Read Maru GYAUNG: SU: 21 Bible Online

GYAUNG: SU: 21 - Maru bible

GYAUNG: SU: 21

¹Israel byu qe Atharim khyo" li" na ko" ra" ga" rure Khanan mung" mug: thao mae" Arad kho:kham the' gyo: lao" yao: wa aibam re gye yezin: mung: yao: bam mae" damyo" re taung" yu: pye' ra".

²Ailao" Israel byu qe wa ASANG re- jham tang: yang: ce: byumyu" re ngonhaung" re aung nhao: ngad: re ngonhaung" wa yao: bam re we' yao: bam: vomo" jham re athao malao: losho' nao re qhaug' byid: nae"- amung: ngonhaung" wa yao: bam re se' tam" pye' nae" ngad: ra"- ga: ta" ako".

³ASANG wa yao: bam: dao: re tae" gyo: byid: mung: Khanan byu qere aung: yu nhao: ra". Airumung: Israel byu qe wa yao: bam re we' yao: bam: vomo" jham re bin sho' phyo' qheim" pye' ako". Ai: jo, qo re Horma ga: mhang" ako".

⁴Israel byu qe wa- Edom mug: myid re jao" lhang" pye' nae" qhid' mae" Hora bam mae" to" mung: Tham: Ne khyo joe" ra" khyo khyo" ye" lo" ako". Ngadqere: amyu" byu qe wa nhag' lam: lang" gemung:-

⁵Mao"So we' Moshe re qobo vhin dao: jhau: ako". Yao: bam wa- zo:ve re: qid re: majo; ra" jo, qo- ce: din"pyad' yo mae shid nae" qhid' mae" pe"mung: Egutu mung" mae" ni" shid' yaug ngonhaung" re jhui" thug' loko" i? Ngonhaung" wa ce: ashao: nghang: zang ga" ra" zo:ve re matho' zo: lo: ga: nyhung: ako".

⁶Ailao" ASANG wa amyu" byu qe: phaung gaung: khyo daug thin: ra" lhao maui jham re nhao: ke' byid: mung: Israel byu myo: sho' re thoe" se' pye' ra".

⁷Amyu" byu qe wa Moshe jhao" li" mung: ngonhaung" wa ASANG re we' nao re qobo vhin dao: jhau yang: qobo shad' va". Ce: lhao maui jham re yu: pye' byid: nae" ASANG re ana" yao: akyu" mho' byid: la, ga: ta" ako". Amung: Moshe wa byumyu" qe: qhid' mae" akyu" mho' byid' ra".

⁸Ailao" ASANG wa lhao maui: yang thoe: qhug' mo, aire qo" tau: qu" mung: gai shao: lo" qhug' genae" qhid' mae" to' yang lhao maui lho kad' yang: zang mae te' to: nae" qhid' mae" Moshe re ta" ra".

⁹Arumung: Moshe wa gyid: lhao maui lho dalam: kad' mung: zang dazang mae te' to" ra". Lhao maui thoe: qhug' ko" ra" mo, yaug khao: ngo" ai: gyid: lhao maui lho re qo" qu" mung: gai shao: lo" ko" ra".

¹⁰Israel byu qe to" mung: Obod mae yethang: na: ako".

¹¹Ai: jo, qo mae" to" thao yao: bam wa Moba mug: kyo: ba thug' shad' mae" din"pyad' yo mae jo, ra" byo; qeim: jo, ra" Abarim jo, qo mae yethang: na: ako".

¹²Ai: thao yao: bam wa Zered lao: khaung: mae yethang: na: ako".

¹³Ai mae" yao: bam dam: to" mung: Amori mug: kyo: joe" sho' ngad: ra" din"pyad' yo mae yug: ra" Arnon gyaung: mug: am: shad' mae yethang: na: ako". (Arnon wa Moba we' Amori mug: agyo: mae" mug: kyo: ngad: ra".)

¹⁴Aimung: ASANG: gye poe mugsug' mae- Supha mug: mae" Vaheb vogaung: we' lao: khaung:- Arnon gyaung:

¹⁵Arnon vogaung: khyo we' Moba mug: kyo: shad' khyo joe" sho' lu: cae" lo" ra" lao: khaung: jao: gyu" ga: tung" to" ra".

¹⁶Yao: bam wa ai: jo, qo mae" qid thaung: jham ga: mang: ra" jo, qo ASANG: yang Moshe re- ai: byumyu" re khai: zhang" to: wa,- yao: bam re ngo shaug' qid byid: nae"- ga: ta" ra". Qid thaung: jham ga: mang: ra" jo, qo khyo joe" sho' ye" lo" ako".

¹⁷Ai: ayo, mae Israel byumyu" qe wa ceru: ga" ra" nghaui" caung" ako". Qid thaung: jham we"- naonhaung" qid re yug: thug' ke' ge,. Aimung: ngonhaung" wa aire nghaui" caung: yang: au" nae".

¹⁸Kho:kham nau" qeyang dau" to" ra" qid thaung: Israel au: jhaung qe yang dau" to" ra" qid thaung: kho:kham zaung: bao" we' yao: bam: lhae daung" yang dau" to" ra" qid thaung: ngad: ako". Yao: bam wa din"pyad' yo mae" Matana khyo qui" lo" ako".

