheim: nae" ngad: ra".

⁵Shoqid- sho:- sa: we' au jham bobo mung: dau: geim" re khinjaung pho" qhid' kheim: mae ngha" pye' nae" ngad: ra".

⁶Ailao" yao: wa qhoje; thao:- husub akaung- taui: ane jham re myi:khyeim" khyo pye' zaui: pye' nae" ngad: ra".

⁷Ai: thao re yao: wa yao" mai bau: jham re zab mung: yao: yao" gaung re qid vhe' sheim: nae" ngad: ra". Ai: thao yao: wa jamu khyo vao ye: nae" ngad: ra". Ngadqere: yao: wa myi" thao joe" sho' caung:pa" thung" khyo" masan masin" ru boe" jo; ra".

⁸Ai: nung: jaung mo" re ngha" ra" yaug re: yao" mai bau: re zab: pye' mung: yao" gaung mae qid vhe' sheim" yu nae" ngad: ra". Ngadqere: yao: re: myi" thao joe" sho' masan masin" ru boe" jo; ra".

⁹Ailao" caung:pa" thung" khyo" san sin" yaug wa ai: nung: jaung mo" nho: myimhab jham re sham" zhang: yu mung:- caung:pa" thung" khyo" san sin" ra" jo, qo jamu taung gaung shad' mae aijham re yeto: nae" ngad: ra". Ai mae caung:pa" thung" khyo" masan masin" ru jham re yu: pye' nae" qhid' mae" qid re phaung: yu: rumae ci nae" qhid' nae" Israel byu qe: qhid' mae" aijham re zam" to: nae" ngad: ra". Ce: caung:pa" thung" we' sin" ra" mau" wa qobo re yu: pye' ra" mau" ngad: ra".

¹⁰Myimhab re sham" zhang: yu: ra" yaug wa yao" mai bau: jham re zab: pye' ca" ra". Ngadqere: yao: wa myi" thao joe" sho' masan masin" boe" jo; ra". Ce: thung" tarha" wa- Israel byu qe we' yao: bam: phaung mae na ko" ra" taung bug byu qe: qhid' mae" joe" lo nae" ayo, alhab' mae tarha" vao: ra" thung" tarha" ngad: ra".

¹¹Shid mao re the' tin" ra" yaug khag' ngadqere: caung:pa" thung" khyo" nhad' ba masan masin" ru boe" jo; ra".

¹²Yao: wa yao: yao" gaung re kyang" san: pye' ru qhid' mae" sam ba ein: ba mae we' nhad' ba ein: ba mae kyang" san: ru kad' ca" ra". Airulao" yao: wa gyang" san: li" nae". Ngadqere: yao: wa ai: sam ba: ba we' nhad' ba: ba mae yao: yao" gaung re kyang" san: ru makad' re wa yao: wa magyang" san nae".

¹³Shid mao re the' tin: mung: yao: yao" gaung re kyang" san: pye' ru makad' ra" yaug wa magyang" san: ru boe" jo; ra". Pe"mung:ga"re kyang" san: pye' ru qhid' mae" yao" dao mae qid mapyi" sheim: byid: shiyang: ngad: ra". Yao: wa ASANG: Zaung re masan masin" boe" nhao mung: yao: wa Mao"So: amyu" byu dayaug ru: myid: jho: yu: ru maqhug' lo nae".

¹⁴Zaung khug mae byu shid: ra" mau" mae shid: ra" au: re na: ra" yaug khag' ngadqere: mangad: lao" ai: khug khyo vao ye" ra" yaug khag' ngadqere: nhad' ba masan masin" boe" jo; ra".

¹⁵Apyid' made; ra" qid kang: we' ug' khye' khao: ngo" re: masan masin" boe" ra".

¹⁶Su: yang se' ru qhug' ra" yaug re mangad: lao"- taung gaung mae yao: za: shid: ra" yaug re dayaug yaug the' tin: yang: ngad: re byu: shoqug: re mangad: lao"- lab re dayaug yaug the' tin: yang: ngad: re yao: wa nhad' ba masan masin" boe" ra".

¹⁷Ai: masan masin" rure yu: pye' nae" qhid' mae" qobo yu: pye' nae" phad' ngaui" byid' ra" nung: jaung mo" ane: nho: myimhab daqhae: re yu mung:- ug' dalam: mae ke' yang: aimae qid gyang: ke' nae" ngad: ra".

¹⁸Sao qhid' mae" mau" re- caung:pa" thung" khyo" san sin" ra" dayaug yaug Husub kyao dakyao re yu mung: aire qid khug mae deim" jam: yu yang:- Zaung re we' aimae jo; ra" ja: khao: ngo" re we' aimae na: ra" byu qere- pyi" sheim: nae" ngad: ra". Mau" shid' lam: ein: lam: re- caung:pa" thung" khyo" san sin" ra" byu dayaug yaug wa byu: shoqug: re mangad: lao"- shid mao re mangad: lao"- lab re the' tin" ra" yaug: dao mae qid pyi" sheim: nae" ngad: ra".

¹⁹Sam ba ein: ba mae we' nhad' ba ein: ba mae caung:pa" thung" khyo" san sin" ra" yaug wa ai: masan masin" ra" yaug: dao mae qid pyi" sheim: nae" ngad: ra". Nhad' ba ein: ba mae yao" mai bau: jham re zab: pye' mung: yao: yao" gaung mae qid vhe' sheim" yu: ra" yaug re- ai: san sin" yaug wa- byu aiyaug re kyang" san: pye' ru kad' byid: mung:- byu aiyaug wa ba vao yo, re caung:pa" thung" khyo" san sin" yaug boe" lo nae" ngad: ra".

²⁰caung:pa" thung" khyo" masan masin" boe" lo mung: yao: yao" gaung re kyang" san: pye' ru makad' ra" yaug wa masan masin" boe" jo; ra". Pe"mung:ga"re- yao" dao mae kyang" san: pye' ru qhid' mae" qid mapyi" sheim: shiyang: ngad: ra". Yao: wa ASANG: Zaung re masan masin" boe" nhao mung: yao: re ASANG: byumyu" mae" dayaug khyo" mamyid: jho: yu lo nae" ngad: ra".

²¹Naonhaung" wa ce: thung" tarha" re joe" lo nae" ayo, alhab' mae phug' cao" genae" ngad: ra". Kyang" san: pye' ru qhid' mae" qid pyi" sheim" ra" yaug re: yao" mai bau: jham re zab: pye' ca" ra". Ai: qid re the' tin" ra" yaug khag' ngadqere: myi" thao joe" sho' caung:pa" thung" khyo" masan masin" boe" jo; ra".

²²Masan masin" yaug: yang tin" ra" ja: pe" ngadqere: masan masin" ngad: ra". Aire tin" ra" gatau dayaug yaug wa myi" thao joe" sho' masan masin" boe" jo; ra"- ga: ta" ra".