Read Maru GYAUNG: SU: 24 Bible Online

GYAUNG: SU: 24 - Maru bible

GYAUNG: SU: 24

¹Ana" cemyhao" ngad lao" Balam wa Israel byumyu" qere yao" yang shaman" byid: nae" qhid' mae" ASANG o: rure ba mung: yao: qhid' phyao: lhaung" kad' lai: lo: ruru: boe, maqo" phyid' lo:ngad: ra". Yao: wa din"pyad' yo khyo dam: tug' mung:-

²Israel byumyu" qe yao: bam: byumyu" kaung khyo" cao" yang: jamu kad' mung: na ko" rure the' myao: ra". Yao: re Mao"So: byo jaung" mung: lapa pa: ke' ra".

³Beo nho: yauggai zo: Balam nho: mungdao: wo"- gyang: gyang: za: qo" myao yaug: nho: mungdao: jham wo"-

⁴Mao"So pe" ta" rure khag' qo" the' gyo" ra" i? Ngo qu" mo; jo; rumae qam: bo: thao" ra" Mao"So: yang qhu" byid' ra" ve, lho daja: re myao:-

⁵Israel qenho: zaung jham wa yaung" va" lhe"-

⁶Aijham wa the' gae jham jin: yaug: jo; ruru:- mangad: lao" qid gyaung: yae mae" shi: khyae jham ru:- ASANG: yang qho" to" ra" sag' xau gae jham ru:- mangad: lao" qid yae mae" shaug' gae jham we' dakhyo:-

⁷Yao: bam wa mug: qid magan: mago" qo" yu: li" genae"- yao: bam: amyug: ashi: jham re qid gyi: gyi: qo" ra" yothaung: khug mae qho" to" li" genae". Yao: bam: kho:kham wa Agag tho' je: qi" qhang: li" nae". Aimung: yao" yang eib: rure mug: va: khyo lu: ce" lo" li" nae".

⁸Mao"So wa yao: bam re Egutu mae" jhui" thug' lo va". Yao: wa yao: bam: qhid' mae" nung: le" lo: dadau: we' dakhyo: gyekhe' byid' ra". Yao: bam wa yao: bam: gyevo qere phyo' zo" pye' ako". Yao: bam: shoqug: jham re khyoe' pye' mung: yao: bam: myokhe' jham re khyug' mhan" pye' ako".

⁹Ai: byumyu" wa qam: qi" ra" khangkhyi we' dau: ra". Airu: yab: jo; au: re khag' maye: vae" nhug' ngad: ako". Israel re shaman" yaug wa shaman" ru qhug' nae". Aimung: Israel re nhang: yaug wa nhang" ru qhug' zo: nae"- ga: pa: ra".

¹⁰Balag wa nhag' yo" ru we' lo, zhab' ci mung: Balam re- nga" gyevo qere nao: yang nhang: vashao: ein: nao re ngo khai: jhui" yu: ru ngad:- ngadqere: nao wa- ai: atha" ana" yao: bam re sam lhang shaman" byid' ava".

¹¹Ana" yham phao: lo" se, nao re ngo aphug' jhaung qhu" byid: nae" ein: dao:so: byid: va". Ngadqere: nao aphug' jhaung qhu" mathe' yu sho' ASANG: yang nao re tam" pye' ava".

¹²Balam wa- nao: yang nhao: ke' ra" lagyo: qere ngo ta" kyo: va".

¹³Ni" nho: kho:kham yham mae" ngaui we' qhang alhab' ngore byid: ngadqere: ngoyao: myid: khyo" cao" mung: ASANG amyin" byid' to" ru pe" rere: ngo maqo" ngag: pye' ein: ta" va". ASANG: yang ta" nhao: ru za: ngo ata" nae"- ga: tau" ra".

¹⁴Balam wa Balag re- Ana" ngo wa nga" byumyu" qejhao" dam: phao naeva". Ngadqere: ngo malo" shire- cethao: ne, ni" byumyu" re Israel qeyang khoru: ceim" kad' pye' nae" ga" rure ta" peim: co' shive- ga: ta" ra".

¹⁵Ai: thao mae yao: wa ceru: ga: lapa pa: ra". Beo nho: yauggai zo: Balam nho: mungdao: wo" gyang: gyang: za: ba: myao yaug: nho: mungdao: jham wo"-

¹⁶Mao"So ta" na: rure khag' qo" the' gyo" ra" i? Ngo qu" mo; jo; rumae qam: bo: thao" ra" Mao"So: yang qhu" byid' ra" ve, lho daja: re myao:- qam: so' qi" thao" ra" Mao"So mae" qhu" lho dalam: re magyang: maso: mung: jo; au: ngo zhaug' qu" yang: myao: wo"-

¹⁷Ngo wa joe" lo nae" ayo, re qu" ke' ra". Aimung: Israel byumyu" re the' myao:- Bo" bao: ra" kyi we' dau: ra" kho:kham dayaug wa ai: byumyu" khug mae po" thug' li" nae". Yao: wa kyimyho: we' dakhyo: Israel mae" thug' li" nae". Yao: wa Moba au: jhaung qere khe' zin" li" nae". Aimung: Sed mae" byu alhab' re be; khyo" pye' li" naemyao:-

¹⁸Yao: wa Edom mae" yao" gyevo qere aung: pye' li" nae"- Aimung: yao: bam: mug: re yao" jo,nho" kad' sang: pye' nae". Israel kam" wa xo' yang: aung: pye' li" nae".

¹⁹Israel byumyu" qe wa yao: bam re zab: pye" pye' nae". Aimung: lo" thao" na: dang: gyo" mo, re jhad' za: kad' pye' nae".

²⁰Ailao" Balam wa yao" qhu" lho mae Amaleg byumyu" qere the' myao mung: ce: lapa dao: re pa: ke' ra". Amaleg byumyu" wa byumyu" alhab' mae" qam: je: qi" thao" ngad: ako". Ngadqere: lo" thao" mae wa apyad ato mae baui" byaug: li" nae".

²¹Yao" qhu" lho mae Kenid byumyu" qere myao mung: ce: lapa dao: re pa: ke' ra"- Nao na: ra" jo, qo wa gug: gam: jo; ra" laug byo, mae" myhao: ra" jo, qo mae kad' to" ra" ngho' sad' we' dakhyo: gug: gam: ra".

²²Ngadqere: Kenid byu naonhaung" we"- Asuri qeyang naonhaung" re taung" jhui" lo" au: re phyo' qheim" pye' ru qhug' nae".

²³Balam wa ce: lapa dao: re pa: ke' ra" mug: am: shad' mae ham: phaung: na: ra" byumyu" qe wa khag' ngad: ako".

²⁴Mug: jhin: jhin" vao lo mo, wa Kupru mae" qid lha we' joe" lo: li" genae". Yao: bam wa Asuri we' Eber re aung: pye' li" genae". Ngadqere: yao: bam re: apyad ato mae dam: byo; qeim: lo" genae".

²⁵Ailao" Balam wa seim" jin" ci mung: yham phao: lo" ra". Balag re: yao" khyo khyo phao: lo" ra".