¹⁹Aimung: ai: jo, qo mae" Nahalie khyo ye" lo" ako" Ai: Nahalie mae" Bamod khyo ye" ako".

²⁰Ai: Bamod mae" din"pyad' yo re dao mae" qu" khyo" ke' ra" Pisga bam au: o mae jo; ra" Moba byumyu" mug: myid mae jo, ra" lao: geim: khyo ye" lo" ako".

²¹Aimung: Israel byumyu" qe wa Amori kho:kham Sihon jhao" lagyo: nhao: ke' mung:

²²Ni" mug: myid khug khyo" ngonhaung" re lai nhao la, ngonhaung" we' ngonhaung" nho: nung: jham wa hau" mo" khyo mae" avai: ayae khyo maye: lo: naonhaung" yothaung: jham we' sabyi khyae jham khyo mavao nae" naonhaung" qid thaung: jham mae" re: qid makhae shaug' byid: nae". Naonhaung" mug: kyo: mae" mathug' lo" lo" wa hau" mo" khyokhyo" za: su" lo" nae"- ga: ta" nhao: ako".

²³Ngadqere: Sihon wa Israel byumyu" qere yao" mug: kyo: khug khyo" lai: lo" nae" akhang" mabyid: ngad: ra". Yao: wa yao" gyetab re zhang" yu mung: din"pyad' yo mae" Yaha khyo thug' ye: yang: Israel byu qere mang: zin" ra".

²⁴Ngadqere: Israel byumyu" qe wa gyevo jham myo: sho' yaug re se' pye' mung: yao: bam: mug: myid re Arnon qid gyaung: mae" Yabog gyaung: joe" sho' lhad' sang: yu: ako". Airu wa Amon byumyu" qenho: mug: kyo: joe" sho' ngad: ra". Pe"mung:ga"re Amon byu qenho: mug: kyo: wa tang za: gug: gam zaung" lhaug' to" ako".

²⁵Airumung: Israel byumyu" qe wa Heshbon we' ai: avai: ayae mae" Amori vogaung: mo" alhab' re lhad' pye' ru we' ai: vogaung: jham mae na: sang: yu: ako".

²⁶Heshbon wa- qhid' phyao: mae" Moba kho:kham re khe' aung: pye' mung: Arnon qid gyaung: joe" sho' lu: ra" yao" mug: myid re lhad' sang: yu: ra" Amori kho:kham Sihon nho: vogaung: mo" ngad: ra".

²⁷Ai: mathao mae dao: zham" zham" yaug nghaui" caung" ru wa- Kho:kham Sihon nho: vogaung: mo" Heshbon khyo li" ge,- Ai: rure dam: te: mung: azhao: mae" ru: kad' rure ngonhaung" myao nug:-

²⁸Qhid' phyao: dalhang ce: Heshbon vomo" mae" Sihon nho: gyetab wa myi: we' dakhyo: to" ye" lo" ako". Ai: gyetab wa Moba mung" mae" Ara vomo" re phyo' pye' mung: Arnon qid meim mae" bug gaung jham re zo" shao: pye' ra".

²⁹Moba byumyu" qe we"- naonhaung" wa byu xa: vaqoe, qhug' avako". Khemo re caung:pa" ra" mo, wa byo; qeim: ru qhug' avako". Naonhaung" nho: so wa yao" byu qere gye phao phao: khug: qin" mo, boe" nhao: ra". Aimung: yao: bam: myiqe: qe wa Amori kho:kham nho: kyam: byu qe boe" lo" va".

³⁰Ngadqere: ana" kam" wa yao: bam: myid:zo: bam re phyo' qheim" pye' va". Heshbon mae" Dibon joe" sho' Nashim mae" Medeba nhae Nopha joe" sho' se' tam" pye' ru qhug' ako".

³¹Airumung: Israel byumyu" qe wa Amori qenho: mug: myid khug mae te" na: ako".

³²Aimung: Moshe wa- Yaze vomo" re khe' zin" yu nae" qhid' mae" gai: thao" ra" khyo re yeqho nae" byu nhao: ke' ra". Israel byumyu" qe wa ai: vomo" we' ai: avai: ayae mae" vogaung: jham re khe' khyad' sang: yu mung: ai: mae na: ra" Amori byumyu" qere khe' thug' pye' ako".

³³Ai: thao Israel byumyu" qe wa dam: lhang: lo mung: Bashan mug: khyo joe" ra" khyo khyo" lo" ako". Aimung: Bashan kho:kham Oga wa yao" gyetab re jhui: yang: Edri mae yao: bam re gyekhe' ga: to" li" ra".

³⁴ASANG wa Moshe re- yao: re dagyaug yao: we' yao" byu alhab'- yao" mung"dan: alhab' rere: aung: yu nhao nae". Heshbon mae eib: lai: lo: ra" Amori kho:kham Sihon re nao: yang kad' ru we' dakhyo: yao: re kad' wa,- ga: ta" ra".

³⁵Aimung: Israel byumyu" qe wa Oga rere: yao" yauggai: zo: qere we' yao" byu alhab' rere: dayaug re: madang lo: se' pye' mung: yao" mug: myid rere: yao: bam sang: yu: pye' ako".